មាន​ប្រជា​ពលរដ្ឋ​កម្ពុជា​ក្នុង​លក្ខណៈ​ជា​គ្រូសារ ឬ​បុគ្គល​ក្រីក្រ កាន់​​តែ​ច្រើន​ឡើង ស្រប​ពេល​ដែល​កម្ពុជា​កំពុង​ស្ថិត​ក្នុង​កិច្ច​អភិវឌ្ឍន៍ និង​ឈាន​ក្នុង​សមាហរណកម្ម​អាស៊ាន​ឆ្នាំ​២០១៥​នេះ។ ទន្ទឹម​នឹង​នោះ នៅ​កម្ពុជា «អ្នក​មាន​ក៏​មា​ន​ដាច់» ឯ​«អ្នក​ក្រ​ក៏​ក្រ​ដាច់» និង​គ្មាន​ទី​ពឹង ទី​ពំនាក់។ ហើយ​ពួក​គាត់ ហាក់​បី​ដូច​ជា​គ្មាន​ការ​អើ​ពើ ពី​អាជ្ញាធរ​មូលដ្ឋាន ឬ​រដ្ឋាភិបាល​ឡើយ ពិសេស​ពី​កាកបាទ​ក្រហម​កម្ពុជា ក្នុង​ការ​ជួយ​ពួក​គាត់​ជា​លក្ខណៈ​បុគ្គល​នេះ។

ឃ្លា​​ទាំង​ប៉ុន្មាន​ខាង​​លើ​នេះ ជា​ការ​ថ្លែង​ចាប់​ផ្ដើម​របស់​លោក ប៉ែន សុវណ្ណ អតីត​នាយក​រដ្ឋមន្ត្រី​កម្ពុជា ដែល​បាន​ធ្វើ​ឡើង​ក្នុង​កិច្ច​សម្ភាស ជា​មួយ​ទស្សនាវដ្តី​មនោរម្យ.អាំងហ្វូ បន្ទាប់​ពី​សេចក្តី​ប្រកាស​ព័ត៌មាន​មួយ ត្រូវ​បាន​ចេញ​ផ្សាយ​កាល​ពី​ថ្ងៃ​ទី០៦ ខែ​មករា ឆ្នាំ​២០១៥ ពី​ការ​បង្កើត​មូលនិធិ ប៉ែន សុវណ្ណ ដើម្បី​ជួយ​ប្រជាពលរដ្ឋ​ក្រីក្រ និង​កុមារ​កំព្រា​នៅ​កម្ពុជា ចូល​រួម​រំលែក​ទុក្ខ និង​ការ​លំបាក​របស់​ប្រជា​ពលរដ្ឋ ពី​គ្រោះ​មហន្តរាយ​ធម្មជាតិ ផ្តល់​សេវា​ផ្នែក​សុខាភិបាល លើក​ស្ចួយ​ការ​សិក្សា​អប់រំ និង​កិច្ច​អភិវធឌ្ឍន៍​សហគមន៏​ជា​ដើម។

អតីតបុរសខ្លាំងនៃសាធារណរដ្ឋប្រជាមានិតកម្ពុជា ក្នុងវ័យ៧៨ ឆ្នាំ បានថ្លែងថា មូលនិធិ ប៉ែន សុវណ្ណ ខុស​ពី​កាកបាទក្រហម ត្រង់ថាកាកបាទក្រហមគេធ្វើការភាគច្រើន ផ្តោតសំខាន់ក្នុងករណីធំៗ មិនសូវមាន​ពាក់​ព័ន្ធ​នឹងបុគ្គល ឬជាគ្រួសារឡើយ។ លោកបានលើកជាឧទាហរណ៍ថា ដូចជាករណីបង្គន់អនាម័យ អណ្តូងស្នប់ ឬផ្ទះខូចមិនដែលឃើញបានជយយឡើយ ពិសេសជាងនេះ ការជួយរបស់កាកបាទក្រហម មានការរើសអើង​នយោបាយទៀត។

លោកបន្តថា មូលនិធិនេះ លោកទទួលបាននូវជំនួយ ពីសប្បុរសជននានាទាំងក្នុងស្រុក និងក្រៅស្រុក ដើម្បី​បានជួយដល់កុមារក្រីក្រ ជនចាស់ជរា «ពិត»ប្រាកដនៅកម្ពុជា។ លោកបន្តថា ការបង្កើតមូលនិធិ នៃការ​ផ្តល់​ជាជំនួយដល់ជនទីទាល់ក្រទាំងនោះ នឹងមិនធ្វើឡើងតាមកាកបាទក្រហមឡើយ ព្រោះតាមតថភាពសង្គម​បច្ចុប្បន្ន លោកមើលឃើញថា ការបាទក្រហមមិនបានមើលគ្រប់ជ្រុងជ្រោយនោះទេ ហើយក៏មិនអាចជួយ​គ្រប់​មនុស្ស នៃចំណែកតូចៗនោះដែរ។ ដូចជាករណីមួយចំនួន នៅតាមបណ្តារភូមិដាច់ស្រយ៉ាលនានាជាដើម ការបាទក្រហមមិនបានទៅដល់ ឬធ្វើការអើពើនោះឡើយ។

