នៅពេលដែល«វាយតប់»ខ្លាំងៗ ទៅលើបន្ទប់បើកបររបស់យន្ដហោះ បុរសជាតិអូស្ត្រាលីអាយុ២៨ឆ្នាំ បានបង្ក​ឲ្យ​មានការច្រួលច្របល់កើតឡើង នៅលើយន្ដហោះដែលកំពុងហោះហើរ។ ទង្វើរបស់បុរសនេះ បានបង្ខំឲ្យអ្នកបើកបរ​យន្ដហោះប្រកាសអាសន្នមកផែនដី ពីការ«ចាប់ពង្រត់»មួយ និងធ្វើការចុះចតជាបន្ទាន់។ ប៉ុន្តែបន្ទាប់ពីត្រូវ​បាននាំ​ខ្លួនយកទៅសាកសួរក្រោយមក បុរសដែលធ្វើឲ្យគេគិតថា គាត់ជាមនុស្សប្រមឹកនោះ បាននិយាយថា គាត់គ្រាន់តែ​ច្រឡំបន្ទប់អ្នកបើកបរ ទៅនឹង ...«បង្គន់»នៅលើយន្ដហោះប៉ុណ្ណោះ។

យន្ដហោះវៀជីនអូស្ត្រាលៀ ដែលត្រូវបង្ខំចិត្តចុះចតជាបន្ទាន់។ (រូបថត Getty Images)

គ្រោះថ្នាក់យន្ដហោះ - ការភ្ញាក់ផ្អើល និងការភិតភ័យច្របូលច្របល់ បានកើតមានឡើងនៅព្រឹកថ្ងៃសុក្រ បន្ទាប់​ពី​យន្ដហោះ របស់ក្រុមហ៊ុនអាកាសចរណ៍ វៀជីន អូស្ត្រាលៀ (Virgin Australia)  ភ្ជាប់ជើងហោះហើរ VA41 ពីទីក្រុង ប្រាយស្បេន (Brisbane) ប្រទេសអូស្ត្រាលី  ឆ្ពោះមកកាន់ទីក្រុង បាលី ប្រទេសឥណ្ឌូនេស៊ី ហើយបានជួប​ហេតុ​ការណ៍ដ៏មិនគួរឲ្យជឿបាននេះ។ បន្ទាប់ពីបោះហើរបានជាង២ម៉ោង បុរសជាតិអូស្ត្រាលីអាយុ២៨ឆ្នាំមួយរូប ដែល​បានធ្វើដំណើរចេញពីអូស្ត្រាលី បានវាយតប់ទៅលើទ្វានៃបន្ទប់បើកបររបស់យន្ដហោះប៊ូអីង ៧៣៧ ខ្លាំងៗ ទំនង​ជាមានបំណងចង់ចូល ទៅទន្ទ្រាននៅក្នុងទីនោះ។

អ្នកនាំពាក្យក្រុមហ៊ុនយន្ដហោះ វៀជីន អូស្ត្រាលៀ ប្រចាំនៅព្រលានយន្ដហោះ ដេនប៉ាសារ (Denpasar) លោក ហេរូ សូច្យាមីកូ (Heru Sudjatmiko) បានពន្យល់ថា «គឺជាមនុស្សប្រមឹកម្នាក់។ ដោយសារបុរសនេះ ទទួលទាន​ស្រាច្រើន​ពេក បានធ្វើឲ្យគាត់ប្រព្រឹត្តិសកម្មភាពជ្រុលជ្រួសទាំងនេះ។»

ប្រកាសព័ត៌មានខុសគ្នា ...

