ក្រោយ​ការ​សាក​សួរ​ក្នុង​ថ្ងៃ​នេះ​ តុលាការ​​នឹង​​ដោះ​​លែង​លោក មាជ សុវណ្ណារ៉ា សកម្មជន​គណបក្ស​សង្គ្រោះ​ជាតិ ឲ្យ​មាន​សេរីភាព​ឡើង​វិញ បើ​តុលាការ​បាន​ពិនិត្យ​ភស្តុតាង នូវ​ខ្សែ​វីដេអូ​ប្រាំ​ដុំ និង​ឯកសារ​មួយ​ចំនួន ដែល​បាន​ដាក់​ជូន​តុលាការ​នោះ។ នេះ​ជា​ក្ដី​សង្ឃឹម​របស់​លោក ចាន់ ចេង មេធាវី​ការពារ​ក្ដី​ឲ្យ​លោក មាជ សុវណ្ណា​រ៉ា នៅ​ក្នុង​ការ​ថ្លែង​មួយ មក​កាន់​ទស្សនាវដ្ដី​មនោរម្យ.អាំងហ្វូ។

តែសម្រាប់ លោក​មេធាវី ហែម សជាតិ មិន​បាន​ដាក់​ក្តី​សង្ឃឹម​ដូច​មេធាវី ចាន់ ចេង ទេ។ លោក​បាន​បញ្ជាក់​ប្រាប់​ទស្សនាវដ្តី​មនោរម្យ.អាំងហ្វូ​ដែរ​ថា បើ​តុលាការ​ឯករាជ្យ មិន​ស្ថិត​ក្រោម​អំណាច​នៃ​អ្នក​នយោបាយ នោះ​ទាំង​ឯកសារ និង​ភស្តុតាង​ដែល​មាន​នោះ ទើប​អាច​ចាត់​ទុក​ថា មាន​ប្រយោជន៍​សម្រាប់​កូន​ក្តី​លោក។

យ៉ាងណាក៏ដោយ លោក មាជ សុវណ្ណារ៉ា ស្ថាបនិកវិទ្យុខ្មែរប៉ុស្តិ៍ នឹងត្រូវតុលាការ នាំខ្លួនមកសាកសួរបន្ថែម នាព្រឹកថ្ងៃទី២៥ ខែធ្នូនេះ រឿងញុះញង់ឲ្យមានអំពើហឹង្សា នៅទីលានប្រជាធិបតេយ្យនាពេលកន្លងមក។ លោក​មានមេធាវីចំនួនប្រាំរូប ក្នុងការតតាំងក្តីនេះ ជាមួយនឹងបណ្តឹង ដែលប្តឹងដោយក្រុមសន្តិសុខដែល​បាន​ដាក់ពាក្យប្ដឹង ដោយមិនចំពោះមុខនោះ។

លោមេធាវី ចាន់ ចេន បានបន្តថា កូនក្តីរបស់លោកត្រូវតែរួចខ្លួន ពីការចោទប្រកាន់ទាំងនេះ។ ព្រោះកូនក្តី​លោក មិនមានជាប់ពាក់ព័ន្ធ ដូចការចោទប្រកាន់នោះឡើយ។ ខ្សែរវីដេអូចំនួនប្រាំដុំ ដែលលោកចាត់ទុកជា​ភស្ដុតាងសំខាន់នោះ បានចាប់បានប នូវគ្រប់សកម្មភាពទាំងមុនព្រឹត្តិការណ៍ ក្នុងព្រឹត្តិការណ៍ និងក្រោយ​ព្រឹត្តិការណ៍ បានបង្ហាញថា កូនក្តីលោក មិនមានជាបពាក់ព័ន្ធ ក្នុងការបញ្ជាឲ្យប្រើហិង្សានោះឡើយ។

លោកបានថ្លែងទៀតថា៖ «ទាំងសកម្មភាព សំដីសំដៅ កាយវិការ គ្មានអ្វីដែលបង្ហាញថា ជាលក្ខណៈបង្ក​ហេតុ​ហើយ។ ផ្ទុយមកវិញលោកមានតែប្រើពាក្យថា ឲ្យខ្មែរស្រលាញ់គ្នា ធ្វើអ្វីដោយអហិង្សា កុំឲ្យយកខ្មែរ​ណាជា​សត្រូវ អនុវត្តសិទ្ធិរបស់ខ្លួនក្រោមប្រព័ន្ធច្បាប់ តាមការគ្រប់គ្រងរដ្ឋបែបលិទ្ធិប្រជាធិបតេយ្យ។ ខ្ញុំមានការ​សោក​ស្តាយ ដែលតុលាការធ្វើការឃុំខ្លូនលោក (មាជ សុវណ្ណារ៉ា) យ៉ាងនេះ។»

