បញ្ជី​បោះ​ឆ្នោត​ដែល​រៀបចំ​ដោយ គ.ជ.ប នា​ពេល​កន្លង​មក រង​ការ​រិះ​គន់​យ៉ាង​ខ្លាំង ពី​បញ្ហា​ឈ្មោះ​ស្ទួន និង បញ្ជី​ឈ្មោះ​ប៉ោង​ ដោយ​គណបក្ស​ប្រឆាំង​ ក៏​ដូច​ជា​សង្គម​ស៊ីវិល​មួយ​ចំនួន ដែល​ធ្វើការ​ខាង​ការ​បោះ​ឆ្នោត។ ប៉ុន្តែ​ករណី​នេះ ទំនង​ជា​មិន​ត្រូវ​បាន​គណបក្ស​ប្រជាជន​កម្ពុជា ដែល​កំពុង​កាន់​អំណាច​សព្វ​ថ្ងៃ ឈឺ​ក្បាល​វិល​មុខ​ជា​មួយ​ទេ។ ដូច​បាន​បង្ហាញ​ច្បាស់ នៅ​ក្នុង​កិច្ច​ប្រជុំ​ពិភាក្សា​លើកំណែ​ទម្រង់​នៃ​ការ​បោះ​ឆ្នោត រវាង​ក្រុម​ការងារ​មក​ពី​គណបក្ស​ទាំង​ពីរ នា​វិមាន​រដ្ឋសភា​ថ្ងៃ​ទី​២២ ខែ​ធ្នូ ឆ្នាំ​២០១៤​នេះ។

ក្នុង​កិច្ច​សម្ភាស​ជា​មួយ​អ្នក​សារព័ត៌មាន តំណាង​គណបក្ស​សង្គ្រោះ​ជាតិ លោក គួយ ប៊ុនរឿន បាន​លើក​ឡើង​ថា ក្រុម​ការងារ​បាន​ពិភាក្សា​ពី​ការ​ចុះ​ឈ្មោះ​បោះ​ឆ្នោត ដើម្បី​បង្ក​លក្ខណៈ​ងាយ​ស្រួល​ដល់​ប្រជា​ពលរដ្ឋ ក៏​ដូច​ជា​ដើម្បី​ជៀស​វាង​នូវ​បញ្ជី​ឈ្មោះ​បោះ​ឆ្នោត ដែល​មាន​ឈ្មោះ​«ស្ទួន» និង​បញ្ជី​ចុះ​ឈ្មោះ នៅ​«ប៉ោង»​ជា​ដើម។ លោក​បញ្ជាក់​ថា បញ្ជី​ឈ្មោះ​ទាំង​នោះ ត្រូវ​តែ​មាន​«តម្លា​ភាព និង​គុណភាព» ដែល​ប្រជា​ពលរដ្ឋ​អាច​ទទួល​យក​បាន និង​មិន​មាន​បាត់​ឈ្មោះ​អ្នក​បោះ​ឆ្នោត ក្នុង​បញ្ជី​ឡើយ។

តែសម្រាប់លោក ប៊ិន ឈិន តំណាងគណបក្សប្រជាជនកម្ពុជា ហាក់ដូចជាមិនចង់បង្ហាញ ពីការឯកភាព ឬ​ទទួលស្គាល់ ក្នុងការ«លប់»បំបាត់បញ្ជីឈ្មោះស្ទួន ឬ ឈ្មោះប៉ោងនោះទេ។ តែលោកបានធ្វើការបកស្រាយ​ដូច្នេះថា គ.ជ.ប ត្រូវតែធានាសិទ្ធិប្រជាពលរដ្ឋគ្រប់រូប ក្នុងបញ្ចីឈ្មោះបោះឆ្នោត និងត្រូវតែស្របតាមនីតិវីធី ដែលកំណត់ដោយច្បាប់បោះឆ្នោត និងច្បាប់ផ្សេងទៀត។ លោកបញ្ជាក់ថា ដើម្បីចុះឈ្មោះបោះឆ្នោតបាន ប្រជាពលរដ្ឋត្រូវមានត្រូវការបញ្ជាក់ ភេទ នាមត្រកូល ថ្ងៃខែឆ្នាំកំណើត និងលំនៅដ្ឋាន ឬទីសំណាក់​សម្រាប់​ម្មករ កម្មការិនី។ ត្រូវកំណត់អត្តសញ្ញាណប្រជាពលរដ្ឋ ដើម្បីការពារ កុំឲ្យមានឈ្មោះស្ទួនក្នុង ឬឈ្មោះជាន់គ្នា ដូចគ្នាក្នុងបញ្ជីឈ្មោះបោះឆ្នោត។

ក្រុមការងារមកពីគណបក្សទាំងពីរ ហាក់ដូចជាមិនបានឯកភាពគ្នា ពីការរៀបចំបញ្ជីឈ្មោះអ្នកបោះឆ្នោត«ថ្មី» ថាតើត្រូវធ្វើបញ្ជីថ្មី ឬក៏យកបញ្ជីបោះឆ្នោតចាស់ យកមកកែសម្រួលថ្មី ក្នុងការប្រើប្រាស់បន្តឬយ៉ាងណា​ឡើយ។ តំណាងគណបក្សទាំងពីរ គ្រាន់តែបានអួតអាង ថាពួកខ្លួនកំពុងខិតទៅជិតភាពត្រូវគ្នា លើចំណុច​ឈ្មោះស្ទួន និងការបាត់ឈ្មោះ អ្នកបោះឆ្នោតពីបញ្ជីបោះឆ្នោតថ្មីនោះ។

ទាំងគ.ជ.ប«ថ្មី» ទាំងបញ្ជីឈ្មោះ«ថ្មី» ត្រូវបានក្រុមការងារឯកភាពគ្នា ក្នុងការស្វែងរកពីធីគ្រប់គ្រងជាថ្មី។ ការ​ឯកភាពនេះ ក៏នៅមិនទាន់បង្ហាញពីភាពត្រូវគ្នា លើការប្រើប្រាស់នូវ រូបថត ការផ្តិតស្នាមម្រាមដៃ ឬលេខកូដ ដើម្បីជៀសវាងអ្នកបោះឆ្នោតម្នាក់ មានឈ្មោះបោះឆ្នោតច្រើន និងបោះលើសពីមួយនោះដែរ។ ហើយ​ក្រុម​ការងារទាំងពីរ នឹងបន្តជួបគ្នាទៀតនារសៀលថ្ងៃទី២៦ ខែធ្នូ ឆ្នាំ២០១៤ ខាងមុខ។

ព័ត៌មានលំអិតពីករណីនេះ សូមទស្សានា នូវកិច្ចសម្ភាស នៃតំណាងគណបក្សទាំងពីរដូចខាងក្រោម៖

(វីដេអូមកដល់ក្នុងពេលបន្តិចទៀត)