អាគារកំពស់១គីឡូម៉ែត្រ ខ្ពស់ជាងគេនៅលើពិភពលោក ចាប់ផ្ដើមសង់
ដុំថ្មទីមួយ ត្រូវបានគេបោះចូលទៅក្នុងរណ្ដៅជានិមិត្តរូប នៃការចាប់ផ្ដើមសាងសង់ អាគារដែលខ្ពស់ជាងគេក្នុងពិភពលោក កាលពីថ្ងៃអាទិត្យទី២៧ ខែមេសានេះ នៅទីក្រុង ជេរដា (Djeddah) ប្រទេសអារ៉ាប៊ីសាអូឌី។ អាគារដែលមានកំពស់មួយគីឡូមែត្រនេះ នឹងត្រូវសាងសង់រួចជាស្ថាពរ នៅឆ្នាំ២០១៨ខាងមុខ ជាមួយនឹងការចំណាយសាងសង់ប្រមាណជា ១,២ពាន់លានដុល្លារ។
រូបតាំងបង្ហាញ ពីអាគារ ឃីងដូម ថោវ័រ ដែលមានកំពស់១គ.ម។
ស្ថាបត្យកម្ម - អាគារ ឃីងដូម ថោវ័រ (Kingdom Tower) នឹងក្លាយជាអាគារថ្មីមួយ ដែលខ្ពស់ជាងគេបង្អស់ នៅក្នុងពិភពលោក ហើយបានបំបែកឯកត្កកម្មនៃអាគារ ប៊ួរ ខាលីហ្វា (Burj Khalifa) ដែលមកដល់ពេលនេះ ជាប់ឈ្មោះថាមានកំពស់ខ្ពស់ជាងអាគារណាៗទាំងអស់។ ការដ្ឋានសាងសង់អាគារ ដែលមានកំពស់ដល់ទៅមួយគីឡូម៉ែត្រនេះ បានចាប់ផ្ដើមដំណើរការពីថ្ងៃអាទិត្យទី២៧ ខែមេសានេះទៅ នៅក្នុងទីក្រុងឆ្នេរសមុទ្រ ជេរដា (Djeddah) នៃប្រទេសអារ៉ាប៊ីសាអ៊ូឌីត។
អាគារ ឃីងដូម ថោវ័រ មានកំពស់១៧៣ម៉ែត្រ ខ្ពស់លើស អាគារ ប៊ួរ ខាលីហ្វា ដែលមានកំពស់តែ ៨២៧ ម៉ែត្រ និងត្រូវបានសង់ហើយជាស្ថាពរកាលពីឆ្នាំ២០១០កន្លងទៅ នៅក្នុងប្រទេសអារ៉ាប់រួម។ ដូច្នេះបើយោងទៅលើឆ្នាំ ដែលអាគារ ប៊ួរ ខាលីហ្វា សាងសង់រួច វានឹងធ្វើឲ្យអាគារទំនើបរបស់ប្រទេសអារ៉ាប់មួយនេះ អាចរក្សាតំណែងជាអាគារខ្ពស់ជាងគេក្នុងពិភពលោក យ៉ាងហោចណាស់ក៏បានរយៈពេល៨ឆ្នាំដែរ ដោយសារតែអាគារ ឃីងដូម ថោវ័រ ថ្មី ត្រូវបានគេគ្រោងថា នឹងសង់ហើយជាស្ថាពរ នៅឆ្នាំ២០១៨ខាងមុខនោះ ។
ការចំណាយសរុប ទៅលើការសាងសង់អាគារដ៏ទំនើបនេះ ត្រូវបានបញ្ចេញឲ្យដឹងថា មានចំនួនដល់ទៅ១,២ពាន់លានដុល្លារ។ វាត្រូវបានសង់នៅលើផ្ទៃដី ប្រមាណជា ៥៣០ពាន់ម៉ែត្រការ៉េ ប៉ុន្តែសំណង់អាគារឡើងទៅលើនឹងមានរាងកាន់តែស្ដួចទៅៗ។ សំណង់អាគារទំនើបថ្មីនេះទាំងមូល តម្រូវឲ្យមានការប្រើប្រាស់បេតុង ចំណុះមិនតិចជាងកន្លះលានម៉ែត្រគូប និងដែកចំរឹងយ៉ាងហោចក៏មានទម្ងន់សរុប ៨០ពាន់តោនដែរ។
នៅជាន់ទី១៥៧ (ពីក្នុងចំណោម២១០ជាន់នៃអាគារទាំងមូល) គម្រោងប្លង់អាគារ បានដាក់ឲ្យមានលៀនចេញ នូវទីលានលយមកខាងក្រៅមួយ ដែលមានអង្កតផ្ចិតទំហំ៣០ម៉ែត្រ (មើលរូបថត)។ រីឯទោងយន្ដឡើងចុះជាច្រើន ដែលនឹងបំពាក់ឲ្យអាគារកំពស់មួយគីឡូម៉ែត្រនេះ នឹងមានល្បឿនរត់ ១០ម៉ែត្រក្នុងមួយវិនាទី។ ល្បឿនទោងយន្ដ ដ៏លឿននេះ មើលទៅទំនងជាមិនមែនធ្វើ សម្រាប់អ្នកមានជំងឺបេះដូងខ្សោយ ឬអ្នកមានបញ្ហាផឺតពោះនោះទេ។
ផ្ដល់ហិរញ្ញវត្ថុ ដោយក្រុមហ៊ុនរបស់ព្រះអង្គម្ចាស់មានលុយរាប់លានមួយអង្គ អាគារនេះត្រូវបានសង់ឡើងនៅក្នុងគម្រោងអភិវឌ្ឍន៍ដ៏ធំមួយ របស់ទីក្រុងជេរដា ឈ្មោះហៅថា ឃីងដូម ស៊ីធី (Kingdom City) ដែលត្រូវចំណាយប្រាក់ដើម្បីអភិវឌ្ឍតំបន់នេះ ប្រមាណជា ២០ពាន់លានដុល្លារ។ តំបន់អភិវឌ្ឍន៍នេះ ត្រូវបានគេថ្លែងឲ្យដឹងថា នៅក្នុងបំណងធ្វើជាមជ្ឈមណ្ឌលពាណិជ្ជកម្ម និងជាតំបន់ទាក់ទាញទេសចរណ៍មួយយ៉ាងធំរបស់ប្រទេស៕
សូមទស្សនារូបភាព៖
---------------------------------------------
ដោយ ដ. កែវ (ទំនាក់ទំនង៖ [email protected]) - ភ្នំពេញ ថ្ងៃទី២៦ មេសា ២០១៤