ទឹកភ្នែកស្ត្រីខ្មែរ នៅតែត្អូញត្អែរមិនឈប់ ពីការជួញដូរមនុស្ស កម្លាំងពលកម្ម និងផ្លូវភេទ ដែលជារឿយៗត្រូវ​បានធ្វើ​ឡើង តាមរូបភាពអាពាហ៍ពិពាហ៍រវាងស្រ្តីខ្មែរ ជាមួយបុរសបរទេស។ ករណីនេះ បានផ្ទុះជាថ្មីទៀត ដោយសារស្ត្រី​បីរូប ដែលបានអះអាងថា ខ្លួនជាជនរងគ្រោះនោះ បានថ្លែងបរិហាជាថ្មី ពីបុរសជាតិចិនជាស្វាមី មានចិត្តអប្រិយ​ទុរយស យកពួកនាងទៅធ្វើបាប យ៉ាងទារុណ។ អ្វីដែលនាងឈឺចាប់ខ្លាំងបំផុតនោះ ពួកនាងត្រូវបានបណ្ដាញបោក​ប្រាស់មួយ ហៅថា«មេខ្យល់» ជាអ្នករៀបចំអាពាហ៍ពិពាហ៍ទាំងនេះឡើយ។

របាយការណ៍ស្ដីអំពីការជួញដូរមនុស្ស កម្លាំងពលកម្ម និងផ្លូវភេទ។ (រូបថត MONOROOM.info/ S. Tith)

ស្ត្រីខ្មែរ - «គេទិញអស់លុយច្រើនណាស់ គេឲ្យធ្វើអី ធ្វើតាមគេទៅ។» នេះជាសម្ដីរបស់ស្វាមីជាតិចិន ស្រង់មក​បញ្ជាក់​ដោយស្ត្រីប្រពន្ធជាតិខ្មែរ ដែលជាជនរងគ្រោះទាំងបីនាក់ ដែលនិយាយក្នុងល័ក្ខខ័ណ្ឌ មិនបញ្ចេញឈ្មោះ នៅ​ក្នុងសន្និសីទសារព័ត៌មាន កាលពីព្រឹកថ្ងៃទី៣០ ខែកក្កដា ឆ្នាំ២០១៤នេះ ក្នុងទីស្នាក់ការនៃសមាគម អាដហុក។ ថ្លែង​ជា​មួយនឹងទឹកភ្នែក ស្ត្រីរងគ្រោះបាននិយាយថា ខ្លួនត្រូវបានមេខ្យល់ ដកយកលិខិតឆ្លងដែន ទូរស័ព្ទសម្រាប់​ទំនាក់​ទំនង និងបានឃុំខ្លួនក្នុងបន្ទប់ មិនឲ្យចេញទៅណាឡើយ។

សេចក្តីថ្លែងការណ៍ របស់សមាគមអាដហុក ចុះថ្ងៃទី៣០ ខែកក្កដានេះ បានឲ្យដឹងថា ការជួញដូរមនុស្ស​ក្នុងដើម​ឆ្នាំ​២០១៤ មកទល់ពេលនេះ មានចំនួនរហូតដល់១០៨ករណី សរុបជនរងគ្រោះ មានចំនួន២៩៥នាក់។ ដោយឡែក​សម្រាប់ប្រទេសចិន ក្រោមរូបភាពអាពាហ៍ពិពាហ៍ តាមរយៈការបោកបញ្ឆោត របស់មេខ្យល់មានចំនួន២៦ករណី ស្មើនឹង២៩នាក់នៃជនរងគ្រោះជាស្រ្តី។ ស្រ្តីរងគ្រោះទាំងនោះ ភាគច្រើនត្រូវបានរងនូវការគម្រាមកំហែង ការធ្វើ​ទារុណកម្ម ផ្លូវកាយ ផ្លូវចិត្ត ផ្លូវភេទ ការបង្អត់អាហារ និងបានចាត់ទុកស្រ្តីទាំងនោះជាទាសករជាដើម។

ក្នុងសន្និសីទសារព័ត៌មានដដែលនោះ របស់លោក អ៊ិន គារ អគ្គលេខាធិការសមាគមអាដហុក បានបញ្ជាក់បន្ថែមថា ជនរងគ្រោះភាគច្រើនចាញ់បោក«មេខ្យល់» ដោយរៀបអាពាហ៍ពិពាហ៍​ជាមួយ​ជន​បរទេស (ចិន)។ លោកបានឲ្យ​ដឹង​ទៀតថា ក្រោយពីបានចូលទៅដល់ទឹកដីប្រទេសចិន ពួកគេរស់នៅជាមួយនឹង​ការធ្វើទារុណកម្មទាំងផ្លូវកាយ ផ្លូវចិត្ត ផ្លូវភេទ។ មិនតែប៉ុណ្ណោះពួកគេ (ស្រ្តីរងគ្រោះ) ថែមទាំងត្រូវបានបង្អត់អាហារ និងការបង្ខំឲ្យធ្វើការផ្ទះដូច«ទាសករ»។

ស្រ្តីដែលជាជនរងគ្រោះ បានធ្វើការអំពាវនាវទៅកាន់ស្ត្រីខ្មែរទាំងអស់ថា៖ «សូមឲ្យនារីខ្មែរទាំងអស់ កុំទៅឲ្យសោះ ប្រទេសចិន កុំទៅដាច់ខាត គឺវេទនាណាស់។ សូមស្រ្តីខ្មែរប្រយ័ត្ន កុំឲ្យចាញ់បោកមេខ្យល់ តាមការរៀបអាពាហ៍​ពិពាហ៍​ជាមួយប្តីជនជាតិចិន។» តែសេចក្ដីអំពាវនាវនេះ មិនមែនជាលើកទីមួយទេ ហើយវាពិបាកនឹងធ្វើឲ្យ​មាន​ប្រសិទ្ធិភាព និងមានការជ្រួតជ្រាប ទៅដល់ស្ត្រីខ្មែរជាច្រើន ដែលមានជីវភាពគ្រួសារតូចទាប ក្រខ្សត់ និងស្ថិតនៅ​តំបន់​ដាច់ស្រយាល។ ហើយករណីនេះ​ លោក អ៊ិន គារ បានថ្លែងអះអាងថា សមាគមអាដហុក បានធ្វើអន្តរាគមន៍ ទៅ​តាមស្ថានប័នពាក់ព័ន្ធនានា ដែលរួមមាន ក្រសួងការបរទេសកម្ពុជា ក្រសួងការងារ ក្រសួងមហាផ្ទៃ ស្ថានទូត/​ស្ថាន​កុងស៊ុលនានា ដើម្បីឲ្យជួយចាត់វិធានការ។

ប៉ុន្តែមិនខុសពីលើកមុនៗទេ មន្រ្តីនៃក្រសួងការបរទេស ក៏ដូចជាក្រសួងមហាផ្ទៃកម្ពុជាវិញ ក៏បានស្នើឲ្យជនរងគ្រោះ​ទាំងអស់ ឬគ្រួសារនៃជនរងគ្រោះទាំងនោះ ត្រូវមកដាក់ពាក្យបណ្តឹងដោយផ្ទាល់ មកស្ថាប័នពាក់ព័ន្ធ ដើម្បីមាន​វិធានការ ក្នុងការវែកមុខ ឬស្វែងរកការចាប់ខ្លួន«មេខ្យល់»ទៅផ្តន្ទាទោសតាមផ្លូវច្បាប់៕