ពលរដ្ឋមានជម្លោះដីធ្លី មកពីខេត្តក្រចេះ ខេត្តត្បូងឃ្មុំ រួមទាំងប្រជាសហគមន៍៣៤៧ ប្រមាណជាង១០០នាក់ នៅព្រឹកថ្ងៃទី១៨ ខែសីហានេះ បានហែញត្តិចេញដំណើរពីវត្តសាមគ្គីរង្សី ឆ្ពោះទៅរដ្ឋសភា និងទៅភូមិគ្រឹះ​លោកនាយករដ្ឋមន្រ្តី ហ៊ុន សែន ជិតវិមានឯករាជ្យ។ ការហែញត្តិនេះ ដើម្បីស្នើសុំជួយអន្តរាគមន៍ បញ្ហា​ជម្លោះ​ដីធ្លី និងស្នើរឲ្យរដ្ឋាភិបាលជួយអន្តរាគមន៍ទៅអជ្ញាធរខេត្តចេញប័ណ្ណកម្មសិទ្ធិដី ជូនពួក​គាត់​ដែល​បានរស់នៅតាំងពីឆ្នាំ១៩៧៩មក។

ដំណាលគ្នានេះដែរ ខាងសហគមន៍បឹងកក់ ក៏បានបានប្រមូលផ្តុំគ្នា នៅពីមុខក្រុមហ៊ុន HLH ដើម្បីអោយ ក្រុមហ៊ុនមួយនេៈបញ្ឈប់ការ«បញ្ជា»ទិញដី នៅតំបន់អភិវឌ្ឍន៏បឹងកក់ ដែលកំពុងមានជម្លោះ ហើយនៅ​មិន​ទាន់មានការដោះស្រាយនៅឡើយនោះ។

កាលពីថ្ងៃទី៥ ខែសីហា ឆ្នាំ២០១៤ កន្លងមក អ្នកមានជម្លោះដីធ្លី  បានដាក់ញត្តិនៅគណៈកម្មការចម្រុះ​ដោះ​ស្រាយវិវាទដីធ្លី នៅខុទ្ទកាល័យនាយករដ្ឋមន្ត្រី ដើម្បីស្នើសុំអន្តរាគមន៍ ពិនិត្យនៅទីតាំងជម្លោះផ្ទាល់ និង​កោះហៅមន្ត្រីពាក់ព័ន្ធមកធ្វើការសួរ។ តែមកទល់ថ្ងៃទី១៨ ខែសីហានេះ នៅមិនមានកិច្ចអន្តរាគមន៍ ឬផ្តល់​នូវចម្លើយក្នុងការដោះស្រាយនោះនៅឡើយ។

គួកត់សម្គាល់ដែរថា នៅថ្ងៃទី៨ ខែកក្កដា ឆ្នាំ២០១៤ សុរិយោដីខេត្ត បានចេញសេចក្តីសម្រេច​កាត់ដី​ទំហំ​៧៥០ហិកតា នៅស្រុកស្នួលខេត្តក្រចេះ ដាក់ជាដី«រដ្ឋ» ដែលផ្ទុយនឹងការប្រកាសរបស់លោកនាយករដ្ឋមន្ត្រី ហ៊ុន សែន ដែលធា្លប់បានបញ្ជាក់ថា ដីទំហំខាងលើនេះ ត្រូវកាត់ទៅឲ្យអ្នកតវ៉ាជាង៤០០គ្រួសារ ដើម្បី​បញ្ចប់​ជម្លោះ។ មូលហេតុនេះហើយ ដែលជាបញ្ហានាំឲ្យប្រជាពលរដ្ឋទាំងនោះ បន្តការតវ៉ារបស់ខ្លួនរហូតមក​ដល់​ភ្នំពេញនេះ។

ដោយឡែកលោក ខាន់ ចំណាន អភិបាលរងខេត្តក្រចេះ ក៏ធ្លាប់បានលើកបញ្ជាក់កាលពីពេលកន្លងមកថា ជម្លោះដីធ្លីក្នុងខេត្តរបស់លោក បច្ចុប្បន្នកំពុងស្ថិតក្នុងដំណាក់កាលដោះស្រាយ របស់គណៈកម្មការ​សុរិយោ​ដីថ្នាក់ជាតិ។ លោកបានចាត់ទុកខ្លួនលោក ថាជាថ្នាក់មូលដ្ឋាន មិនមានភាពពាក់ព័ន្ធតទៅទៀតឡើយ។  លោកបន្តថា ករណីខាងលើ​នេះ គឺជាការប្ដឹងទាស់ដោយភាគីក្រុមហ៊ុនចំការកៅស៊ូ អឺរ៉ាយហ្សិន ទៅលើ​ប្រជា​ពលរដ្ឋ។

