ជា​មួយ​ទឹក​មុខ​ម៉ូម៉ៅ កំពុង​ឈរ​ត្រាំ​ក្នុង​ទឹក អ្នកស្រី ហាយ ស្រីពៅ ជា​អាជីវករ​លក់​បន្លែ នៅ​ផ្សារ​ដើម​គរ បាន​ប្រាប់​ឱ្យ​ដឹង​ថា អ្នកស្រី​មាន​អារម្មណ៍​ពិបាក និង​ធុញ​ថប់​មែនទែន ព្រោះ​តែ​កន្លែង​ដែល​អ្នកស្រី​លក់​រាល់ថ្ងៃ ត្រូវ​លិច​ទឹក​ឱ្យ​តែ​ពេល​មាន​ភ្លៀងធ្លាក់។ ម្យ៉ាង​ទៀត អត់ទាំងកន្លែង​ដាក់​របស់​របរ​លក់ ទាំង​អ្នក​មក​ទិញ ក៏​គ្មាន ដោយ​សារ​តែ​ទីផ្សារ​ទាំង​មូល ប្រៀប​ដូចជា​ទន្លេ​មួយ។

ភ្លៀងមួយមេម្សិលមិញ បានប្រែទិដ្ឋភាពរាជធានីភ្នំពេញ គ្រប​ដណ្ដប់​ទៅដោយទឹក ជាពិសេសនៅផ្សារដើម​គរ​នេះតែម្តង ព្រោះស្ថិតក្នុងទីទំនាបទាប។ អ្នកលក់គ្រឿងទេស នៅ​ផ្សារ​ដើមគរ​ម្នាក់ទៀត បានរៀបរាប់ថា ពេល​កន្លងមក តូបរបស់អ្នកស្រីមិនមានទឹកចូលនោះទេ ព្រោះ​អ្នកស្រី​បាន​ចាក់​រនាំង​ឥដ្ឋដើម្បីកុំឱ្យទឹកចូល ប៉ុន្តែភ្លៀងមួយមេកាលពីម្សិលម៉ិញនេះ ទឹកបានលិចចូល​ពេញ​ក្នុង​ផ្ទះ​របស់​អ្នកស្រី ដោយ​សារ​វា​ផុសពីក្នុង​លូមកវិញ។

អាជីវកររូបនេះបន្តថា គ្រឿងទេសមួយចំនួនរបស់អ្នកស្រីដូចជាខ្ទឹម អំបិល ប៊ីចេង អង្ករជាដើមត្រូវ​បាន​ខូច​ខាត​អស់។ អ្នកស្រីថា អ្នកទទួលខុសត្រូវផ្សារបានទារលុយថ្លៃភាស៊ី ជារៀងរាល់ថ្ងៃ ប៉ុន្តែមិនដែលគិតគូរ ពី​បញ្ហា​របស់អាជីវករនោះទេ។ ចំពោះការខាតបង់របស់អ្នកស្រី ក៏ដូចជា អាជីវករដ៏ដៃទៀត អាជីវកររូបចោទ​សួរ និង​ឆ្លើយ​ខ្លួនឯងថា៖ «តើថាអ្នកណា ជាអ្នកទទួលខុសត្រូវ អាជ្ញាធរឬក៏រដ្ឋាភិបាល? តែជាទូទៅគ្មាន​អាជា្ញធរ​ណា ដែលមកគិតគូរទ មានតែប្រជាពលរដ្ឋខ្លួនឯង តែប៉ុណ្ណោះគិតគូរ។»

សម្រាប់លោក អួន វង ជាអ្នករត់ម៉ូតូឌុបនៅម្តុំផ្សារដើមគរនេះដែរ បានបង្ហាញអារម្មណ៍ម៉ួមៅ​ក្រោយ​ពេល​ភ្លៀងធ្លាក់ថា តាមធម្មតាលោករកបានមួយថ្ងៃប្រមាណជា៣ម៉ឺនរៀល។ ប៉ុន្តែបន្ទាប់ពីមានភ្លៀងធ្លាក់ លិច​ផ្លូវ​ល្ហាចល្ហឹមអញ្ចឹង សូម្បីតែមួយរយរៀលក៏រកមិនបានផង ណាមួយម៉ូតូក៏ចាស់ មិនអាចស៊ូជាមួយទឹកបាន ត្រូវ​ខកពេលដឹកឥវ៉ាន់ទៅឲ្យគេនៅតាមហាង។

មិនថាតែអ្នកលក់នោះទេ ដែលមានអារម្មណ៍ធុញថប់ ខណៈដែលរបស់របររបស់ខ្លួន ត្រូវនៅសល់ពាស​ពេញ និងមួយត្រូវខូចខាត សូម្បីតែប្រជាពលរដ្ឋ ដែលមកទិញម្ហូបអាហារ ក៏មារនអារម្មណ៍បែបនោះដែរ ដែល​ពួកគេសុទ្ធតែអំនាវនាវ ឱ្យរដ្ឋាភិបាលគិតគូរពីបញ្ហានេះឱ្យបានច្រើន ព្រោះកាលពីមិនទាន់​លុបបឹង​នានា នៅក្នុងទីក្រុងភ្នំពេញ មិនដែលជួបបញ្ហាបែបនេះឡើយ។

អាជីវករ អ្នកស្រី ហាយ ស្រីពៅ បានថ្លែងសំណូមពរ ទៅកាន់រដ្ឋាភិបាលថា «សូមជួយធ្វើយ៉ាងម៉េច ឬធ្វើលូ​ធ្វើអីដើម្បីកុំឱ្យវាលិចទឹក និងមានកន្លែងលក់ស្រួលបួល»៕