សុភ័ណ្ឌ ឡារី បង្ហើប​​ពី​​ជីវិត​​របស់​​ខ្លួន និង​​ការ​​រើស​​អើង​នយោបាយ

សុភ័ណ្ឌ ឡារី បានចូលប្រឡួកនៅក្នុងវិស័យសិល្បៈ នៅចុងឆ្នាំ២០០៦ តែមិនសូវជាមានភាពជោគជ័យប៉ុន្មានទេ។ ជីវិត​ជាតារារបស់លោកនេះ កាន់តែអាប់រស្មីទៅទៀត ហើយត្រូវបាន​គេ​ផ្អាក​មិន​ឲ្យ​ចេញ​ថត​ទាំង​ស្រុង បន្ទាប់ពី​លោក​ចូល​ប្រឡូក​ក្នុង​សកម្មភាព​នយោបាយ ជាមួយគណបក្សប្រឆាំង។
Loading...
  • ដោយ: ក. សោភណ្ឌ អត្ថបទ និងយកការណ៍៖ ក.សោភ័ណ្ឌ ([email protected]) - ភ្នំពេញ ថ្ងៃទី២៣ ធ្នូ ២០១៤
  • កែប្រែចុងក្រោយ: December 24, 2014
  • ប្រធានបទ: តារា
  • អត្ថបទ: មានបញ្ហា?
  • មតិ-យោបល់

ក្នុងប្រទេស​កម្ពុជា​សព្វ​ថ្ងៃ ​គ្មាន​កន្លែង​សម្រាប់​មនុស្ស​គ្មាន​អំណាច គ្មាន​ប្រាក់ ឬ​គ្មាន​បក្ស​ពួក​ឡើយ។ ដោយ​សារ​​តែ​ភាព​អសកម្ម និង​ទង្វើ​អយុត្តិធម៌ ដែល​កើត​មាន​ច្រើន​«ជ្រុល»​នៅ​ក្នុង​សង្គម​នេះ​ហើយ ទើប​ធ្វើ​ឲ្យ សុភ័ណ្ឌ ឡារី សម្រេច​ចិត្ត​ធ្វើ​តាម​ជម្រើស​មួយ​របស់​ខ្លួន ដែល​ខុស​ប្លែក​ពី​មិត្ត​រួម​អាជីព​ជា​តារា​ផ្សេង​ទៀត។ នេះ​ជា​ការ​ទម្លាយ​ឲ្យ​ដឹង នូវ​ជីវិត​ផ្ទាល់​ខ្លួន​របស់​តារា​ដែល​មិន​សូវ​មាន​រស្មី លោក សុភ័ណ្ឌ ឡារី នៅ​ក្នុង​វីដេអូ​មួយ ដែល​ទើប​នឹង​ត្រូវ​បាន​បង្ហោះ នៅ​តាម​បណ្ដាញ​សង្គម។

តាំងពី​តូច​មក តារា​វ័យ​២៩​ឆ្នាំ​រូប​នេះ មិន​ធ្លាប់​បាន​ចូល​ប្រឡូក ក្នុង​រឿង​នយោបាយ​ឡើយ ទោះ​បី​ជា​រូប​គេ​ធ្លាប់​ឆ្លង​កាត់​ជីវិត ដ៏​ក្រ​លំបាក​វេទនា​ជា​ច្រើន​ និង​ផ្នែក​មួយ​នៃ​ជីវិត​ដ៏​ជូរ​ចត់​នោះ មាន​ទាក់​ទងនឹង​នយោបាយ​ក្តី។

