«តុក្កតាសាច់មនុស្ស» បានកើតម្នាក់ទៀតហើយ។ កញ្ញា អាលីណា កូវ៉ាឡេស្កាវ៉ា (Alina Kovalevskaya) បាន​ទាមទារ​តំណែង ជា«បវរកញ្ញាតុក្កតា»មកខ្លួនម្ដងវិញ ប៉ុន្តែនាងបានអួតអាងថា នាងមាន​លក្ខណៈ«ធម្មជាតិ»​ច្រើន​ជាងបវរកញ្ញាលើកមុន។

នាង អាលីណា កូវ៉ាឡេស្កាវ៉ា ជាតិអ៊ុយក្រែន។ (រូបថត ហ្វេសប៊ុក)

សម្ផស្ស - សង្គ្រាមរវាង «បវរកញ្ញាតុក្កតា» បានកើតឡើងមែនឬ? បន្ទាប់ពីកញ្ញា វ៉ាឡេរីយ៉ា អៀកយ៉ាណូវ៉ា (Valeria Iukyanova) ដែលជាប់ក្នុងតំណែងនេះ តាំងពីប៉ុន្មានឆ្នាំមុន ឥឡូវនេះ កញ្ញាស្រស់ស្អាតម្នាក់ទៀត នាង អាលីណា កូវ៉ាឡេស្កាវ៉ា បានចេញមកទាមទារតំណែងនេះវិញ ដោយបានអួតអាងថា នាងមានលក្ខណៈ​ធម្មជាតិ​សឹងតែទាំងអស់ ហើយថែមទាំងស្បថថា មិនដែលត្រូវបានគ្រូពេទ្យកែសម្ផស្សណាម្នាក់ ប៉ះខ្លួននាងឡើយ។

នាង អាលីណា ជាតិអ៊ុយក្រែន ដែលមានមុនមាត់រូបរាង មិនខុសប៉ុន្មានពីតុក្កតាជ័រ ដែលគេធ្លាប់ឃើញនៅតាមទីផ្សារ ឬរូបភាព​គំនូរជីវចលនោះ បានថ្លែងថា៖ «ខ្ញុំចូលចិត្តភ្នែកធំៗ ច្រមុះតូច បបូរមាត់តូច និងសក់វែងអូសដី»។ ក្នុងកិច្ច​សម្ភាស​ជាមួយស្ថានីយទូរទស្សន៍មួយ ស្រីស្អាតចង្កេះស្តួច បានអួតអាងទៀតថា៖ «សក់របស់នាងខ្ញុំ មានប្រវែង​១ម៉ែត្រ ហើយមានពណ៌គួរឲ្យចាប់ចិត្តបេតីណាស់»។

កុំឲ្យតុក្កតា«រស់»ទាំងពីរ ជួបគ្នាឲ្យសោះ ...

ឆ្លើយតបនឹងសំណួររបស់អ្នកសារព័ត៌មាន ទាក់ទងនឹងកញ្ញា វ៉ាឡេរីយ៉ា អៀកយ៉ាណូវ៉ា ដែលទទួលតំណែង​ជា​«តុក្កតា​រស់»បានមុននោះ កញ្ញា អាលីណា បាននិយាយថា៖ «ខ្ញុំមានរឿងយល់ច្រឡំបន្ដិចបន្តួច ជាមួយ វ៉ាឡេរីយ៉ា។ បន្ទាប់មក យើងក៏ឈប់និយាយរកគ្នា។ ខ្ញុំបានដឹងច្បាស់ថា នាងមិនមែនជាមនុស្ស ដែលខ្ញុំគិតថាជាមិត្ត​របស់​ខ្ញុំនោះ​ទេ។» ការអះអាងរបស់ស្រីស្រស់ អាលីណា ធ្វើឲ្យគេយល់ថា «សង្គ្រាម»រវាងតុក្កតារស់ទាំងពីរ ពិតជាបានកើត​មាន​មែន ហើយមិនត្រូវឲ្យអ្នកទាំងពីរជួបគ្នាឲ្យសោះ។

ប៉ុន្តែសម្រាប់មហាជនវិញ នៅក្នុងពេលនេះ អ្នកដែលគេចូលចិត្ត និងស្គាល់ច្រើនជាងគេ វាត្រូវតែធ្លាក់ទៅលើកញ្ញា វ៉ាឡេរីយ៉ា ដែលទទួលតំណែងនេះមុនហើយ។ គ្រាន់តែនៅក្នុងទំព័រហ្វេសប៊ុកផ្លូវការ របស់នាង វ៉ាឡេរីយ៉ា មាន​មនុស្សចុចចូលចិត្តដល់ទៅ ជាងមួយលាននាក់ ខណៈទំព័រហ្វេសប៊ុករបស់កញ្ញា អាលីណា មានអ្នកចុចចូលចិត្ត ទើបតែជិត៥ពាន់នាក់ប៉ុណ្ណោះ។ ប៉ុន្តែជារឿងធម្មតាទេ នៅពេលដែលនាង អាលីណា ទើបនឹងបង្កើតទំព័ររបស់ខ្លួន ហើយការប្រកាសខ្លួន ចូលរួមប្រកួតប្រជែង ជា«បវរកញ្ញាតុក្កតា» ក៏ទើបនឹងចាប់ផ្ដើមដែរនោះ។ យ៉ាងណាក៏ដោយ​ តំណែងជា«តុក្កតារស់» ឬជា«បវរកញ្ញាតុក្កតា» នឹងត្រូវទុកឲ្យប្រិយមិត្តហើយ ជាអ្នកសម្រេច៕

សូមទស្សនារូបភាព និងវីដេអូបន្ថែម ដូចខាងក្រោម៖