ម៉ោងជាង៩នាទីព្រឹកថ្ងៃទី១៨ ខែសីហា នេះ តំណាងរាស្រ្តបីរូប មកពីគណបក្សសង្គ្រោះជាតិ ក្នុងនោះ​មាន​លោក សុន ឆៃ បានទទួលយកញ្ញត្តិពីប្រជាពលរដ្ឋ ដើម្បីធ្វើការដោះស្រាយហើយ។ ចំណែកខាង​គណបក្ស​ប្រជាជនកម្ពុជា មិនឃើញចេញមកទទួលទេ។ លោកសន្យាក្នុងនាមជាតំណាងរាស្រ្តថា លោកនឹងបន្តតាម និងជួយស្វែងរកដំណោះស្រាយ ជូនពលរដ្ឋរងគ្រោះទាំងអស់។ លោក សុន ឆ័យ បានបញ្ជាក់​យ៉ាងថា៖ «តំណាងប្រជាពលរដ្ឋ ត្រូវតែការពារប្រជាពលរដ្ឋ។ (....) រាល់ការតវ៉ារបស់ប្រជាពលរដ្ឋ ត្រូវតែមាន​ការ​ដោះស្រាយ តាមរយៈក្រុមចម្រុះគណបក្សនយោបាយចុះដល់ទីកន្លែង។ (...) ពិនិត្យមើលពីការអនុវត្ត​កិច្ច​សន្យារបស់ក្រុមហ៊ុនទាំងនោះ រួមទាំងមន្រ្តីមូលដ្ឋានខិលខូចមួយចំនួន។ (...) បើមានរដ្ឋសភាតំណាងរាស្រ្ត ហើយគ្មានការដោះស្រាយបញ្ហាជូនរាស្រ្ត មិនចាំបាច់មានរដ្ឋសភាធ្វើអ្វីទេ។»

បញ្ហានេះសម្រាប់មេបក្សប្រឆាំង លោក សម រង្ស៊ី កាលពីថ្មីៗនេះ ធ្លាប់បានអះអាង និងធានាថា លោក​នឹង​ធ្វើការកោះហៅ អភិបាលខេត្តក្រចេះ មកសួរនាំជាសាធារណៈ នៅចំពោះមុខរដ្ឋសភា ពាក់ព័ន្ធនឹងករណី ជម្លោះដីធ្លីក្នុងស្រុកស្នួល ខេត្តក្រចេះនេះដែរ។

ការទាមទារ និងការហែរញត្តិរបស់ប្រជាពលរដ្ឋទាំងនេះ នៅថ្ងៃទី១៨ ខែសីហា ឆ្នាំ២០១៤ ត្រូវបានរារាំង និង​រំខានពី​សំណាក់ក្រុមសន្តិសុខខណ្ឌ រួមទាំងកម្លាំងចម្រុះរបស់ជាតិនោះផង។ ក្រុមសមត្ថកិច្ចទាំងនោះ​ត្រូវ​បានគេមើលឃើញថា បានប្រើប្រាស់​អំពើ«ហឹង្សា» បង្ក្រាបមកលើក្រុមអ្នកហែរញាត្តិ ពេលដែលការ​ដង្ហែ​ក្បួនបានមកដល់ផ្ទះលោកនាយករដ្ឋមន្រ្តី ហ៊ុន សែន។ ការបង្ក្រាបដោយដំបងឆក់ នៃក្រុម​សន្តិសុខ​ទាំង​នោះ បានបណ្តាលឲ្យប្រជាពលរដ្ឋមួយចំនួនធំ រងរបួស ក្នុងនោះក្មេងប្រុសម្នាក់ (អាយុ​ប្រហែល​ក្រោម​បីឆ្នាំ) ត្រូវបានឆក់រហូតដល់សន្លប់៕