តារា​រូប​នេះ បាន​រំលឹក​មក​វិញ​ថា ខ្លួន​បាន​ឆ្លង​កាត់ ជីវិត​ជា​អ្នក​រត់​តុ កម្មករ​សំណង់ ស៊ី​ឈ្នួល​លី​ស៊ីម៉ងត៍ និង​ជីវិត​ជា​អ្នក​សុំ​ទាន​គេ​ជា​ដើម មុន​នឹង​រូប​គេ​មាន​វាសនា ក្លាយ​ជា​តារា​សម្តែង​មាន​មុខ​មាត់​ម្នាក់​នៅ​ពេល​នេះ។ ក្រោយ​បើក​ភ្នែក​ចាប់​កំណើត​នៅ​លើ​ផែន​ដី សុភ័ណ្ឌ ឡារី បាន​ទទួល​នូវ​ភាព​ឈឺ​ចាប់​ជា​ច្រើន​នៅ​ក្នុង​គ្រួសារ នោះ​គឺ​ដី​របស់​ជីតាទួតរបស់លោក ប្រមាណ១០ហិកតា នៅខេត្តស្វាយរៀង ត្រូវបានអាជ្ញាធរយួនលេបត្របាក់​យក​ទាំង​ស្រុង និងជាពិសេស ឪពុករបស់លោក បានស្លាប់ព្រោះតែរឿងនយោបាយទៀត នៅក្រោយ​ការបោះឆ្នោត​អ៊ុនតាក់។

នៅពេលឪពុកស្លាប់ ព្រោះដំណែងនយោបាយនេះ បន្ទាប់ពីចូលសិល្បៈអស់ជាច្រើនឆ្នាំ ទើបតែនៅក្នុង​អាណត្តិទី៥នេះប៉ុណ្ណោះ ដែលគេបានឃើញតារាសម្តែងរូបនេះ លេចមុខធ្លោនៅក្នុងរឿងនយោបាយ ជាមួយ​គណបក្សសង្គ្រោះជាតិ ខណៈតារាកម្ពុជា ស្ទើរតែ១០០%បានចូលខ្លួនផ្សព្វផ្សាយ និងដើរតាមគោល​នយោបាយ របស់គណបក្សប្រជាជនកម្ពុជា ដែលកាន់អំណាចយ៉ាងចាស់វស្សា តាំងពីឆ្នាំ១៩៧៩មក។

តារាសម្តែងកំព្រាឪពុក តាំងពីអាយុ៩ឆ្នាំ រូបនេះ បាននិយាយថា៖ «តាមពិត ដំបូងឡើយ ខ្ញុំមិនបានចូលរួម​ក្នុង​ចលនាបក្សសង្គ្រោះជាតិទេ ខ្ញុំគ្រាន់តែយកអំណោយសប្បុរស របស់បងប្អូនអាមេរិកទៅចែកជូនជនក្រីក្រ និង​អ្នករងគ្រោះដោយទឹកជំនន់សោះ តែបែរជាគេមកចោទខ្ញុំថា ខ្ញុំជាសកម្មជនបក្សសង្គ្រោះជាតិ តែខ្ញុំក៏មិនថា​អី​ដែរ។ លុះក្រោយមក ខ្ញុំក៏បានសម្រេចចូលរួមចលនាទាមទារយុត្តិធម៌នានា របស់បក្សសង្គ្រោះជាតិ នៅពេល​ខ្ញុំបានមើលឃើញពីភាពអសកម្ម និងអយុត្តិធម៌ជាច្រើន បានកើតឡើងក្នុងសង្គមកម្ពុជា»។

សម្រាប់ សុភ័ណ្ឌ ឡារី បើទោះបីជាស្ថានីទូរទស្សន៍ក្នុងស្រុកមួយចំនួន បានបញ្ឍប់លោកមិនឲ្យថតក៏ដោយ ក៏​លោកបានសម្រេចចិត្តរួចជាស្រេច ក្នុងគាំទ្រគណៈបក្សសង្គ្រោះជាតិ។ នៅក្នុងពេលនេះ លោកក៏នៅតែគាំទ្រ​នឹងនិន្នាការថ្មី របស់គណបក្សសង្គ្រោះជាតិ ដែលបានយល់ព្រម និងចូលជាមួយគណៈបក្សកាន់​អំណាចសព្វ​ថ្ងៃដែរ។ លោក បានបន្តការប្ដេជ្ញាចិត្តទៀតថា៖ «ខ្ញុំនៅតែធ្វើវាឲ្យខ្លាំងឡើង នូវអ្វីដែលខ្ញុំអាចជួយបងប្អួន​ខ្មែរ​បាន គឺខ្ញុំនៅតែបន្ត»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...