ខណៈពេលដែលរាជរដ្ឋាភិបាល បាននឹងកំពុងបន្តធ្វើប័ណ្ណប្រកាសជាក្រុម ឲ្យជនអន្តោប្រវេសន៍វៀតណាម ប្រជា​ពលរដ្ឋ មន្រ្តីសង្គមស៊ីវិល និងអ្នកវិភាគបានគាំទ្រទៅលើចំណាត់ការនេះ។ បើតាមមន្ត្រីអន្តោប្រវេសន៍​បញ្ជាក់ថា ជនជាតិវៀតណាម គ្រប់អាយុ ១៨ឆ្នាំទាំងអស់ដែលកំពុងរស់នៅក្នុងទឹកដីកម្ពុជា ត្រូវធ្វើ​ពាក្យស្នើ​សុំ​ជា​ជន​អន្តោប្រវេសន៍​ស្រប​ច្បាប់ ពីអាជ្ញាធរ កម្ពុជា ទាំងអស់គ្នា។ ប័ណ្ណនេះមានសុពលភាពរយៈពេល ២ឆ្នាំ និង​ត្រូវ​បង់​ប្រាក់ ២៥ម៉ឺនរៀល ហើយបើផុតពេលកំណត់ ត្រូវដាក់ពាក្យស្នើសុំសិទ្ធិរស់នៅបន្តទៀត ក្នុង​ករណី​ដែល​មិន​ទាន់​មាន​បំណង ចង់ចាកចេញពីប្រទេសកម្ពុជា។

អ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់បានឱ្យដឹងថា ផ្តល់ប័ណ្ណទទួលស្គាល់ជនអន្តោប្រវេសន៍​ដែលរស់នៅប្រទេសកម្ពុជា គឺដើម្បីងាយស្រួល ដល់ការគ្រប់គ្រងជនអន្តោប្រវេសន៍ឱ្យនៅក្រោមច្បាប់ និង​អាចប្រមូលបានថវិកាខ្លះចូលរដ្ឋ។ លោកថា គម្រោងនេះក្រសួងបានចាប់ផ្ដើមធ្វើតាំងពីឆ្នាំ២០០២ មកម្លេះ។

លោកបណ្ឌិត សុខ ទូច អ្នកវិភាគសង្គមឯករាជ្យ និងជាសាកលវិទ្យាធិការនៃសាកលវិទ្យល័យខេមរៈ បាន​ថ្លែងថា លោកគាំទ្រចំពោះការផ្តល់ប័ណ្ណ ទទួលស្គាល់ជនអន្តោប្រវេសន៍ ដែលមករស់នៅប្រទេសកម្ពុជា ជា​ពិសេសជនជាតិវៀតណាម ដែលមានដ៏ច្រើនលើសលុបនៅទឹកដីខ្មែរ ដើម្បីងាយស្រួលគ្រប់គ្រង់ និងដឹង​ពី​ស្ថិតិនៃចំនួនជនអន្តោប្រវេសន៍នេះ។ លោកបន្តថា៖ «ជាការពិត ការទទួលស្គាល់ជនអន្តោប្រវេសន៍នេះ ជា​ការល្អបំផុត ដើម្បីងាយស្រួលក្នុងការគ្រប់គ្រងជនអន្តោប្រវេសន៍ដែលស្របច្បាប់ ខុសច្បាប់ ត្រូវតែវិល​ទៅ​ប្រទេសរបស់ខ្លួនវិញនេះទីមួយ ហើយទី២ជនប្រអន្តោប្រវេសន៍ហ្នឹង គាត់ត្រូវតែបង់លុយចូលមកឱ្យរដ្ឋ»។

លោកពន្យល់ឲ្យដឹងទៀតថា នៅពេលរដ្ឋាភិបាលចាត់វិធានការបែបនេះ វានឹងមានភាពងាយស្រួល ព្រោះ​ជន​អន្តោប្រវេសន៍ ទាំងនោះនឹងគ្មានសិទ្ធិបោះឆ្នោត សិទ្ធិទិញផ្ទះសម្បែងដីធ្លីឡើយ។

បើទោះជាលោក សុខ ទូច បានគាំទ្រចំពោះការចេញប័ណ្ណប្រកាសក្រុមជនអន្តោប្រវេសន៍នេះក៏ដោយ តែ​ប្រជាពលរដ្ឋមួយរូបបានលើកពីការព្រួយបារម្ភរបស់ខ្លួនថា លោកនៅតែមិន​ទាន់ទុកចិត្តចំពោះ​ចំណាត់​ការ​របស់មន្រ្តីរដ្ឋាភិបាលនោះទេ។ លោកបានស្នើសូមឱ្យរដ្ឋាភិបាលធ្វើកិច្ចការនេះ ដោយតម្លាភាព និងកំណត់​ទិសដៅឲ្យបានច្បាស់លាស់ ជាពិសេសការអនុវត្តត្រូវឲ្យមានប្រសិទ្ធភាព៕