ទស្សនាវដ្តីមនោរម្យ.អាំងហ្វូ នៅមិនអាចទាក់ទងសុំការបញ្ជាក់ ពីកាកបាទក្រហមកម្ពុជា ជុំវិញការលើកឡើង​របស់លោក ប៉ែន សុវណ្ណ នេះនៅឡើយ។

បើទោះជានៅតាមកញ្ចក់ទូរទស្សន៍ គេតែងឃើញសកម្មភាពរបស់កាកបាទក្រហមកម្ពុជា ក្រោមការ​ដឹកនាំ​របស់លោកស្រី ប៊ុន រ៉ានី ដែលជាភរិយារបស់លោកនាយករដ្ឋមន្ត្រី ហ៊ុន សែន តែងបានចុះទៅចែកអំណោយ ឲ្យជនរងគ្រោះជារឿយៗក្ដី តែស្ថាប័នមនុស្សធម៌មួយនេះ តែរងនូវការរិះគន់ថា មានការរើសអើង មិន​អព្យាក្រិត្យ ហើយមិនសូវជាបានជួយជនរងគ្រោះ ឲ្យទាន់ពេលវេលានោះជាដើម។

ពលរដ្ឋរងគ្រោះ នឹងការលិចលង់ទឹកក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញមួយរូប លោក សួន ចាន់ស៊ីណា ធ្លាប់បានប្រាប់ទស្សនាវដ្តីថា មិនដែលឃើញមានការអើ ពីការបាទក្រហមកម្ពុជាទេ។ ការមិន​រវី​រវល់នេះ ទំនងជាមកពីខាងសង្កាត់តែងចោទពួកលោក បានធ្វើការតវ៉ារឿងទឹកលិចភូមិ និងមានបក្ស​ប្រឆាំង​នៅពីក្រោយ។ រីឯពលរដ្ឋម្នាក់ទៀត អ្នកស្រី ចាន់ មេសា ក៏បានបង្ហាញនូវការហួសចិត្តដែរថា ការស្នើសុំជួយ​រឿងទឹកលិចភូមិ បែរជាទាញភ្ជាប់ជាមួយគណបក្សនយោបាយទៅវិញ។ ។ អ្នកស្រីថ្លែងថា៖ «ដល់ពេលចែក​អំណោយ (កាកបាទក្រហម)មិនឲ្យអ្នកលិចលង់ដោយសារទឹក បែរជាចែកអ្នកដែលគាំទ្រខ្លួន បក្សពួក និង​គ្នីគ្នានៃមន្រ្តីមូលដ្ឋានទៅវិញ។ អ្នកស្របនឹងខ្លួន ទើបអាជ្ញាធរស្រង់ឈ្មោះ ឬហៅទៅទទួលអំណោយ តែបើ​អ្នកតវ៉ាច្រើន កុំសង្ឃឹម! តែមុខអាជ្ញាធរនោះមិនមើលមុខផង!»

បើយោងតាមទស្សនវិស័យ របស់កាកបាទក្រហមកម្ពុជា បានចែកឡើងថា ស្ថាប័នមនុស្សធម៌មួយនេះ ត្រូវ​រួម​ចំណែក ពន្លឿនការកាត់បន្ថយភាពក្រីក្រ ការពារ​សេចក្ដី​ថ្លៃថ្នូររបស់មនុស្សជាតិ និងការពារតម្លៃមនុស្សធម៌​របស់ជនរងគ្រោះ។ ក្នុងបេសកម្មវិញ កាកបាទក្រហម​កម្ពុជា​ជាសមាគមជាតិ នាំមុខគេក្នុងវិស័យមនុស្សធម៌ ដែលប្រមូលផ្ដុំកម្លាំងមនុស្សធម៌ ដើម្បីបន្ដជួយដល់​ជន​រង​គ្រោះបំផុត តាមរយៈគ្រោះមហន្តរាយ សុខភាព, ការថែទាំសុខភាពក្នុងសហគមន៍ និងការលើកកម្ពស់​គោល​ការណ៍គ្រឹះ និងតម្លៃមនុស្សធម៌ជាដើម។

សម្រាប់មូលនិធិ ប៉ែន សុវណ្ណ វិញ ត្រូវបានស្ថាបនិកលោក ប៉ែន សុវណ្ណ អះអាងពីប្រសិទ្ធិភាពនៃមូលនិធិនេះ ដោយសារវានឹងស្ថិតក្រោមការគ្រប់គ្រងរបស់លោកផ្ទាល់។ លោកអះអាងទៀតថា នឹងមិនបង្កឲ្យកើត​មាន​អំពើពុករលួយ នៅក្នុងមូលនិធិរបស់លោកមួយនេះឡើយ។ គ្រប់មន្រ្តី និងបុគ្គលិកទាំងអស់ ដែលនឹងត្រូវ​ចូល​មកធ្វើការក្នុងមូលនិធិនេះ ត្រូវតែឆ្លងកាត់ការត្រួតពិនិត្យដោយលោកផ្ទាល់ ហើយត្រូវជាមនុស្សពូកែ (មាន​ចំណេះដឹង) ស្អាតស្អំ ស្មោះត្រង់ ស្លូតបូត និងឧស្សាហ៍ព្យាយាម៕