រ៉ុង ឈុន៖ បង្គោលព្រំដែនវៀតណាម-កម្ពុជា បោះចូលដីខ្មែរ
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ១៩ វិច្ឆកា ២០១៤
- កែប្រែចុងក្រោយ: November 19, 2014
- ប្រធានបទ: ព្រំដែន
- អត្ថបទ: មានបញ្ហា?
- មតិ-យោបល់
-
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា និងតំណាងសមាជិក ក្រុមប្រឹក្សាឃ្លាំមើលកម្ពុជាជាង ១០នាក់ផ្សេងទៀត បានធ្វើសន្និសីទកាសែតមួយ ដើម្បីចេញលិខិតចំហរស្នើរសុំឲ្យរដ្ឋាភិបាល លុបចោលសន្ធិសញ្ញាព្រំដែនបំពេញបន្ថែមឆ្នាំ ២០០៥ដែលការលុបចោលនេះវាអាចធានាបាននូវអធិបតេយ្យភាព ឯករាជ្យ បូរណភាព និងមិនអាចរំលោភបាននៃដែនដីអព្យាក្រឹតភាព និងឯកភាពជាតិ។
លោក រ៉ុង ឈុន បានថ្លែងនៅក្នុងសន្និសីទព្រឹកម៉ិញនេះថា តាមការចុះកម្មសិក្សារបស់លោក បានមើលឃើញថាវៀតណាម បានបោះបង្គោលព្រំដែន ចូលទឹកដីកម្ពុជាជាច្រើនកន្លែង នៅក្នុងឃុំថ្នាធ្នង់ ស្រុករំដួល ខេត្តស្វាយរៀង។ បង្គោលព្រំដែន ដែលវៀតណាមបានបោះចូលនីមួយៗ មានរហូតដល់ ១០០ម៉ែត្រទៅ ៥០០ម៉ែត្រឯនោះ។
លោកបានបន្ថែមទៀតថា ការបោះបង្គោលចូលនេះ វាខុសពីអ្វីដែលលោក ហ៊ុន សែន បានលើកឡើងថា មិនលើសមួយមីលីម៉ែត្រទេ ក្នុងការបោះបង្គោលព្រុំដែននោះ។ ប៉ុន្តែធាតុពិត តាមរយៈការចុះកម្មសិក្សារបស់លោក និងយុវជនបានរកឃើញថា មានការបោះបង្គោលចូលទឹកដីកម្ពុជាពិតប្រាកដមែន។ លោកក៍បានបញ្ជាក់ដែរថា ការចុះទៅមើលបង្គោលព្រុំដែននេះ ក្រុមលោកមិនបានប្រើប្រាស់ឧបករណ៍វិទ្យសាស្ត្រ ទៅវាស់វែងនោះទេ ប៉ុន្តែលោកបានចុះទៅមើលទីតាំងភូមិសាស្ត្រ និងសាក្សីរស់នៅទីនោះ។
ការបោះបង្គោលចូលនេះ មិនត្រឹមតែបោះចូល តែនៅក្នុងខេត្តស្វាយរៀងប៉ុណ្ណោះទេ សូម្បីតែខេត្តកំពង់ចាម (បច្ចុប្បន្នជាខេត្តត្បូងឃ្មុំ) ដែលជាខេត្តកំណើតរបស់ លោក ហេង សំរិន ក៍វៀតណាមលួចបោះបង្គោល រំលោភយកពីរភូមិបាត់ទៅហើយដែរ។
ប្រទេសវៀតណាមបានបោះបង្គោលព្រុំដែនភាគច្រើន ចូលក្នុងទឹកដីខ្មែរ ពីតំបន់មួយទៅតំបន់មួយ ហើយតែងតែគំរាមកំហែង និងរំលោភយកដីស្រែចំការ របស់ប្រជាពលរដ្ឋខ្មែរជាបន្តបន្ទាប់ នេះបើយោតាមការចេញលិខិតចំហរ របស់ក្រុមប្រឹក្សាឃ្លាំមើលកម្ពុជា កាលពីថ្ងៃទី ១៩ ខែវិច្ឆិកាព្រឹកម៉ិញនេះ៕