បន្ទាប់ពីត្រូវបានសហព័ន្ធបាល់ទាត់អន្តរជាតិ (Fifa) ផ្អាកលែងឲ្យចូលប្រកួត ចំនួន៩លើក និងមិនឲ្យប៉ះបាល់៤ខែ នោះមក កីឡាករ ល្វី ស្វារ៉េស (Luis Suarez) បានព្យាយាមការពារភាពគ្មានកំហុសរបស់ខ្លួន នៅក្នុងសំបុត្រមួយ ផ្ញើរ​ទៅកាន់ហ្វីហ្វា។ ប៉ន្តែបើទោះជាកីឡាករសាកល្បង ស្វែងរកកិត្តិយសរបស់ខ្លួន ត្រឡប់មកវិញក៏ដោយ តែនៅ​ក្នុង​ប្រព័ន្ធអាំងធើណែត រូបភាពចំអកជាច្រើន ត្រូវបានផ្សព្វផ្សាយយ៉ាងព្រោងព្រាត។ ពីក្នុងចំណោមនោះ រូបភាព​មួយ​ចំនួន បាន​ធ្វើឲ្យអ្នកតាមដានព្រឹត្តិការណ៍ពិភពលោក ទប់មិនផ្ទុះសំណើចមិនបាន។

សួនបន្លាចរបស់ ល្វី ស្វារ៉េស។ (រូបភាពលើបណ្ដាញអ៊ិនធើណែត)

បាល់ទាត់ពិភពលោក - កីឡាករជាតិអ៊ុយរ៉ាហ្គាយ ល្វី ស្វារ៉េស បានព្យាយាមជាថ្មីការពារខ្លួន នៅចំពោះ​សហព័ន្ធ​បាល់ទាត់អន្តរជាតិ ហៅកាត់ថា ហ្វីហ្វា (Fifa) ដែលបានដាក់ពិន័យខ្លួនយ៉ាងធ្ងន់ធ្ងរ បន្ទាប់ពីជំនួបប្រកួត​រវាងក្រុម​ជម្រើសជាតិអ៊ុយរ៉ាហ្គាយ និងអ៊ីតាលី ហើយកីឡាកររូបនេះត្រូវបានគេមើលឃើញថា បាន«ខាំ»កីឡាករគូរប្រជែង ជ័រជរ ឈៀលីនី (Giorgio Chiellini) នៅនាទី៨០។

សូមអានអត្ថបទ ដែលបកស្រាយពីព្រឹត្តិការណ៍នេះឡើងវិញ ដោយចុចលើទីនេះ។

នៅក្នុងលិខិតមួយផ្ញើរទៅកាន់ ហ្វីហ្វា នៅថ្ងៃទី២៨ខែមិថុនានេះ កីឡាករខ្សែប្រយុទ្ធជាតិ អ៊ុយរ៉ាហ្គាយ របស់ក្រុម​បាល់​ទាត់អាជីពអង់គ្លេស លីវើភូល (Liverpool) បានសរសេរជាអាថ៌ថា៖ «បន្ទាប់ពីបានប៉ះជាមួយ ឈៀលីនី ខ្ញុំបាន​បាត់​បង់លំនឹង ហើយបានជ្រុលជំហរទៅលើគាត់។ មុខរបស់ខ្ញុំបានបុកទៅលើស្មារបស់ឈៀលីនី ហើយខ្ញុំ​មានអារម្មណ៍​ថា ឈឺធ្មេញយ៉ាងខ្លាំង។ (...) អ្វីដែលបានកើតឡើងពិតប្រាកដ មិនមែនដូចអ្វីដែលខ្ញុំបានអាន និងបានស្ដាប់ឮនោះ​ទេ។»

យ៉ាងណាក៏ដោយ លិខិតសរសេរការពារខ្លួននេះ មិនសូវជាមានលក្ខណៈគួរឲ្យជឿជាក់ប៉ុន្មានឡើយ។ តែ​នៅ​ក្នុង​បណ្ដាញអ៊ិនធើណែតវិញ រូបភាពជាច្រើនស្ដីពីហេតុការណ៍«ខាំ»របស់កីឡាករស្វារ៉េស ត្រូវបានបង្ហោះព្រោងព្រាត។ រូបខ្លះត្រូវបានយកទៅបន្ថែមបន្ថយ រូបខ្លះទៀតត្រូវបានយកទៅបន្ថែមចំណងជើង ដែលធ្វើព្រឹត្តិការណ៍ដ៏អស្ចារ្យ នៃ​ការខាំរបស់កីឡាករ មិនមាននរណាគិតថា នោះគ្រាន់តែជាការ«ជ្រុលជំហរ»នោះទេ។ ជាពិសេស នៅពេលដែល ស្វារ៉េស ធ្លាប់បានប្រព្រឹត្តិកំហុសនេះពីរដងរួចមកហើយ កាលពីពេលទាត់ឲ្យក្រុមមួយនៅប្រទេសហូឡង់ និង​​ក្រុម​ហង្សក្រហម (លីវើភូល) នៅប្រទេសអង់គ្លេស។

ចង់ដឹងថា រូបភាពទាំងនោះមានលក្ខណៈ និងខ្លឹមសារបែបណាខ្លះ សូមទស្សនាដូចតទៅ៖