តើវៀតណាមនឹងខាតបង់ច្រើនឬ បើពលរដ្ឋខ្មែរឈប់ប្រើទំនិញខ្លួន?
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី០៨ តុលា ២០១៤
- កែប្រែចុងក្រោយ: October 09, 2014
- ប្រធានបទ: បាតុកម្មប្រឆាំងវៀតណាម
- អត្ថបទ: មានបញ្ហា?
- មតិ-យោបល់
-
ក្នុងពេលធ្វើបាតុកម្មប្រឆាំងវៀតណាមថ្មីៗនេះ ក្រុមអ្នកតវ៉ាបានអំពាវនាវ និងចែកខិតប័ណ្ណដល់ប្រជាពលរដ្ឋ ដើម្បីស្នើសុំឱ្យឈប់ប្រើទំនិញ និងសេវាកម្មនានារបស់វៀតណាម ដើម្បីដាក់សម្ពាធ ឱ្យអតីតមន្រ្តីអ្នកនាំពាក្យស្ថានទូតវៀតណាម ប្រចាំនៅកម្ពុជា សុំទោសប្រជាពលរដ្ឋខ្មែរជាសាធារណៈ ក្នុងរឿងបំភ្លៃប្រវត្តិសាស្រ្តកម្ពុជា។ ការស្នើសុំឲ្យឈប់ប្រើទំនិញ និងសេវាកម្មនានារបស់វៀតណាមនេះ បានបង្កជាមន្ទិល សម្រាប់ប្រជាពលរដ្ឋខ្មែរខ្លួនឯង ដោយពួកគេបានចោទសួរទៅវិញថា តើអាចទៅរួចឬទេ?
ប្រតិកម្មពីពលរដ្ឋខ្មែរមួយចំនួន បានលើកឡើងថា បញ្ឈប់ប្រើប្រាស់ទំនិញវៀតណាម ជាករណីមិនអាចទៅរួចឡើយ។ លោក យស់ កាតង់ (Yos Katank) បានសរសេរនៅលើជញ្ជាំងហ្វេសប៊ុករបស់លោកថា៖ «វាជាការលំបាកណាស់ សម្រាប់ខ្មែរក្នុងការបដិសេធមិនប្រើប្រាស់ ឬទិញទំនិញបរទេស ពីព្រោះខ្មែរមិនអាចផលិតខ្លួនឯងបាន ឬគ្មានចេតនាចង់ផលិតទំនិញ សូម្បីតែរបស់ប្រើប្រាស់ប្រចាំថ្ងៃ ឬស្បៀងអាហារកំប៉ិកកំប៉ុក។ បើជៀសពីរបស់យួននៅពេលនេះ ច្បាស់ជារបស់សៀម!»
តែប្រជាពលរដ្ឋម្នាក់ ដែលរស់នៅតាមបណ្តោយផ្លូវប៉ាស្ទ័រ បន្ទាប់ពីទទួលបានខិត្តប័ណ្ណ ដែលក្រុមអ្នកតវ៉ាបានចែកឱ្យនោះ បានថ្លែងឱ្យដឹងថា ចាប់ពីពេលនេះតទៅ អ្នកស្រីនឹងឈប់ប្រើប្រាស់នូវផលិតផលរបស់វៀតណាម ដោយងាកមកប្រើប្រាស់ទំនិញរបស់ខ្មែរវិញ។ ប៉ុន្តែអ្នកស្រីថា ផលិតផលរបស់ខ្មែរ មិនគ្រប់គ្រាន់តាមតម្រូវការរបស់អ្នកស្រីនោះទេ។
សម្រាប់ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង់ គិមអេង មានប្រសាសន៍ថា ប្រសិនបើប្រជាជនខ្មែរបញ្ឈប់ប្រើប្រាស់ នូវទំនិញវៀតណាមនោះ វៀតណាមនឹងទទួលការខាតបង់ច្រើនជាងកម្ពុជា ព្រោះវៀតណាមជាប្រទេសអ្នកផលិត រីឯកម្ពុជាជាអ្នកប្រើប្រាស់។ ប៉ុន្តែលោកថា ប្រជាជនកម្ពុជាក៏មានការខាតបង់ដែរ ចំពោះអ្នកដែលនាំផលិតផលវៀតណាមយកមកលក់។
លោកបន្តថា៖ «នេះជាបញ្ហាដែរបាទ ចំពោះការដាក់សម្ពាធ ខាងការមិនឱ្យប្រើទំនិញប្រើអីហ្នឹង វាអាចមានផលប៉ះពាល់ ទៅវិញទៅមកទាំងសងខាង។ ហើយវាអាចធ្វើឱ្យវាអាចធ្វើឱ្យអសកម្ម ទៅដល់ចលនានៃការផ្លាស់ប្តូរទំនិញ ក៏ដូចជាការប្តេជ្ញាចិត្ត ក្នុងការបង្កើនវិនិយោគក្នុងប្រទេសទាំងពីរដែរ»។ អ្នកដានតាមបញ្ហាសង្គមរូបនេះ បានបន្ថែមថា ដើម្បីជៀសវាងការខាតបង់ទាំងសងខាង រដ្ឋាភិបាលវៀតណាម គួរស្វែងរកនូវដំណោះស្រាយណាមួយ ដើម្បីឱ្យភាគីទាំងពីរមានភាពល្អប្រសើរទាំងអស់គ្នា៕