ស្នាមញញឹមរបស់សិស្សសាលា នៅកម្ពុជា។ (រូបថត ឯកសារ)

អប់រំ - ដើម្បីដំណើរការនៃការប្រឡងបាក់ឌុប ប្រព្រឹតទៅ ដោយមានការគោរពគោលការណ៍ច្បាប់ យុត្តិធម៍ តម្លាភាព និង​ទទួលបានលទ្ធផលល្អ ក្រសួង អប់រំ យុវជន និងកីឡា បានតម្រូវឲ្យបេក្ខជនទាំងអស់ ដែលកំពង់ត្រៀមខ្លួនចូលរួមការប្រឡងនេះ ហាមនាំយកគ្រឿងអេឡិចត្រូនិចគ្រប់ប្រភេទ ចូលក្នុងមណ្ឌលប្រឡង ឫបន្ទប់ ប្រឡង ជាដាច់ខាត។

ប្រសិនបើឃើញមានឧបករណ៍ ដែលត្រូវបានហាមឃាត់ ដូចសេចក្តីណែនាំខាងលើ ក្រសួងនឹងចាត់ទុកករណីនេះ ថាជាការប្រព្រឹត្តសកម្មភាពផ្ទុយ នឹងបទបញ្ញតិនៃការប្រឡង និងកម្រិតវិន័យចំពោះបេក្ខជន ដោយកំណត់ឲ្យធ្លាក់ ជាស្វ័យប្រវត្តិ។

ក្រសួង អប់រំ យុវជន និងកីឡា បានបញ្ជាក់ទៀតថា បេក្ខជនដែលមានឈ្មោះចូលរួមក្នុងការប្រឡង រាប់ទាំងថ្នាក់វិទ្យាសាស្រ្ត និងវិទ្យាសាស្ត្រសង្គម ឆ្នាំនេះមានចំនួន សរុប ៩៣ ៤៥៦នាក់ និងមានបណ្ឌលប្រឡងចំនួន ១៥៤ មណ្ឌល ចែកជា ៣៧៧៩ បន្ទប់ នៅរាជធានីភ្នំពេញ ខេត្តទូទាំងប្រទេស នៃព្រះរាជាណាចក្រកម្ពុជា។

សំរាប់រាជធានីភ្នំពេញ លទ្ធផលនៃការប្រឡង នឹងត្រូវគ្រោងចេញជាផ្លូវការ នៅថ្ងៃទី ២៩ ខែ សីហា ឆ្នាំ២០១៤ និងនៅខេត្តកណ្តាល និងមណ្ឌលប្រឡង តាមបណ្តាខេត្តផ្សេងទៀត លទ្ធផលនឹងចេញនៅថ្ងៃទី ៣០ ខែសីហា ឆ្នាំ២០១៤ ខាងមុខ ដូចដែលមានចែងនៅក្នុងសេចក្តីប្រកាសខាងលើនេះ៕