ប្រសិនជាលោក ហ៊ុន សែន នាយករដ្ឋមន្ត្រី បីទសវត្សន៍ជាង របស់ប្រទេសកម្ពុជា បានជ្រើសរើសភាសា«អាម៉ឹង» ដើម្បីទាត់ចោល លទ្ធភាពណាមួយ ដែលឈានទៅដល់ការចរចា ដើម្បីស្វែងរកដំណោះស្រាយ សម្រាប់វិបត្តិនយោបាយនោះ មេដឹកនាំប្រឆាំង លោក សម រង្ស៊ី ឯណោះវិញ បានឆ្លើយតបមកវិញ ដោយប្រើភាសា​«ស្ងប់ស្ងៀម»។

ប្រតិកម្មតបភ្លាមៗ របស់លោក សម រង្ស៊ី ត្រូវបានធ្វើឡើង នៅលើបណ្ដាញសង្គមទ្វីសធើរ មានសេចក្ដីថា៖ «បើលោក ហ៊ុន សែន មិនចង់និយាយជាមួយ សម រង្ស៊ី ទេ លោក ហ៊ុន សែន នៅតែអាចនិយាយ ជាមួយលោក កឹម សុខា - លោក អេង ឆៃអ៊ាង - អ្នកស្រី មូរ សុខហួ ជាមួយសង្គមស៊ីវិល ឬអ្នកសារព័ត៌មានបាន»។

លោកនាយករដ្ឋមន្ត្រី ហ៊ុន សែន បានប្រកាសបិទផ្លូវចរចា ជាមួយលោក សម រង្ស៊ី នៅក្នុងការថ្លែងមួយ កាលពីព្រឹកម៉ិញ នៅចំពោះ​និស្សិត​ទទួល​សញ្ញាប័ត្រ​ច្រើន​រយ​នាក់ នៃសាកលវិទ្យាល័យមួយ។ បុរសខ្លាំងកម្ពុជា បានលើកឡើងពីទិដ្ឋភាពចំនួនពីរ មកធ្វើជាអំណះអំណាង ក្នុងនោះមានទិដ្ឋភាពច្បាប់ និងមូលហេតុផ្ទាល់ខ្លួន​របស់​លោក។

លោក ហ៊ុន សែន ថ្លែងពន្យល់ថា៖ «ខ្ញុំនិយាយពីទិដ្ឋភាពផ្លូវច្បាប់ ខ្ញុំគ្មានលទ្ធភាពចរចា។ ច្បាប់លើកលែងសិទ្ធិធ្វើនយោបាយ ចំនួន១១៨នាក់ វាមិនដែលមាន។ មានតែច្បាប់លើកលែងទោស ដល់អ្នកដែលតុលាការ បានកាត់ទោសរួចហើយ តែគ្មានច្បាប់លើកលែងទោស ឲ្យអ្នកកាត់សិទ្ធិធ្វើនយោបាយនោះទេ ។»។

នាយករដ្ឋមន្ត្រីកម្ពុជា បានបន្តថា៖ «អ្នកឯងដុតរូបខ្ញុំ ហើយមកចង់ចរចា! អ្នកឯងប្រមាថប្រពន្ធកូនខ្ញុំ។ លោកឯងប្រមាថ ប្រពន្ធខ្ញុំ ! លោកឯង ប្រមាថកូនខ្ញុំ! ចោទប្រពន្ធនិងកូនប្រុសរបស់ខ្ញុំ ជាប្រពន្ធនិងកូនប្រុស របស់មេដឹកនាំវៀតណាម។ តើអ្នកឯងដោះស្រាយយ៉ាងម៉េច រឿងហ្នឹង? ឥឡូវនេះអ្នកឯងបន្តថា កងទ័ពកំពុងប្រឆាំងហ៊ុន សែន។ ឥឡូវនេះកងទ័ពក៏ប្រឆាំង មន្រ្តីរាជការក៏ប្រឆាំង មិនបាច់ចរចាទេ។»។

ប៉ុន្តែលោក សម រង្ស៊ី ដៃគូបដិបក្ខនយោបាយ ដ៏ស្រួចស្រាវ របស់នាយករដ្ឋមន្ត្រីកម្ពុជា បានបន្តសរសេរ តបទៅវិញថា៖ «ប្រសិនបើគាត់ [លោក ហ៊ុន សែន] មិនពេញចិត្តជាមួយ សម រង្ស៊ី ទេ គាត់នៅតែអាចអនុវត្តវប្បធម៌សន្ទនាពិតប្រាកដ ជាមួយនឹងជនជាតិខ្មែរជាច្រើនទៀត ដែលស្រឡាញ់ជាតិ ចង់បានលទ្ធិប្រជាធិបតេយ្យ និងវិបុលភាព»៕