តើអ្នកដឹងថា តើគ្រូបង្វឹកនៃក្រុមបាល់ទាត់ ទាំង៣២ ទទួលបានប្រាក់ឈ្នួលប្រចាំឆ្នាំប៉ុន្មានដែរឬទេ? ក្នុងចំណោម​គ្រូ​បង្វឹកទាំងនោះ តើគ្រូបង្វឹកណាមួយ ដែលទទួលបានប្រាក់ឈ្នួលច្រើនជាងគេ និងតិចជាងគេ?

គ្រូបង្វឹកជាតិអ៊ីតាលី របស់ក្រុមបាល់ទាត់រ៉ូស្សី។ (រូបថត ហ្វីហ្វា)

បាល់ទាត់ពិភពលោក - គ្រូបង្វឹកមានតួនាទីច្រើន (អ្នកបង្ហាត់ អ្នកសម្រេចយុទ្ធសាស្ត្រ អ្នកជ្រើសកីឡាករឲ្យ​ចូល​ប្រកួត...) នៅក្នុងក្រុមបាល់ទាត់។ ប៉ុន្តែបើគេសរុបមកឲ្យខ្លី គ្រូបង្វឹកមានតួនាទី ជាអ្នកទទួលខុសត្រូវស្របច្បាប់ ផ្នែក​បច្ចេកទេស នៅចំពោះសហព័ន្ធបាល់ទាត់អន្តរជាតិ ហៅកាត់ ហ្វីហ្វា (FIFA)។ គ្រូបង្វឹកណាដែលស្គាល់​យុទ្ធសាស្ត្រ និងស្គាល់បច្ចេកទេសខាងបាល់ទាត់ បានកាន់តែច្រើនកាលណា គ្រូបង្វឹកនោះនឹងមាន​សង្ឃឹម​នាំ​ជ័យជំនះ ឲ្យក្រុម​បាល់ទាត់នោះកាន់តែខ្លាំង។

ដូច្នេះ បើគ្រូបង្វឹកមានតួនាទីច្រើន និងជាអ្នកទទួលខុសត្រូវ ក្នុងការស្វែងរកជ័យជំនេះ ឲ្យក្រុមបាល់ទាត់ ដែលនាំ​ភាព​សប្បាយរីករាយ ឲ្យប្រទេសមួយទាំងមូលនោះ តើគេគួឲ្យប្រាក់ឈ្នួល ទៅគ្រូបង្វឹកទាំងនោះក្នុងកម្រិតណា? រួចចុះ​ពី​ក្នុង​ចំណោមគ្រូបង្វឹក នៃក្រុមបាល់ទាត់មកពី៣២ប្រទេស ដែលមកជួបគ្នាប្រកួត នៅបាល់ទាត់ពិភពលោក​ឆ្នាំ២០១៤​ទាំង​នេះ តើគ្រូបង្វឹកណាមួយ ទទួលបានប្រាក់ឈ្នួលបានច្រើនជាងគេ?

ទទួលឯកត្តកម្ម រួចជាស្រេច ...

ចំណាត់ថ្នាក់ទីមួយ ដែលទទួលបានប្រាក់ឈ្នួលប្រចាំឆ្នាំ បានរហូតដល់ទៅ ១១,២លានដុល្លាអាមេរិក ត្រូវបានផ្ដល់​ទៅឲ្យគ្រូបង្វឹករបស់ក្រុមបាល់ទាត់រ៉ូស្សី។ លោក ហ្វាប៊ីយ៉ូ កាពើឡូ (Fabio Capello) ជនជាតិអ៊ីតាលី បានក្លាយជា​គ្រូ​បង្វឹកដែលមានប្រាក់ឈ្នួល ក្នុងមួយឆ្នាំ បានច្រើនជាងគេពីក្នុងចំណោមគ្រូបង្វឹក នៃក្រុមបាល់ទាត់ដែលមកប្រកួត ក្នុងបាល់ទាត់ពិភពលោកឆ្នាំ២០១៤នេះ។ បើទោះជាក្រុមបាល់ទាត់រ៉ូស្សី ដែលលោកដឹកនាំនោះ មិនប្រាកដថា អាច​យក​ពានរង្វាន់ពិភពលោកបានក៏ដោយ តែខ្លួនលោកផ្ទាល់បានទទួលឯកត្តកម្មនេះ រួចជាស្រេចហើយ។

