តើព្រះយេស៊ូគ្រឹស្ទ៍ ពិត​ជា​មាន​កូន​ស្នង​ត្រកូល​មែន​ឬ? គ្មាន​អ្នក​កាន់​សាសនា​គ្រឹស្ទ៍​ណា​ម្នាក់ នឹក​គិត​ទៅ​ដល់​រឿង​នេះ​សូម្បី​បន្តិច​ឡើយ។ តែ​គេ​អាច​រក​ចម្លើយ ដែល​ទាក់​ទង​នឹង​សំនួរ​ដ៏​ពិបាក​នេះ​បាន បន្ទាប់​ពី​គុម្ពី​ដ៏​ចំណាស់​មួយ ត្រូវ​បាន​គាស់​ចេញ​មក​បង្ហាញ​ជូន នៅ​ក្នុង​បណ្ណាល័យ British Library នា​រាជធានី​ឡុងដ៍ ចក្រភព​អង់គ្លេស។ គុម្ពី​ដ៏​ចំណាស់​ជាង​គេ​នោះ បាន​សរសេរ​ចារ​ទុក​មក​ថា ព្រះ​យេស៊ូ គ្រឹស្ទ៍ មាន​កូន​ពីរ​នាក់។

បើតាមទស្សនាវដ្ដី Sunday Times បាន​រាយការណ៍​ថា សាស្ត្រាចារ្យ​ជំនាញ ខាង​ការ​ស្រាវ​ជ្រាវ​ផ្នែក​សាសនា​មួយ​រូប លោក បារី វីលសុន (Barrie Wilson) មក​ពី​សកល​វិទ្យាល័យ York de Toronto នៃ​ប្រទេស​កាណាដា និង​អ្នក​និពន្ធ លោក ស៊ីមឆា ចាកូបូវីក (Simcha Jacobovic) បាន​ធ្វើការ​បក​ប្រែ​គុម្ពី​នោះ ចេញ​ពី​ភាសា​ដើម អារ៉ាម៉េន ហើយ​បាន​រក​ឃើញ ពី​ការ​បក​ស្រាយ​នេះ។ អ្នក​ទាំង​ពីរ​បាន​យក​របក​គំហើញ​នេះ មក​សរសេរ​បោះពុម្ភ​ផ្សាយ នៅ​ក្នុង​សៀវភៅ​មួយ មាន​ចំណង​ជើង​ជា​ភាសា​អង់គ្លេស​ថា The Lost Gospel ហើយ​ទើប​នឹង​ត្រូវ​បាន​ចេញ​មក​លក់ កាល​ពី​ថ្ងៃ​ទី១១ ខែ​វិច្ឆិកា​មុន។

សម្រាប់អ្នកនិពន្ធទាំងពីររូប គុម្ពីចារិកមិនត្រឹមបានបញ្ជាក់ថា ព្រះគ្រឹស្ទ៍មានបុត្រពីរនាក់ ជាមួយនឹងស្ត្រី​សាវ័ក នាងម៉ារី ម៉ាឌឺឡែន ប៉ុណ្ណោះទេ តែព្រះយេស៊ូ ថែមទាំងបានរៀបការជាមួយ ស្ត្រីផ្កាមាសរូបនេះ ដែលត្រូវបាន​គុម្ពី Evangile selon Luc ចាត់ទុកជា«ស្ត្រីពោរពេញដោយអំពើបាប» នោះទៀត។ ទស្សនាវដ្ដី បានដកស្រង់​បំណែកខ្លះនៃសៀវភៅមកអះអាងថា គុម្ពីចំណាស់ជាង១៥០០ឆ្នាំនោះ បានផ្ដល់នូវនិមិត្តរូបយ៉ាងសំខាន់ ទៅ​ឲ្យ​ស្ត្រីសារ័ក ដែលគេមិនសូវ​នឹកនាដល់ និងបានសរសេរបញ្ជាក់បន្ថែមថា ស្ត្រីសាវ័ក ម៉ារី ម៉ាឌឺឡេន និងកូន​ទាំងពីរ ធ្លាប់រងនូវគម្រោងការ«លួចធ្វើឃាត»។

តាមពិតទៅ សៀវភៅ The Lost Gospel ដែលសរសេរដោយអ្នកនិពន្ធទាំងពីររូបខាងលើ មិនមែនជាស្នាដៃ​លើក​ដំបូង ដែលបង្ហាញថា ព្រះយេស៊ូគ្រឹស្ទ៍ មានគ្រួសារមានប្រពន្ធមានកូន នោះទេ។ សារព័ត៌មានរបស់​អង់គ្លេសមួយ ឈ្មោះ The Independent បានរំលឹកឡើងវិញមកវិញថា នៅឆ្នាំ១៩៥៣ អ្នកនិពន្ធ នីកូស កាហ្សានហ្សាគីស (Nikos Kazantzakis) ក៏បានបញ្ចេញស្នាដៃមួយរបស់ខ្លួន មានចំណងជើងថា «បំណង​ចុង​ក្រោយរបស់ព្រះគ្រឹស្ទ៍» ហើយក៏បានបញ្ជាក់ថា ព្រះជាម្ចាស់អង្គនេះ មានបុត្រមួយអង្គដែរ។ ស្នាដៃជា​សៀវភៅ​នោះ ត្រូវបានសមិទ្ធិករភាពយន្ដមួយរូប យកមកថតជាភាពយន្ដនោះផងទៀត។

យ៉ាងណាក៏ដោយ ក៏ការអះអាងថា ព្រះយេស៊ូមានប្រពន្ធនេះ ត្រូវបានអ្នកស្រាវជ្រាវផ្សេងជាច្រើន បដិសេធ ដោយនិយាយថា អ្វីដែលសរសេរនៅក្នុងគុម្ពីទើបនឹងត្រូវបានរកឃើញ គ្រាន់ជាការបណ្ដុះបង្អាប់ព្រះគ្រឹស្ទ៍ និងសាសនារបស់ព្រះអង្គ ដោយក្រុមមួយ ដែលមិនពេញចិត្តនឹងព្រះអង្គ ក្នុងសម័យកាលនោះប៉ុណ្ណោះ៕