រវាងសុភ័ណ្ឌ ឡារី និងសាពូន មីដាដា មួយណាត្រូវលាងគូទខ្លួនឯងមុន?
- ដោយ: ប្រាថ្នា អត្ថបទ៖ ប្រាថ្នា ([email protected]) - ភ្នំពេញ ថ្ងៃទី១០ ធ្នូ ២០១៤
- កែប្រែចុងក្រោយ: December 11, 2014
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
«និយាយទៅ លាងគូទខ្លួនអោយជ្រះ ចាំរិះគន់គេ ពួកតារាខ្លះ បានធ្វើកូនធម៌លោកមេបក្ស តំកើនខ្លួនលើសគេ ស្រឡាញ់ជាតិលើសគេ!» នេះជាការលើកឡើងរបស់ ខាំ ភូរិ អ្នកនិពន្ធរបស់ស្ថានីយ៍ទូរទស្សន៍បាយ័ន ដែលធ្វើការរិះគន់ ទៅលើតារាសម្តែងដែលមាននិន្នាការទៅខាងគណបក្ស សង្គ្រោះជាតិ លោក សុភ័ណ្ឌ ឡារី។
ក្រៅពីអ្នកនិពន្ធខាងលើ មានប្រិយមិត្តម្នាក់ទៀត បានសរសេររិះគន់លោក សុភ័ណ្ឌ ឡារី ដែរថា៖ «អ្នកខ្លះជេស្តីថាគេណ្នឹងផ្កាប់មុខ គ្មានកំណើតជេស្តីគេដូចគ្មានពូជអំបូរ សូមក្រឡេកមើលសង្គមខ្លះផង កុំបានតែសម្តែងដូចខ្លួនណ្នឹងជួយសង្គម ហើយស្រលាញ់ជាតិនោះ។ ប្រើល្បិចឈឺសាច់ រំងាប់ចិត្តអ្នកគាំទ្រ ឯក្រោយឆាកវិញ យកលុយជំនួយផឹកស៊ីចិញ្ចឹមស្រី បើខ្លួនមិនស្អាតស្អំផង កុំធ្វើដូចខ្លួនណ្នឹងមហិមា។»
ប្រិយមិត្តដដែលនេះ សរសេរបរិហារលោក សុភ័ណ្ឌ ឡារី បន្តថា៖ «កុំមើលងាយអ្នកសិល្បៈផ្សេងទៀត ដើម្បីទាញយកប្រជាប្រិយផ្ទាល់ខ្លួន លោកគួរតែលាងខ្លួនឱ្យជ្រះសិនទៅណា ពូកែសំដែងទាំងក្នុង និងក្រៅឆាក ពានរង្វាន់តារាសំគីស បានទៅលើលោកហើយ អាអត់ផ្កាប់មុខ»។
ការរិះគន់ទៅលើអតីតតារាសម្តែង ដែលមិនសូវល្បីឈ្មោះក្នុងសង្វៀនសិល្បៈ ប៉ុន្តែល្បីតែនៅលើបណ្តាញសង្គម លោក សុភ័ណ្ឌ ឡារី បន្ទាប់ពីលោកបានរិះគន់ ទៅលើលោក សាពូន មីដាដា ដែលល្បីថា ជាតារាចាំលើកជើងគណបក្សប្រជាជនកម្ពុជា និងរដ្ឋាភិបាលលោក ហ៊ុន សែន។
តារាសម្តែង ដែលសឹងតែបាត់ឈ្មោះពីវិថីសិល្បៈកម្ពុជា ក្នុងអំឡុងពេលគណបក្សសង្គ្រោះជាតិដឹកនាំធ្វើបាតុកម្មរូបនេះ បានសរសេររិះគន់លោក សាពូន មីដដា នៅលើទំព័រហ្វេសប៊ុករបស់ខ្លួនថា៖ «លោក Sapoun Midada ដែលជាអ្នកចំរៀង រឺអ្នកសិល្បះខ្មែរមួយរូប នៅតែប្រើពាក្យសំដីមើលងាយជេស្តី ដល់អ្នកគាំទ្រដដែល»។ វាគ្មានអ្វីចម្លែកទេ បើទំពក់មិនទៅភ្នៅក៏វាមិនមកដែរ ព្រោះការរិះគន់របស់ សុភ័ណ្ឌ ឡារី ទៅលើស្វាមីអ្នកនាង សឿ សុធារ៉ា បានធ្វើឡើង នៅក្រោយពេលលោក សាពូន មីដាដា បានសរសេរបរិហារឱ្យលោក សម រង្ស៊ី និងអ្នកគាំទ្រ ព្រមទាំងធ្វើការ ប្រៀបធៀបអ្នកគាំទ្រគណបក្សសង្រ្គោះជាតិ ថាជា«ឆ្កែនិងឆ្មា»។
លោកសាពូន មីដាដា សរសេរយ៉ាងដូច្នេះថា៖ «សូមអោយឯឧត្តម សម រង្ស៊ី ដោះក្រឡាអុកនេះសិន។ ប្រហែលជាដោះមិនរួចទេ មើលទៅ ព្រោះជំហានណាក៏ស្លាប់ដែរ។ ចាំខ្ញុំបង្រៀន។ តែសូមឯកឧត្តម ចាប់ឆ្កែរឆ្មាចង និងឲ្យពួកវាស៊ីចំណីផង កុំអោយស្រែកព្រុះ អានាថាតាមចិញ្ចើមថ្នល់ចឹង មិនសមទេអាណិតគ្នាផង។ ឯកឧត្តមប្រធាន និងអនុប្រធាន កុំសំងំសុខតែឯង។»៕