មន្រ្តីក្រសួងចំនួនពីរ ប្រតិកម្មនឹងចំនួនពលរដ្ឋរងគ្រោះដីធ្លី៦% ថាគ្មានមូលដ្ឋាន
- ដោយ: ប្រាថ្នា អត្ថបទ និងយកការណ៍៖ ប្រាថ្នា ([email protected]) - ភ្នំពេញ ថ្ងៃទី២៥ ធ្នូ ២០១៤
- កែប្រែចុងក្រោយ: December 26, 2014
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
«គ្រាន់តែយកបញ្ហាមកបកស្រាយ ឱ្យមានភាពច្របូកប្របល់» នេះជាប្រតិកម្មរបស់លោក ជាម ប៉េងអា អនុប្រធាននាយកដ្ឋានរដ្ឋបាលមូលដ្ឋានក្រសួងមហាផ្ទៃ និងជាប្រធានក្រុមសម្របសម្រួលបច្ចេកទេស គំរោងបែងចែកដី សង្គមកិច្ច និងការអភិវឌ្ឍន៍ ឆ្លើយតបទៅនឹងការលើកឡើងរបស់លោក ឡាត់ គី ទាក់ទងនឹងចំនួនពលរដ្ឋខ្មែរ ដែលរបាយការណ៍មួយរបស់សមាគមអាដហុក បានអះអាងថាមានចំនួន៦% នៃប្រជាជនសរុប បានកំពុងរងគ្រោះនឹងបញ្ហាដីធ្លី។
ថ្លែងក្នុងវេទិកាជាតិស្ដីពី«ការគ្រប់គ្រងដីធ្លី និងធនធានធម្មជាតិ» កាលពីថ្ងៃទី២៤ ខែធ្នូ ឆ្នាំ២០១៤នេះ លោក ជាម ប៉េងអា បានប្រតិកម្មទៅមន្ត្រីសង្គមស៊ីវិលទៀតថា៖ «សម្រាប់ខ្ញុំក្នុងនាមអ្នកធ្វើការជំនាញ ខ្ញុំមានវិធីសាស្រ្តត្រួតពិនិត្យរបាយការណ៍នេះ ឱ្យបានច្បាស់លាស់ថា តើរបាយការណ៍នេះ គាត់មានសរសេររបៀបការវាស់វែង យកស្អីមកផ្ទៀងផ្ទាត់? ក្របខ័ណ្ឌគតិយុទ្ធ ដែលយើងដាក់ឱ្យប្រើនេះ គាត់បានមើលទេ?»
នៅមុននេះ លោក ឡាត់ គី មន្ត្រីផ្នែកដីធ្លីរបស់សមាគមសិទ្ធិមនុស្សអាដហុក បានថ្លែងឲ្យដឹងថា របាយការណ៍អាដហុកឆ្នាំ២០១៣ ដែលនឹងចេញផ្សាយក្នុងពេលខាងមុខនេះ បានរកឃើញថា ប្រជាជន មាន ៦% នៃប្រជាជនសរុបក្នុងប្រទេសកម្ពុជា បានរងគ្រោះពីបញ្ហាដីធ្លី។ មន្រ្តីដែលមានបទពិសោធន៍ច្រើនឆ្នាំ ទាក់ទងនឹងបញ្ហាដីធ្លីរូបនេះ បានលើកឡើងបន្តថា នេះជាទំហំមួយដែលធ្ងន់ធ្ងរ និងជាទំហំមួយ ដែលគួរតែមានការប្រកាសជាបន្ទាន់ ក្នុងការគិតគូរឡើងវិញពីផលប៉ះពាល់នេះ។
មន្រ្តីរបស់សមាគមអាដហុក បានថ្លែងទៀតថា កន្លងមករដ្ឋាភិបាល តែងតែលើកពីកិច្ចខំប្រឹងប្រែង នៅក្នុងការបង្កើតគោលការណ៍ យន្តការគ្រប់បែបយ៉ាង ដើម្បីដោះស្រាយទំនាស់ដីធ្លី ប៉ុន្តែលោកសម្គាល់ឃើញថា គោលនយោបាយទាំងអស់នោះ នៅតែគ្មានប្រសិទ្ធិភាព ជាពិសេសការលើកស្ទួយពីសិទ្ធិដីធ្លី និងធនធានធម្មជាតិ។ លោកបន្តថា តាំងពីលោកចូលធ្វើការផ្នែកដីធ្លី អស់រយៈពេលជាង១០ឆ្នាំមកនេះ លោកមិនដែលជួបប្រទះករណី នៃការដោះស្រាយទំនាស់ ដោះស្រាយបញ្ហាដីធ្លីរបស់រដ្ឋាភិបាល ដើរតាមយន្តការដែលមានស្រាប់ តាមបច្ចេកទេសនោះទេ។
«របាយការណ៍... ងងឹត»
ប៉ុន្តែ សម្រាប់លោក ជាម ប៉េងអា បាននិយាយថា តួលេខដែលបង្ហាញពីប្រជាជនរងគ្រោះ ៦% ស្មើនឹងប្រជាជនប្រមាណជាជាង១លាននាក់នេះ ជាបញ្ហាមួយយ៉ាងធ្ងន់ធ្ងរ និងហាក់ដូចបង្ហាញថា មន្ត្រីបច្ចេកទេសរបស់ក្រសួង «គ្មានស្អីដែលជាការស្រលាញ់ប្រជាពលរដ្ឋខ្លួនឯង»។ លោកបានថ្លែងប្រតិកម្មបន្តថា៖ «សួរថា ខ្ញុំនេះជាស្អី? រដ្ឋាភិបាលនេះជាស្អី? ហេតុអីបានជាឃើញថា គំនិតវិភាគបញ្ហាមួយ ទៅគិតជារឿងរបាយការណ៍នែ៎... បញ្ចេញមកយ៉ាងងងឹតយ៉ាងដូច្នេះ!»
«បើ៦%មិនងាប់អស់ហើយ»
ចំណែកលោក សរ សុវណ្ណ រដ្ឋលេខាធិការក្រសួងដែនដី នគរូបនីយកម្ម និងសំណង់ ក៏បានប្រតិកម្មពីក្រោយលោក ជាម ប៉េងអា ដែរ ដោយលោកបានហៅរបាយការណ៍ ប្រជាជនរងគ្រោះ៦% របស់សមាគមអាដហុកនេះ ជារបាយការមិនពិត គ្មានតួលេខពិតប្រកដ។ លោកបន្តថា៖ «អូនឯងបើ៦%មែន មិនស្លាប់អស់ហើយ មិនស្លាប់ពេញភ្នំពេញហើយ ហើយទេសចរណ៍អ្នកណាគេមក ហើយអ្នកវិនិយោគគេមកវិនិយោគឬអត់?»។
ប៉ុន្តែលោក ឡាត់ គី នៅតែប្រកាន់ជំហររបស់លោក ក្នុងនាមសមាគមអាដហុក ដែលជាអ្នកឃ្លាំមើលរាល់ការរំលោភសិទ្ធិមនុស្ស ជាពិសេសរាល់ការរំលោភដីធ្លី។ លោកថា ការឃ្លាំមើលរបស់អាដហុក គឺឃ្លាំមើលរាល់មូលដ្ឋានគតិយុទ្ធ និងលើគោលនយោបាយផ្សេងៗ លោកបញ្ជាក់បន្ថែមថា៖ «អញ្ចឹង រាល់ពេលយើងចេញរបាយការណ៍មួយ យើងមិនមែនចេះតែចេញទេ ឯកត្តមសូមពិនិត្យមើល»៕