អាជ្ញាធរ​រង​ការ​រិះគន់ ថា​លូក​ដៃ​ក្នុង​រឿង​ព្រះ​សង្ឃ​ពីរ​អង្គ នៅ​វត្ត​នាគ​វ័ន (vdo)

ជំលោះរវាងព្រះសង្ឃ កែវ សុម៉ាលី នឹងព្រះសង្ឃ ឡុង ឆេងហ៊ី នៅក្នុងវត្តនាគវ័ន ដែលស្ថិតនៅខណ្ឌទួលគោក រាជធានី​ភ្នំពេញ បានរងការរិះគន់ថា ត្រូវបានសមត្ថកិច្ចលូកដៃចូល ហើយព្រមានចង់ចាប់ខ្លួនព្រះសង្ឃផងទៀត។
ព្រះសង្ឃ កែវ សុម៉ាលី (ខាងឆ្វេង) និងព្រះសង្ឃ ឡុង ឆេងហ៊ី។ (រូបថតហ្វេសប៊ុក)
Loading...
  • ដោយ: ក. សោភណ្ឌ ដោយ ក. សោភ័ណ្ឌ (ទាក់ទង៖ [email protected]) - ភ្នំពេញ ថ្ងៃទី១៥ វិច្ឆិកា ២០១៤
  • កែប្រែចុងក្រោយ: November 16, 2014
  • ប្រធានបទ: ជម្លោះសង្ឃ
  • អត្ថបទ: មានបញ្ហា?
  • មតិ-យោបល់

នៅក្នុងកិច្ចប្រជុំជាមួយមន្រ្តីសង្ឃផ្សេងទៀត ថ្នាក់​ដឹក​នាំ​សង្ឃ​នៃ​វត្ត​នាគ​វ័ន បាន​សម្រេច​ដក​មេ​កុដិ​លេខ​៦ ចេញ​ពី​ដំណែង រួច​បណ្តេញ​ព្រះ​សង្ឃ​អង្គ​នោះ​ចេញ​ពី​វត្ត និង​ថែម​ទាំង​ប្រគល់​រឿង​នេះ ឲ្យ​ទៅ​អាជ្ញាធរ​ជា​អ្នក​ដោះ​ស្រាយ​ទៀត។ នេះ​ជា​ការ​លើក​ឡើង របស់​ព្រះ​សង្ឃ កែវ សុម៉ាលី នៅ​ក្នុង​សំនុំ​រឿង​មួយ​ដ៏​ចម្រូង​ចម្រាស នៃ​ជម្លោះ​រវាង​ព្រះ​សង្ឃ​អង្គ​ឯង និង​ព្រះ​សង្ឃ​មួយ​អង្គ​ទៀត ព្រះ​នាម ឡុង ឆេងហ៊ី ស្នាក់​នៅ​ក្នុង​វត្ត​តែ​មួយ​ដូច​គ្នា។

ហេតុការណ៍ជម្លោះរវាងព្រះសង្ឃទាំងពីរអង្គ បាន​កើត​ឡើង​នៅ​ថ្ងៃ​ទី១៤ ខែ​វិច្ឆិកា​នេះ មុន​នឹង​កិច្ច​ប្រជុំ​រវាង​មន្ត្រី​សង្ឃ​នៅ​ក្នុង​វត្ត បាន​ធ្វើ​ឡើង​នៅ​រសៀល​ថ្ងៃ​ដដែល​នេះ។ សាក្សី​នៅ​នឹង​កន្លែង​បាន​ឲ្យ​ដឹង​ថា ព្រះ​សង្ឃ ឡុង ឆេងហី បាន​យក​ទូរសព័្ទ​ទៅ​ថត​រូប​ព្រះ​សង្ឃ កែវ សុម៉ាលី ដែល​បាន​ចូល​រួម​ក្នុង​ព្រឹត្តិការណ៍​សង្គម​ផ្សេងៗ។ ប៉ុន្តែ​ព្រះ​សង្ឃ កែវ សុម៉ាលី បាន​កៀស​ទូរសព្ទ័​នោះ​ចេញ បណ្តាល​ឲ្យ​មាន​ការ​ប្រទូស​ប្រវ៉ាយ​គ្នា​ឡើង និងមាន​របួស​សើរស្បែក​ទាំង​សង​ខាង។

ព្រះសង្ឃ ឡុង ឆេងហ៊ី បានចោទប្រកាន់ព្រះសង្ឃ កែវ សុម៉ាលី ថាជាអ្នកវ៉ៃព្រះអង្គឲ្យបែកព្រះកេស។ រីឯ​កិច្ច​ប្រជុំមន្ត្រីសង្ឃក្នុងវត្ត ដែលមានការចូលរួមពីតំណាងអាជ្ញាធរផង បាន​សម្រេច​ថា ត្រូវ​បណ្ដេញព្រះសង្ឃ​ទាំង​ពីរ​អង្គចេញពីវត្ត  ហើយសម្រាប់ព្រះសង្ឃ កែវ សុម៉ាលី ព្រះអង្គមានពេល​៤៨​ម៉ោង ដើម្បី​ចាកចេញ ឬបើ​មិន​ដូច្នេះ​ទេ នឹងមានវិធានការផ្សេងទៀត ដូចជាឲ្យអាជ្ញាធរអនុវត្តច្បាប់អាណាចក្រវិញ ជាដើម។

