កម្ពុជា​អាច​«ដាក់» ក៏​អាច​«ដក»​មក​វិញ នូវ​កិច្ច​ព្រម​ព្រៀង​ទទួល​ជន​ភៀស​ខ្លួន​ពី​អូស្ត្រាលី

តែប៉ុន្មានថ្ងៃប៉ុណ្ណោះ ក្រោយការចុះកិច្ចព្រមព្រៀង ទទួលយកជនភៀសខ្លួន ដែលចុះហត្ថលេខាដោយ លោក ស ខេង រដ្ឋមន្រ្តីក្រសួងមហាផ្ទៃ នៅថ្ងៃទី២៩ ខែកញ្ញានេះលោក ឡុង វីសាលោ រដ្ឋលេខាធិការក្រសួងការបរទេស បាន​ថ្លែង​បក​ស្រាយ​វិញថា កម្ពុជាអាចលុបចោលកិច្ចព្រមព្រៀងនេះ ទៅតាមភាពជាក់ស្តែងប្រសិនបើចាំបាច់ ។
Loading...
  • ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី២៩ កញ្ញា ២០១៤
  • កែប្រែចុងក្រោយ: September 29, 2014
  • ប្រធានបទ: អន្តោប្រវេសន៍
  • អត្ថបទ: មានបញ្ហា?
  • មតិ-យោបល់

ថ្លែង​ក្នុង​សន្និសីទ​សារព័ត៌មាន នា​ព្រឹក​ថ្ងៃ​ទី២៩ ខែ​កញ្ញា​នេះ រដ្ឋមន្ត្រី​ស្តីទី​នៃ​ក្រសួង​ការបរទេស​កម្ពុជា​ លោក ឡុង វីសាលោ បានថ្លែងឲ្យដឹងថា កម្ពុជាក៏មានសិទ្ធិគ្រប់គ្រាន់ ក្នុង​ការ​ផ្លាស់​ប្តូរ​គំនិត មិនទទួលយកជន​ភៀស​​ខ្លួន​ទាំង​នោះ ដោយ​គ្មាន​ល័ក្ខខ័ណ្ឌ និង​ការ​គាប​សង្កត់។ យ៉ាង​ណា​ក៏​ដោយ លោក​ថា តែ​ក៏​ចាំបាច់​ត្រូវ​ធ្វើការ​ជូន​ដំណឹង ទៅ​ភាគី​រដ្ឋាភិបាល​អូស្ត្រាលី ឲ្យ​បាន​មុន​ប្រាំមួយ​ខែ​ដែរ។

លោក វីសាលោ បានបន្តថា នេះ​ក៏​មិន​មែន​ជា​បញ្ហា​ថ្មី​សម្រាប់​កម្ពុជា ឬ​ដែល​កម្ពុជា​បាន​ធ្វើ​នោះ​ដែរ។ លោក​បានលើកជាឧទាហរណ៍ថា កន្លងមកប្រទេសកម្ពុជា ក៏ធ្លាប់​ទទួលយកជនភៀសខ្លួនមួយចំនួន ដូចជាក្រុម​ម៉ុងតាញញ៉ាពីវៀតណាមជាដើម។ ហើយការទទួលយក​ជន​ភៀស​ខ្លួនមួយចំនួន ក៏ព្រោះតែអនុវត្តទៅ​តាម​អនុសញ្ញា ស្តីពីជនភៀសខ្លួនប៉ុណ្ណោះ តួយ៉ាងដូចជាការ​ទទួល​យក​ជន​ភៀសខ្លួន ពីប្រទេសអូស្ត្រាលី​នេះ​ជា​ដើម។

ការថ្លែងរបស់លោករដ្ឋមន្ត្រីការបរទេសស្ដីទី ទំនងជាចង់ឆ្លើយតប ទៅនឹងការរិះគន់ ដែលបានផ្ទុះ​ឡើង​យ៉ាង​ព្រោងព្រាត ប្រឆាំងកិច្ចព្រមព្រៀងនេះ ដែល ត្រូវបានចុះហត្ថលេខាដោយ លោក ស ខេង រដ្ឋមន្ត្រី​ក្រសួង​មហាផ្ទៃកម្ពុជា ជាមួយលោក ស្កុត ម៉ូរីសុន (Scott Morrison) រដ្ឋមន្ត្រីក្រសួង​អន្តោប្រវេសន៍ និងកិច្ច​ការពារ​ព្រំដែនអូស្ត្រាលី​ កាលពីថ្ងៃទី២៦ ខែកញ្ញាកន្លងមក។

ប៉ុន្តែលោក ឡុង វីសាលោ បានបន្តបកស្រាយទៀតថា៖ «ការទទូលយកជនភៀសខ្លួនពីប្រទេសអូស្ត្រាលី ឲ្យមក​តាំង​ទី​លំនៅកម្ពុជា គឺជាសកម្មភាពមនុស្សធម៌របស់កម្ពុជា និងស្របតាមហត្ថលេខី នៃអនុសញ្ញាស្តីពី​ជន​ភៀស​ខ្លួន​ឆ្នាំ១៩៥១ និងឆ្នាំ១៩៦៧»។

កម្ពុជាមានជនអន្តោប្រវេស៩១នាក់...

បន្ថែមនឹងការលើកឡើងខាងលើ លោក សុខ ផល អគ្គនាយក នៃ​អគ្គនាយកដ្ឋានជនអន្តោប្រវេសន៍ របស់​ក្រសួងមហាផ្ទៃ ដែលមានវត្តមានដែរនោះ បានថ្លែងថា បច្ចុប្បន្ននេះ កម្ពុជាមានជនអន្តោប្រវេសន៍​ចំនួន​៩១​នាក់ហើយ។ ជនអន្តោប្រវេសទាំងនោះ មកពីបណ្តាប្រទេសមួយ​ចំនួន​ដូចជា ប្រទេសវៀតណាម,ថៃ, ប៉ាគីស្ថាន, ស្រីលង្កា, ប៉ាលេស្ទីន, អេខ្យូពី អីរ៉ាក់ និងឥណ្ឌាជាដើម។ លោកបន្តថា ពួកគេក៏បានរស់នៅ ដោយ​សុខសប្បាយដូចជនជាតិកម្ពុជាដែរ។

លោក ឡុង វីសាលោ បានថ្លែងបន្តថា ក្រុមជនភៀសខ្លួនទាំងនោះ នឹងស្នាក់នៅមួយរយៈ ឬក្នុង​រយៈពេល​តិចបំផុត១២ខែ ក្នុងរាជធានីភ្នំពេញដើម្បីរៀនភាសា ភូមិសាស្ត្រ និងប្រពៃណីខ្មែរ ជាមួយនឹងការតាំងទី ដែល​មានមន្ទីរពេទ្យ ទីផ្សារ និងការប្រកបរបរចិញ្ចឹមជីវិតជាដើម មុននឹងបញ្ជួនពួកគេ ឲ្យទៅរស់នៅតាម​បណ្តាខេត្តនានា។ បន្ទាប់មក ពួកគេក៏នឹងទទួលបាន នូវអន្តសញ្ជាណប័ណ្ឌសញ្ជាតិខ្មែរតាមតម្រូវការ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...