ចូលបាញ់រះក្នុងសាលារៀននៅប៉ាគីស្ដង់ យ៉ាងហោច១៤១ស្លាប់
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី១៦ ធ្នូ ២០១៤
- កែប្រែចុងក្រោយ: December 17, 2014
- ប្រធានបទ: ភេវរកម្ម
- អត្ថបទ: មានបញ្ហា?
- មតិ-យោបល់
-
ជាព្រឹត្តិការណ៍ដ៏រន្ធត់ នៅក្នុងប្រវត្តិសាស្ត្ររាប់រយឆ្នាំ នៃប្រទេសប៉ាគីស្ដង់។ ហេតុការណ៍បានកើតឡើង នៅវេលាម៉ោង១០ និង៣០នាទី ព្រឹកថ្ងៃទី១៦ ខែធ្នូ និងបានបន្តរហូត៨ម៉ោងក្រោយ ទើបកងទ័ពប្រទេសប៉ាគីស្ដង់ បានប្រកាសថា ខ្លួនបានគ្រប់គ្រងសភាពការណ៍បានទាំងស្រុង ហើយជនខ្មាន់កាំភ្លើងទាំង៦នាក់ ដែលស្លៀកពាក់ជាទាហានដែរនោះ ត្រូវបានសម្លាប់។ តុល្យភាពបណ្ដោះអាសន្ន របស់អាជ្ញាធរក្រុង ប៉េស្សាវ៉ា បានផ្សាយឲ្យដឹងថា សិស្ស១២១នាក់ផ្សេងទៀត បានរងរបួស ហើយសិស្ស៩៦០នាក់ និងបុគ្គលិកផ្សេងទៀតរបស់សាលារៀន ត្រូវបានរំដោះចេញជាស្ថាពរ។
គ្រូពេទ្យមួយរូបបានថ្លែងអះអាងថា មួយភាគធំនៃជនរងគ្រោះ សុទ្ធសឹងជាកុមារ ដែលមានអាយុរវាងពី១០ ទៅ២០ឆ្នាំ។ អភិបាលក្រុង ប៉េស្សាវ៉ា លោក បារ៉ាមាន់ ខ័ណ (Bahramand Khan) បានបញ្ជាក់ថា៖ «តុល្យភាពនៃចំនួនជនរងគ្រោះ អាចនឹងបន្តកើនឡើង»។
បើតាមសាក្សីនៅផ្ទាល់កន្លែង បាននិយាយថា ជនខ្មាន់កាំភ្លើងទាំង៦នាក់ បានដើរពីថ្នាក់មួយទៅថ្នាក់មួយទៀត ហើយបានបាញ់សន្ធាប់ទៅលើកូនសិស្ស ដែលសុទ្ធសឹងជាកុមារ។ សិស្សជំទង់មួយរូបអាយុ១៦ឆ្នាំ ដែលនៅរស់ប៉ុន្តែកំពុងព្យាបាលរបួសនៅមន្ទីរពេទ្យនោះ បាននិយយជនតាលីបង់ បានដើរទៅសម្លាប់កុមារ បើទោះជាកុមារទាំងនោះ បានរត់ចូលទៅពួននៅក្រោមកៅអីរួចហើយក៏ដោយ។ យុវនិស្សិត ត្រូវបានបាញ់ឲ្យរបួស នៅត្រង់ជើងហើយបានសំងំក្រាបនៅលើដី រហូតសន្លប់បាត់ស្មារតី។ ប៉ុន្តែយុវសិស្សបានចាំយ៉ាងច្បាស់ ពីខ្មាន់កាំភ្លើង ដែលមានពាក់ស្បែកជើងធំៗពណ៌ខ្មៅ ហើយដើរបាញ់សម្លាប់មិត្តរួមថ្នាក់របស់ខ្លួន។
កងទ័ពបានធ្វើអន្តរាគមន៍ភ្លាមៗ ហើយសម្លេងផ្ទុះអាវុធជាច្រើន បានលាន់លឺពេញមួយរសៀល។ នៅម៉ោងប្រមាណជា៦ល្ងាច ទើបគេបានដឹងថា ជនខ្មាន់កាំភ្លើងទាំង៦នាក់ ត្រូវបានសម្លាប់។ កងទ័ពនិយាយថា ខ្មាន់កាំភ្លើងម្នាក់ បានបំផ្ទុះគ្រាប់បែកដែលជាប់នឹងខ្លួន ដើម្បីសម្លាប់ខ្លួន ខណៈខ្មាន់កាំភ្លើងចុងក្រោយបំផុត បានរត់ទៅលាក់ខ្លួន នៅក្នុងអាគារជាប់ខាង មុននឹងត្រូវបាញ់សម្លាប់។ មេបញ្ជាការកងទ័ពប៉ាគីស្ដង់ លោកឧត្តមសេនីយ អាស៊ីម បាជវ៉ា (Asim Bajwa) បានសរសេរនៅលើទំព័រទ្វីសធើ នៅក្រោយយុទ្ធនាការនោះថា៖ «ភេវរជនទី៦ ត្រូវបានសម្លាប់នៅក្នុងអាគារចុងគេបង្អស់។ គ្រាប់បង្កៃដែលភេវរករ បានដាក់នៅក្នុងសាលា បានធ្វើឲ្យការបោសសម្អាតរបស់កងទ័ព មានការយឺតយ៉ាវ។»
ហេតុការណ៍បាញ់សម្លាប់ដ៏រង្គាល ត្រូវបានប្រកាសទទួលស្គាល់ដោយចលនាតាលីបង់ នៅប៉ាគីស្ដង់ ហៅកាត់ថា TTP។ បើទោះជានៅក្នុងរយៈពេលចុងក្រោយនេះ ក្រុមនេះបានរងនូវការសំពងយ៉ាងចាស់ដៃ ពីសំណាក់កងទ័ពប៉ាគីស្ដង់ក៏ដោយ តែការបាញ់សម្លាប់សិស្សសាលាលើកនេះ បានបង្ហាញជាថ្មីថា ក្រុមតាលីបង់ដែលសេសសល់ នៅតែអាចធ្វើប្រទេសប៉ាគីស្ដង់ទាំងមូល តក់ស្លុតនៅឡើយ។ នៅក្នុងសារមួយចេញផ្សាយ នៅក្រោយព្រឹត្តិការណ៍ ក្រុមតាលីបង់បាននិយាយថា នេះជាច្រើនចម្លើយ«សមស្រប»មួយ ទៅនឹងការយុទ្ធនាការរបស់កងទ័ពតាលីបង់ ប្រឆាំងនឹងក្រុមតាលីបង់ និងបានធ្វើឲ្យក្រុមគ្រួសារច្រើននាក់របស់ពួកគេស្លាប់៕