កុមារអាយុ១១ឆ្នាំមួយរូប បានបាត់ដៃរបស់ខ្លួនមួយចំហៀង ដោយសារតែចង់លលេងជាមួយនឹងសត្វខ្លា ដែលគេ​ចិញ្ចឹមទុកនៅក្នុងសួនសត្វ។ ឪពុករបស់កុមារនេះ ទំនងជាបានជួយឲ្យកុមារឆ្លងរបងសុវត្ថិភាព ដើម្បីអាចចូលទៅ​ជិតសំណាញ់ ដែលស្ថិតនៅជាប់ជាមួយនឹងសត្វខ្លា។

សត្វខ្លា ដែលទុកសម្រាប់សម្ដែងសៀក។ (រូបជំនួស)

ទស្សនាវដ្ដីមនោរម្យ.អាំងហ្វូ បានស្វែងរកព្រឹត្តិការណ៍ដ៏កម្រៗ កើតមានពីគ្រប់ទីកន្លែងក្នុងលោក មកជូន​ប្រិយ​មិត្ត​អ្នកអានរបស់ខ្លួន។

គ្រោះថ្នាក់រន្ធត់ - អ្វីៗបានហួសអស់ទៅហើយ។ ការកំសាន្ដនៅសួនសត្វដើម្បីសប្បាយ តែបែរជាប្រែក្លាយជារឿង​ដ៏រន្ធត់ជាទីបំផុត សម្រាប់ជីវិតរបស់កុមារម្នាក់នេះ។ មានអាយុ១១ឆ្នាំ កុមារជាតិប្រេស៊ីលម្នាក់នេះ មានបំណង​យ៉ាង​ខ្លាំងចង់លលេង និងចូលទៅស្ទាបសត្វខ្លា នៅក្នុងសួនសត្វ កាស្កាវែល (Cascavel) ក្នុងក្រុងប៉ារ៉ាណា (Parana) ផ្នែក​ខាងត្បូងនៃប្រទេសប្រស៊ីល។ ប្រព័ន្ធផ្សព្វផ្សាយក្នុងស្រុក បានអះអាងថា កុមារនេះ និងប្អូនប្រុសម្នាក់ទៀត អាយុ​៣ឆ្នាំ ទំនងជាត្រូវបានឪពុករបស់ពួកគេ ជួយឲ្យឆ្លងរបងសុវត្ថិភាព ចូលទៅកៀកនឹងសំណាញ់ ដែលឃាំងសត្វខ្លាដ៏​កំណាច​នោះ។

ការលលេង ដែលបានដាក់ខ្លួនកុមារ ទៅក្នុងល្បែងគ្រោះថ្នាក់មួយដ៏ហួសប្រមាណ។ មនុស្សដទៃទៀតនៅក្បែរនោះ ក៏បាននិយាយប្រការមុន ទៅឪពុករបស់កុមារដែរថា កូនខ្លួនទាំងពីរបានចូលទៅក្នុងតំបន់ហាមឃាត់។

ដើមដៃមួយចំហៀងរបស់កុមារ ត្រូវបានហែកស៊ីដោយសត្វខ្លា ក្រោមក្រសែភ្នែកដ៏រន្ធត់របស់ឪពុករបស់កុមារ ដែល​បានស្ទុះទៅត្រកងកូន ចេញមកដាក់នៅលើស្មៅ រងចាំការជួយសង្គ្រោះ។ កុមាររងគ្រោះ ត្រូវបានបញ្ជូនទៅកាន់​មន្ទីរពេទ្យជាបន្ទាន់។ ប៉ុន្តែបើទោះជា បានទទួលការវះកាត់ច្រើនដងយ៉ាងណាក៏ដោយ ក៏គ្រូពេទ្យចាំបាច់​ត្រូវកាត់ដៃ​កុមារមួយចំហៀងនេះ ចេញដែរ។

ចំណែកឯនាយកគ្រប់គ្រងសួនសត្វវិញ បានបញ្ជាក់ទៅបណ្ដាញសារព័ត៌មានថា នៅពេលកើតហេតុនេះ ក្រុមអ្នក​យាមបានធ្វើការងារល្បាតរបស់ពួកគេ តែការល្បាតនោះ បានធ្វើហួសទៅកាន់កន្លែងផ្សេងទៀត នៃសួនសត្វ៕

វីដេអូខាងក្រោម អាចប៉ះពាល់ដល់អារម្មណ៍ ដល់កុមារនិងអ្នកមានជំងឺបេះដូង៖