ជាព្រឹត្តិការណ៍ដែលនឹកស្មានមិនដល់ ហើយបានកើតឡើងកាលពីថ្ងៃពុធកន្លងទៅនេះ នៅក្នុងស្ថានីយ​រថភ្លើង​រត់​លើ​ដី នៃទីក្រុងផើដ (Perth) ភាគខាងលិចនៃប្រទេសអូស្ត្រាលី។ បុរសម្នាក់ជាអ្នកដំណើរ ដែលត្រូវបានរថភ្លើង​គាប​ជាប់​ត្រង់ភ្លៅ បានរួចខ្លួនមកវិញដោយសារកម្លាំងរួមគ្នា រវាងក្រុមមនុស្សជាច្រើន ចាប់លើករថភ្លើងនោះឡើង។

ជនរងគ្រោះជាប់ជើង និងក្រុមមនុស្សលើករថភ្លើង។ (រូបថត twitter)

ទស្សនាវដ្ដីមនោរម្យ.អាំងហ្វូ បានស្វែងរកព្រឹត្តិការណ៍ដ៏កម្រៗ កើតមានពីគ្រប់ទីកន្លែងក្នុងលោក មកជូន​ប្រិយ​មិត្ត​អ្នកអានរបស់ខ្លួន។

ពីនេះពីនោះ - លោក ដេវិដ ហ៊ិន (David Hynes) អ្នកនាំពាក្យរបស់ស្ថាប័នដឹកជញ្ជូន នៅទីក្រុងផើដ បានថ្លែងប្រាប់​បណ្ដាញវិទ្យុនិងទូរទស្សន៍ អេប៊ីស៊ី (ABC) ថា៖ «ភ្លាមៗនោះ យើងបានបញ្ជូនសញ្ញាអាសន្ន ទៅកាន់អ្នកបើករថភ្លើង កុំឲ្យបន្តដំណើររថភ្លើង ទៅមុខទៀត»។ លោកបានអះអាងទៀត ពីហេតុការណ៍នេះថាបានបញ្ចប់ទៅ ដោយក្ដី​មោទនៈ​ជាទីបំផុត ជាមួយនឹងពាក្យពន្យល់ដូច្នេះថា៖ «ម​នុស្សទាំងអស់គ្នា នាំគ្នាចុះចេញពីរថភ្លើង ហើយបាន​រួម​គ្នា​លើករថភ្លើងឲ្យហើបឡើង»។

បើតាមគេហទំព័រ Buzzfeed បានរាយការណ៍ថា ការរុញបង្ហើបរថភ្លើង ដែលមានទំងន់រាប់សិបតោននេះ ត្រូវបាន​ធ្វើ​ពីរដង ទើបសម្រេចជួយសង្គ្រោះជនរងគ្រោះ ដែលជាប់ជើងរវាងរថភ្លើង និងគែបផ្លូវរថភ្លើង នៅក្រោមសម្លេងទះដៃ​ដ៏កងរំពង។ បុរសដែលធ្លាក់ជើងមួយចំហៀង បង្កការភ្ញាក់ផ្អើលនេះ ត្រូវបានក្រុមអ្នកជួយសង្គ្រោះពិនិត្យ​ព្យាបាល​ភ្លាមៗ នៅនឹងកន្លែង មុននឹងបន្តដំណើរទៅមុខទៀត ដោយសុវត្ថិភាព។

អ្នកទទួលខុសត្រូវម្នាក់ទៀត របស់ស្ថាប័នដឹកជញ្ជូន បានសម្ដែងប្រតិកម្មដែរថា៖ «ជាលើកទីមួយហើយ ដែល​យើង​បានឃើញរឿងបែបនេះ។ ជាគំរូយ៉ាងពិសេស នៃការជួយគ្នាទៅវិញទៅមក ហើយខ្ញុំជឿថា នៅពេលហ្វូងមនុស្ស​ប្រមូលគ្នាជាកម្លាំង វាពិតជាមានឥទ្ធិពលណាស់។»៕

វីដេអូទាំងស្រុង នៃព្រឹត្តិការណ៍នេះ៖