ចំណាត់ថ្នាក់ទីពីរ បានទៅលើលោក រ៉យ ហូដសុន (Roy Hodgson) ដែលជាគ្រូបង្វឹករបស់ក្រុមអង់គ្លេស។ លោក ហូដសុន ទទួលបានប្រាក់ប្រចាំឆ្នាំ ប្រមាណជា ៥,៨លានដុល្លារ។ ចំណាត់ថ្នាក់បន្ទាប់មកទៀត ដែល​ទទួល​បាន​ប្រាក់​ឈ្នួល ៤,៣លានដុល្លារ ជាគ្រូបង្វឹករបស់ក្រុមអ៊ីតាលី លោក សេស្សា ប្រេនឌឺលី (Cesare Prandelli)។

ចំណែកគ្រូបង្វឹកដែលក្រជាងគេ នៅក្នុងចំណោមអ្នក៣២នាក់នេះ បានធ្លាក់ទៅលើគ្រូបង្វឹករបស់ក្រុមម៉ិកស៊ិក លោក ម៉ៃហ្គើល ហេរ៉េរ៉ា (Miguel Herrera)។ លោក ហេរ៉េរ៉ា ទទួលបានប្រាក់ឈ្នួលត្រឹមតែ ២០៩ ៨១០ដុល្លាប៉ុណ្ណោះ ក្នុង​មួយឆ្នាំ។ ចំនួនទឹកប្រាក់នេះ មានទំហំ២១ដង ច្រើនជាងប្រាក់ឈ្នួល ដែលជនជាតិម៉ិកស៊ិកធម្មតាម្នាក់រកបាន តែមិន​បានស្មើនឹងប្រាក់ឈ្នួល របស់លោក ហ្វាប៊ីយ៉ូ កាពើឡូ មួយអាទិត្យផង៕

សម្រាប់លោកអ្នក ដែលចង់ដឹងពីចំណាត់ថ្នាក់ទាំងស្រុង នៃគ្រូបង្វឹករបស់ក្រុមបាល់ទាត់ទាំង៣២ ដែលមកជួប​ប្រកួត​នៅក្នុងប្រទេសប្រេស៊ីល ឆ្នាំ២០១៤នេះ សូមអញ្ជើញតាមដានតារាងខាងក្រោមទាំងស្រុង ដូចតទៅ៖

១. Fabio Capello, រ៉ូស្សី - $11,235,210

២. Roy Hodgson, អង់គ្លេស - $5,874,570

៣. Cesare Prandelli, អ៊ីតាលី - $4,322,010

៤. Luiz Felipe Scolari, ប្រេស៊ីល - $3,973,730

៥. Ottmar Hitzfeld, ស្វីស - $3,745,130

៦. Joachim Löw, អាល្លឺម៉ង់ - $3,602,460

៧. Vicente del Bosque, អេស្ប៉ាញ - $3,386,270

៨. Louis van Gaal, ហូឡង់ - $2,738,060

៩. Alberto Zaccheroni, ជប៉ុន - $2,727,480

១០. Jurgen Klinsmann, សហរដ្ឋអាមេរិក - $2,621,740

១១. Didier Deschamps, បារាំង - $2,161,000

១២. Paulo Bento, ព័រទុយហ្គាល - $2,160,170

១៣. Carlos Queiroz, អ៊ៀរ៉ង់ - $2,098,060

១៤. Jorge Sampaoli, ឈីលី - $1,774,960

១៥. Jose Pekerman, កូឡំប៊ី - $1,678,450

១៦. Ange Postecoglou, អូស្ត្រាលី - $1,395,300

១៧. Óscar Tabárez, អ៊ុយរ៉េហ្គាយ - $1,258,840

១៨. Sabri Lamouchi, កូដឌីវ័រ - $1,037,450

១៩. Vahid Halilhodžić, អាល់ហ្សេរី - $1,007,070

២០. Marc Wilmots, ប៊ែលហ្សិក - $864,400

២១. Fernando Santos, ក្រិច - $864,400

២២. Alejandro Sabella, អាហ្សង់ទីន - $818,240

២៣. Hong Myung-bo, កូរ៉េខាងត្បូង - $795,250

២៤. Luis Fernando Suárez, ហុងឌុយរ៉ាស - $629,420

២៥. Reinaldo Rueda, អេក្វាទ័រ - $566,480

២៦. Jorge Luis Pinto, កូស្តារីកា - $440,590

២៧. Volke Finke, កាមើរូន - $394,440

២៨. Stephen Keshi, នីហ្សេរីយ៉ា - $392,420

២៩. Safet Susic, ប៊ូស្នៀ ហេហ្សេហ្គូវិន - $352,470

៣០. Niko Kovac, ក្រូអាស៊ី - $271,740

៣១. James Kwesi Appiah, ហ្គាណា - $251,770

៣២. Miguel Herrera, ម៉ិកស៊ិក - $209,810