នាយទាហានសម្រេចចិត្តចង ក ព្រោះផ្ទុកអេដស៍ជាង១០ឆ្នាំ
- ដោយ: ក. វិច្ចនី អត្ថបទ៖ ក. វិច្ចនី ([email protected]) - យកការណ៍៖ ហេង វិទ្ធី - ភ្នំពេញ ថ្ងៃទី ០៦ ធ្នូ ២០១៤
- កែប្រែចុងក្រោយ: December 06, 2014
- ប្រធានបទ: អត្តឃាត
- អត្ថបទ: មានបញ្ហា?
- មតិ-យោបល់
-
បុរសដែលមានអាជីពជានាយទាហានជើងទឹកមួយរូប បានធ្វើអត្តឃាតដោយចងក កាលពីយប់ថ្ងៃទី០៥ ចូលមកថ្ងៃទី០៦ ខែធ្នូ នៅក្នុងបន្ទប់ជួល នៃផ្ទះសំណាក់មួយឈ្មោះ មិត្តភាព ស្ថិតនៅសង្កាត់ផ្សារដើមគរ ខ័ណ្ឌទួលគោក រាជធានីភ្នំពេញ។ បុរសដែលបានគិតខ្លីនេះ ឈ្មោះ រ័ត្ន សត្យា អាយុ ៣៩ឆ្នាំ រស់នៅភូមិ ដុំរទេះ ឃុំជាំសង្កែ ស្រុកភ្នំស្រួច ខេត្តកំពង់ស្ពឺ។
បើតាមសម្តីរបស់ស្ត្រីម្ចាស់ផ្ទះសំណាក់ បានឲ្យដឹងថា បុរសខាងលើនេះ បានមកជួលផ្ទះសំណាក់របស់អ្នកស្រី កាលពីវេលាម៉ោង ៦:៣០នាទីល្ងាច ថ្ងៃទី ០៥ ខែធ្នូកន្លងមក។ ហើយការធ្វើអត្តឃាតនេះ បុគ្គលិករបស់អ្នកស្រី មិនបានដឹងនោះទេ។ ប៉ុន្តែបន្ទាប់ពីបានទូរស័ព្ទមកប្អូនប្រុស ជានាយទាហានរូបនេះ ហើយគ្មាននរណាលើក ស្ត្រីជាបងបានប្រញាប់ប្រញាលមករកប្អូនជាបន្ទាន់។ នៅពេលមកដល់បន្ទប់ បងស្រីរូបនោះ ស្រាប់តែបានប្រទះឃើញដោយក្ដីរន្ធត់ថា ប្អូនរបស់គាត់បានចងកធ្វើអត្តឃាត ស្លាប់បាត់ទៅហើយ។
ម្ចាស់ផ្ទះសំណាក់ បានបន្តទៀតថា ប្រសិនបើបងស្រីសាកសព មិនមករកប្អូនប្រុសទេ ទាល់តែប្រហែលជាម៉ោង ១២:០០ថ្ងៃត្រង់ ទើបអាចដឹងពីហេតុការណ៍ នៃករណីអត្តឃាតនេះ ដោយហេតុថាក្រុមបុគ្គលិករបស់អ្នកស្រី នឹងដើរដាស់ភ្ញៀវ នៅពេលនោះ។
ស្ត្រីជាម្តាយរបស់សាកសព បានប្រាប់ទស្សនាវដ្តីមនោរម្យ.អាំងហ្វូថា កូនរបស់គាត់ បានផ្ទុកមេរោគអេដស៍ក្នុងខ្លួន តាំងពីជាង ១០ ឆ្នាំមកហើយ។ អ្នកស្រីបានថ្លែងទាំងក្ដុកក្ដួល ឲ្យទស្សនាវដ្ដីដឹងទៀតថា អ្នកស្រីមិននឹកស្មានថា រ័ត្ន សត្យា ហ៊ានគិតខ្លី ធ្វើដល់ថ្នាក់ណ្នឹងទេ។
ចំណែកឯសមត្ថកិច្ចសង្កាត់ផ្សារដើមគរ បានបញ្ជាក់ឲ្យដឹងដែរថា ការស្លាប់បុរសជានាយទាហានជើងទឹកនេះ មិនមានពាក់ព័ន្ធនឹងអ្នកណាម្នាក់ឡើយ។ ក្រុមសមត្ថកិច្ចបានធ្វើការសន្និដ្ឋានថា រ័ត្ន សត្យា បានសម្លាប់ខ្លួន ដោយក្រុមអ្នកអង្កេត បានរកឃើញនៅត្រង់គូទរបស់សាកសព មានដំបៅជាច្រើន ហើយមានឃើញហូរខ្ទុះ ចេញមកក្រៅថែមទៀត។ រីឯរូបរាងរបស់សាកសពវិញ ក៏មានសភាពស្គមស្គាំងអស់ទៅហើយដែរ៕