បន្ទាប់ពីឃាត់បុរសនេះលែងបាន ក្រុមអ្នកបម្រើការនៅលើយន្ដហោះ បានបង្ក្រាបបុរសដោយយកទៅទុកក្នុងបន្ទប់​ខាងក្រោយបង្អស់នៃយន្ដហោះ។ រីឯ​អាកាស​យានិក ក៏សម្រេចប្រកាសភាពអាសន្នមកផែនដី ចាត់ទុកនេះជា​បំណងនៃការចាប់ពង្រត់មួយ។ នគរបាលដែនអាកាសឥណ្ឌូនេស៊ី បានថ្លែងបញ្ជាក់ថាខ្លួន បានទទួលដំណឹងពី​ការ​ចាប់ពង្រត់នេះ ខុសផ្ទុយពីក្រុមហ៊ុនអាកាសចរណ៍ ដែលបានចេញមកបដិសេធថា សញ្ញាអាសន្ននេះ កើតឡើង​ដោយសារតែ អ្នកដំណើរ«ប្រមឹក»រូបនោះ បានវាយខ្លាំងៗ ទៅលើទ្វាបន្ទប់បើកបររបស់យន្ដហោះ។

ក្រុមហ៊ុន វៀជីន អូស្ត្រាលៀ បានសរសេរថា «ព័ត៌មានដែលនិយាយថា យន្ដហោះត្រូវបានចាប់ពង្រត់នោះ មិនត្រឹម​ត្រូវទេ»។

បុរសនោះមានបញ្ហាផ្លូវចិត្ត ដោយសារបាត់ប្រពន្ធ

នៅថ្ងៃសៅរ៍ទី២៦ ខែមេសានេះ នគរបាលឥណ្ឌូនេស៊ី បានថ្លែងប្រកាសថាអ្នកដំណើរអាយុ២៨ឆ្នាំរូបនោះ មិនបាន​ប្រព្រឹត្តិក្រោមឥទ្ធិពលរបស់សុរាទេ។ ប៉ុន្តែបុរសនេះ បានឆ្លើយប្រាប់នគរបាលថា ខ្លួនបានលេបថ្នាំបំបាត់​ការ​ចុក​ចាប់​ចំនួន៦គ្រាប់ ហើយបានផឹកកូកាកូឡា ចំនួន២កំប៉ុង។

បុរសអាយុ២៨ឆ្នាំមានឈ្មោះថា ម៉ាត គ្រីស្ដូហ្វើ ឡុកឡី (Matt Christopher Lockley) បានពន្យល់ប្រាប់នគរបាលថា ខ្លួនមានបញ្ហាផ្លូវចិត្ត ដោយសារប្រពន្ធជាតិ៌ណ្ឌូនេស៊ីរបស់បុរសនេះ បានបាត់ខ្លួន។ បុរសបានធ្វើដំណើរមក​ប្រទេស​ឥណ្ឌូនេស៊ី ដើម្បីតាមស្វែងរកប្រពន្ធដែលចាកចោល មិនឲ្យដំណឹងតាំងពី២សប្ដាហ៍មកហើយ។ បុរសបានបន្ត​ទៀត​ថា ខ្លួនមានអារម្មណ៍ដូចត្រូវបាននរណាម្នាក់ តាមដានពីក្រោយ ហើយចង់លួចកាបូបរបស់ខ្លួន។

បុរសនេះត្រូវបានឃាត់ខ្លួនភ្លាម បន្ទាប់ពីយន្ដហោះបានចុះចតជាបន្ទាន់ នៅព្រលានយន្ដហោះនៃទីក្រុង ដេនប៉ាសារ (Denpasar - ផ្នែកអាគ្នេយ៍នៃទីក្រុងបាលី) ហើយបច្ចុប្បន្ននេះ កំពុងសម្រាកព្យាបាលនៅក្នុងមន្ទីរពេទ្យ ដោយមក​ពី​ការអស់កម្លាំង។ ប៉ុន្តែនៅប្រទេសឥណ្ឌូនេស៊ី សកម្មភាពរបស់បុរសជាតិអូស្ត្រាលីនេះ អាចនឹងត្រូវផ្ដន្ទាទោស​ឲ្យ​ជាប់​ទោសរហូតដល់២ឆ្នាំក្នុងពន្ធនាគារ និងពិន័យជាប្រាក់ប្រមាណជា ៤៣ពាន់ដុល្លារ៕

-----------------------------------------------