នៅចំពោះអ្នកសារព័ត៌មានជាច្រើននាក់ ព្រះសង្ឃ កែវ សុម៉ាលី បានបដិសេធការចោទប្រកាន់របស់ ព្រះសង្ឃ ឡុង ឆេងលី ដោយមានថេរដីការអះអាងថា ស្នាមរបួសនោះ មិន​ដឹងកើតតាំងពីពេលណាមកទេ។ ព្រះអង្គក៏​បាន​បរិហាការសម្រេចនោះថា ជាការសម្រេច​ដោយអយុត្តិធម៌ ព្រោះព្រះគ្រូចៅអធិការវត្តនាគវ័នលំអៀង និង​មានហេតុផលនយោបាយ នៅលាយឡំជា​មួយ។

ប៉ុន្តែព្រះសង្ឃ ស៊ីម ស៊ន ដែលជាគ្រូសូត្រឆ្វេងនៅវត្តនេះ បានមានសង្ឃដីការថា ហើយករណីនេះ មិន​ជាប់​ពាក់​ព័ន្ធនឹងនយោបាយ​ទេ ព្រោះជាការបណ្ដេញទាំងពីរអង្គ ដោយសង្ឃទាំងពីរប្រព្រឹត្តិកំហុសដូចគ្នា។

និស្សិតប្រើដំបងឆក់

បើតាមសាក្សីដដែលបានបញ្ជាក់ថា មានការប្រើប្រាស់ដំបងឆក់ ដែលគ្មាននរណានឹកស្មានដល់ ដោយក្រុម​និស្សិតដែលស្នាក់ក្នុងវត្តនាគវ័ននោះ វាយមកលើព្រះសង្ឃ កែវ សុម៉ាលី។ ប៉ុន្តែទស្សនាវដ្ដី​មនោរម្យ.អាំងហ្វូ មិនទទួលការអះអាងណាផ្សេងទៀត មកបញ្ជាក់បាននៅឡើយ។ តែចង់ដឹងថា តើដំបងឆក់នេះ មានប្រភព​ពី​ណាមក? ទស្សនាវដ្ដីបានទទួលការអះអាងថា ប្រធានសមាគមនិស្សិតនៅវត្តនាគវ័ននេះ ជាមន្ត្រីអាជ្ញាធរ​មួយ​រូប ពីខ័ណ្ឌទួលគោក។

ព្រះសង្ឃមួយអង្គស្និតនឹងព្រះសង្ឃ កែវ សូម៉ាលី បានឈ្វេងយល់ថា ហេតុការណ៍នេះ ជាការរៀបចំទុក ដើម្បី​បណ្ដេញ​​ព្រះសង្ឃ កែវ សុម៉ាលី ចេញពីវត្ត ក្រោមការរើសអ៊ើង ពីសំណាក់ព្រះគ្រូចៅអធិការ និងក្រោមការផ្លុំ ពី​ប្រធាន​សមាគមនិស្សិតវត្តនាគវ័ន។

ទស្សនាវដ្ដីមិនអាចស្វែងរកការបកស្រាយ ពីព្រះគ្រូចៅអធិការវត្ត ព្រះសង្ឃ ឡុង ឆេងហ៊ី និងពីលោកប្រធាន​សមាគមនិស្សិតវត្តនាគវ័ន បានទេ។ តែព្រះសង្ឃ ឡុង ឆេងហ៊ី បានសរសេរនៅ​លើ​គណនីហ្វេសប៊ុករបស់​ព្រះអង្គថា រឿងនេះជារឿងបុគ្គល នៅក្នុងកុដិលេខ៦ និងមិនមែនជារឿង​នយោបាយ​ទេ។ ព្រះអង្គបាន​ចោទ​ព្រះ​សង្ឃ កែវ សុម៉ាលី ថាកំពុងកើតជំងឺឆ្គួត ដូចជាឆាប់ច្រឡោត មោហ:ល្ងង់ និយាយ​មានឬកពា​ច្រងេង​ច្រងាង​​ជា​ដើម។

រីឯលោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ វិញ បាន​ថ្លែង​ឲ្យ​ដឹងថា វិវាតរវាងសង្ឃ គួរទុកឲ្យខាងវិន័យសង្ឃជាអ្នកដោះស្រាយ ហើយខាងអាជ្ញាធរមិនគូរលូកដៃ​ចូល​ទេ ហើយក៏រឹតតែមិនត្រូវប្រើប្រាស់ នូវការចាប់ចងដាក់ពន្ធនាគារ ជាដំណោះស្រាយ ព្រោះតែរឿងនេះ​ដែរ។ ជា​ពិសេសកិច្ច​ប្រជុំ​រក​ដំណោះស្រាយ រវាងមន្ត្រីសង្ឃក្នុងវត្តនាគវ័ន  ដែលមានតំណាងពីខាង​អាជ្ញាធរ​ចូលរួម​នេះ ត្រូវបានលោក សំអាត រំពឹងថា វាហាក់ដូចជាព្រះគ្រូចៅអធិការ កំពុងរងសម្ពាន​នយោបាយ ដើម្បី​ដាក់​ទោស​ទណ្ឌ និងដាក់​កំហិតទៅលើព្រះសង្ឃ កែវ សុម៉ាលី ដែលល្បីថា ជាសង្ឃលេចធ្លោ​មួយ​អង្គ នៅ​ក្នុង​ការ​​ទាមទារ និងសកម្មភាព​សង្គមផ្សេងៗ៕

សូមទស្សនាវីដេអូ ដែលបង្ហាញពីប្រតិកម្ម បន្ទាប់ពីកិច្ចប្រជុំនោះដូចតទៅ៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...