បន្ទាប់ពីមានពាក្យរិះគន់​យ៉ាង​ចាស់​ដៃ ពី​សំណាក់​ប្រជា​ពលរដ្ឋ ជា​ពិសេស​អ្នក​ប្រើ​ប្រាស់​បណ្តាញ​​សង្គម​​ហ្វេស​ប៊ុក​ទៅ​លើ គណៈ​កម្មាការ​ដឹក​នាំ​ទូក​របស់​ខេត្ត​កំពង់​ឆ្នាំង​ថា បាន​រើស​អើង​ចំពោះ​ទូក​​ដែល​មិន​បាន​​ដាក់​​ឈ្មោះ«តេជោ» ឬ​«សែន​ជ័យ» ជា​ពិសេស​ទូក​ឈ្មោះ​ក្តាម​ប្រៃ​នោះ សមាជិក​គណៈកម្មការ​ដឹកនាំ​​ទូក​ខេត្ត​​កំពង់ឆ្នាំង​លោក លឿង ជុំសុបិន្ត បាន​សរសេរ​បក​ស្រាយ​នៅ​លើ​ទំព័រ​ហ្វេសប៊ុក​ថា ក្រុម​ការងារ​គណៈ​កម្មការ​ដឹកនាំ​ទូក​ខេត្ត​កំពង់​ឆ្នាំង តែង​រីករាយ​ស្វាគមន៍ ចំពោះ​ការ​ជួយ​ឧបត្ថម្ភ​គាំទ្រ​​របស់​សប្បុរស​ជន​​ជិត​ឆ្ងាយ​​ទាំង​​អស់។

លោកសរសេរបន្តថា ប៉ុន្តែ​អ្វី​ដែល គួរ​ឱ្យ​កត់​សម្គាល់ សម្រាប់​ក្រុម​សកម្មជន ដែល​បាន​យក​អំណោយ​សប្បុរស​​ជន​ខាង​លើ យក​ទៅ​ចែក​ជូន​ឬ​ចុះ​មក​ជួប កីឡាករ​ទូក​ក្ដាម​ប្រៃ​ម្ដងៗ ពួក​គេ​មិន​ដែល​មក​ប្រាស្រ័យ​ទាក់​ទង សាក​សួរ ឬ​ផ្ដល់​ព័ត៌មាន ដល់​ក្រុម​គណៈកម្មការ​ដឹក​នាំ​ទូក​ឡើយ។ ពួក​គេ​មក​ម្ដងៗ​មាន​គ្នា​ច្រើន មក​ប្រជុំ​​ជួប​ជុំ​ជា​មួយ​កីឡាករ ជជែកពិភាក្សាលាយឡំបញ្ហានយោបាយ ប្រើសម្ដីវាយប្រហារ មកលើក្រុមការងារ​គណៈ​កម្មការ​​ដឹកនាំទូកខេត្តកំពង់ឆ្នាំង ចោទប្រកាន់​ដោយ​គ្មាន​មូល​ដ្ឋាន ច្បាស់លាស់ មិនបានសាកសួរ ប្រមូល​ព័ត៌មាន គ្រប់ជ្រុង ជ្រោយ។

«អ្វីដែលគួរឲ្យកត់សម្គាល់ គឺពួកគាត់តែងនិយាយដដែលៗថា "ទូកក្ដាមប្រៃ" គ្មាននរណាឧបត្ថម្ភសោះ គ្មាន​នរណាយកចិត្តទុកដាក់គិតគូរសោះ បើគ្មានក្រុមខ្ញុំមកជួយឧបត្ថម្ភទេ គឺអុំមិនឈ្នះគេទេ ឈ្មោះទូក គ្មានពាក្យ "សែន" គឺច្បាស់ជាមិនឈ្នះទូកឈ្មោះមានពាក្យ "សែន" ទេ។ អត់ដែលឮផ្សាយតាមទូរទស្សន៍ថា មាន​នរណា​គេឧបត្ថម្ភសោះ។ល។» លោក លៀង ជុំសុបិន្ត បន្ថែម។

សមាជិកគណៈកម្មការដឹកនាំទូក ខេត្តកំពង់ឆ្នាំងរូបនេះ បានបញ្ជាក់ទៀតថា មូលហេតុដែលនាំ​ឱ្យមាន​ការ​រិះគន់ដល់ក្រុមការងាររបស់លោកយ៉ាងដូច្នេះ ដោយសារ មួយរយៈពេលនេះ មានសកម្មជន​ខាងគណបក្ស​មួយ ដោយរួមទាំងព្រះសង្ឃឯករាជ្យ និងប្រព័ន្ធផ្សព្វផ្សាយមួយចំនួន បំផុសបំផុលផ្អើលគគ្រឹកគគ្រេង ចោទ​ប្រកាន់យ៉ាង អយុត្តិធម៌បំផុតចំពោះអាជ្ញាធរខេត្ត និងគណៈកម្មការដឹកនាំ ទូកខេត្តកំពង់ឆ្នាំង ថាមិនបាន​គិត​គូរ​យកចិត្តទុកដាក់ ចំពោះទូកឈ្មោះ ក្ដាមប្រៃ របស់ស្រុកកំពង់ត្រឡាច។

គួរម្លឹកថា កាលព្រឹកថ្ងៃទី៧ ខែវិច្ឆិកា ឆ្នាំ២០១៤នេះ មានហេតុការណ៍មួយបានកើតឡើង រវាងក្រុមសប្បុរសជន ជាមួយក្រុមគណៈកម្មការរៀបចំបុណ្យអុំទូក ខេត្តកំពង់ឆ្នាំង ខណៈពេលដែលសប្បុរសជនទាំងនោះ បាននាំ​គ្នាយកអំណោយជាម្ហូបអាហារមានដូចជា ត្រីចំហុយ សាច់គោ សាច់ជ្រូក និងបន្លែ រួមទាំងគ្រឿងឧបគោគ បរិភោគផ្សេងៗ និងថវិកាមួយចំនួន ផ្តល់ដល់កីឡាករអុំទូក«ក្តាមប្រៃ» តែត្រូវបានគណៈកម្មការរៀបចំ​បុណ្យ​អុំទូកខេត្តកំពង់ឆ្នាំង បានមករារាំងហាមឃាត់ក្រុមរបស់គាត់ ដោយបានចោទថា ម្ហូបអាហារទាំងនោះ មាន​ថ្នាំ​ពុល ដែលជាហេតុធ្វើឱ្យកីឡាករបាក់កម្លាំង។

ទូក«ង»របស់ខេត្តខេត្តកំពង់ឆ្នាំង ទាំងអស់មានចំនួន២២ កម្លាំងអុំចែវសរុប ១១២៦នាក់ ស្រី១២០នាក់។ គណៈកម្មាការដឹកនាំទូកខេត្តដឹកនាំ ដោយអភិបាលរងខេត្តចំនួន២រូប នាយក នាយករង រដ្ឋបាល និងថ្នាក់​ដឹកនាំទីចាត់ការចំណុះសាលាខេត្ត។ ក្នុងនោះទូកឈ្មោះ«ក្តាមប្រៃ» ជាទូកមួយក្នុងចំណោមទូកចំនួន២២ របស់ខេត្តកំពង់ឆ្នាំង ដែលបានមកចូលរួមប្រកួតក្នុងព្រះរាជពិធីបុណ្យអុំទូក រយៈពេលបីថ្ងៃនេះ នៅរាជធានី​ភ្នំពេញ៕