លោកបានបញ្ជាក់ថា បើតុលាការស្ថិតលើគោលការណ៍នៃការគោរពច្បាប់ តុលាការនឹងធ្វើការចាក់ផ្សាយ នូវ​ខ្សែរវីដេអូដែលលោកបានស្នើឡើងនោះ ទាំងក្នុងបន្ទប់ និងផ្សាយបន្តមកក្រៅតុលាការ ដើម្បីបាន​ជ្រាប​ដល់​សាធារណៈជន ពិនិត្យមើលទាំងអស់គ្នា ថា តើអ្នកណាជាអ្នកប្រើប្រាស់ នូវអំពើហិង្សានោះ ហើយនឹងធ្វើការ​ដោះលែងកូនក្តីលោក ដោយគ្មានលក្ខខណ្ឌ។

ដោយឡែក លោកមេធាវី ហែម សុជាតិ បានបន្ថែមថា តុលាការនឹងធ្វើការកាត់ក្តីលោក មាជ សុវណ្ណារ៉ា រួម​ទាំង​តំណាងរាស្រ្តប្រាំពីរនាក់ផ្សេងទៀត។ តែលោកមិនមានសង្ឃឹមថា តុលាការនឹងដោះលែងកូនក្តីលោកឡើយ ព្រោះលោកយល់ថា នេះជារឿងនយោបាយ បើទោះជាមានភស្តុតាងដោះបន្ទុក ជាខ្សែរវីដេអូបញ្ជាក់​យ៉ាង​ច្បាស់​ក៏ដោយ។

តែលោកសហមេធាវី បែរជាដាក់ក្តីសង្ឃឹម ចំពោះការដោះលែងកូនក្តីនោះវិញថា បើមានការ​ដោះស្រាយ​ផ្នែក​នយោបាយ ទើបមានការដោះលែងដ៏ពិតប្រាកដមួយ។ លោកមេធាវី ហែម សុជាតិ បានថ្លែងឲ្យដឹងទៀតថា៖ «ជារឿងនយោបាយ ក្នុងការធ្វើបាបមកលើសកម្មជន និងតំណាងរាស្រ្តគណបក្សប្រឆាំង។ (...) តាមខ្សែ​វីដេអូ​ទាំងប្រាំ មិនមានចំណុចណាមួយ ដែលបង្ហាញថា មានការបង្គាប់បញ្ជា ញុះញុងឲ្យមានអំពើហិង្សាឡើយ។ (...) ទាំងនេះជារឿងនយោបាយសុទ្ធសាធ បើមានការសម្របសម្រួលខាងនយោបាយ នោះកូនក្តីខ្ញុំ អាចនឹង​ត្រូវបានរួចខ្លួន។ (....) តែបើបុគ្គល ឬមន្រ្តីតុលាការឯករាជ្យ អព្យាក្រិត្យ ឈរលើគោលការណ៍និងឆន្ទះ​ច្បាប់​នោះ កូនក្តីរបស់ខ្ញុំ នឹងត្រូវបានទម្លាក់ចោល នូវបទចោទប្រកាន់ទាំងឡាយ។»

មេធាវីសហភាតារបស់លោក មាជ សុវណ្ណារ៉ា រួមមាន លោកមេធាវី ចាន់ ចេន, លោក ហែម សុជាតិ, លោក ជួង ជូងី, លោក កែវ សីហា និងលោក គង់ ពិសី។ តាមការបញ្ជាក់របស់លោកមេធាវី ហែម សុជាតិ ថ្ងៃទី២៥ ខែធ្នូនេះ លោកព្រះរាជអាជ្ញា កែវ សុជាតិ នឹងធ្វើការនាំខ្លួនលោក មាជ សុវណ្ណារ៉ា មកធ្វើការសារសួរបន្តរ៕