ទទួលគ្រាប់បាល់ពីក្រុមអាល្លឺម៉ង់ ដូចទឹកបាក់ទំនប់ (៧-១) ក្រុមបាល់ទាត់ជម្រើសជាតិ ប្រេស៊ីល បានបិទបញ្ចប់​ក្ដី​ស្រម័យរបស់ខ្លួន ក្នុងការឈានទៅដណ្ដើមពានរង្វាន់ បាល់ទាត់ពីភពលោក ឆ្នាំ២០១៤នេះ ជាស្ថាពរ នៅក្នុង​ផ្ទះ​ខ្លួនឯង។ ការជម្រុះចេញ ពីបេក្ខភាពក្នុងវគ្គផ្ដាច់ព្រ័ត្រ ដោយក្រុមអាល្លឺម៉ង់នេះ ត្រូវបានអ្នកវិភាគបាល់ទាត់ រក​ឃើញ​មូលហេតុ«ស្លាប់រស់» របស់ក្រុមប្រេស៊ីល ថាមានចំនួន៤។

កីឡាករ ទីចាហ្គូ ស៊ីលវ៉ា ត្រឡប់ចូលមកលួងលោម ដាវីដ ល្វី វិញ បន្ទាប់ពីបញ្ចប់ការប្រកួត។ (រូបថត AFP)

១- អត់កីឡាករ ណីម៉ា (Neymar) មិនបាន !

ការប្រកួតទាំងឡាយ ដែលរុញក្រុមប្រេស៊ីល មកដល់វគ្គ១ភាគ២ផ្ដាច់ព្រ័ត្រនេះ គឺដោយសារគ្រាប់បាល់ទាំងបួន របស់កីឡាករ ណីម៉ា ដែលបានទាត់បញ្ចូលទីគូរប្រកួត ក្នុងពេលកន្លងមក។ ប៉ុន្តែនៅក្នុងការប្រកួតលើកមុន ជាមួយ​ក្រុមកូឡំប៊ី កីឡាករខ្សែប្រយុទ្ធមួយរូបនេះ ត្រូវបានធ្វើឲ្យរងរបួសខ្នងយ៉ាងធ្ងន់ធ្ងរ ពីសំណាក់ជង្គង់ហោះ​របស់​កីឡាករ​​ជាតិកូឡំប៊ីម្នាក់។ ដូច្នេះហើយ ណីម៉ា ចាំបាច់ត្រូវចូលទៅព្យាបាលខ្លួន នៅមន្ទីរពេទ្យ ហើយខានលែង​បាន​ចូលប្រកួត ជាមួយក្រុមជម្រើសជាតិរបស់ខ្លួនតទៅទៀត។

គ្មាន ណីម៉ា ក្រុមប្រេស៊ីលអស់ស្លាបហោះ និងគ្មានមធ្យោបាយដើម្បីទម្លុះ ខ្សែការពារដ៏រឹងមាំរបស់អាល្លឺម៉ង់ បាន​សូម្បី​បន្ដិច។ ខ្សែប្រយុទ្ធប្រេស៊ីល កីឡាករ ហ្វ្រេដ (Fred) ដែលមកជំនួស ណីម៉ា តែងតែធ្វើឲ្យបាល់ខូច ជានិច្ច​ជាកាល នៅពេលបាល់បានឡើងទៅដល់មុខទីរបស់អាល្លឺម៉ង់។

២- យុទ្ធសាស្ត្របាល់ គ្មានជាតិ និងគ្មានអ្វីថ្មី

កាលពីឆ្នាំ២០០២ ដែលប្រេស៊ីលក្លាយជាម្ចាស់ ពានរង្វាន់ពិភពលោក នៅពេលនោះ ក្រុមជម្រើសជាតិនៃ​ប្រទេស​នេះ មានកីឡាករដែលមានថ្វីជើងជាច្រើន ជាពិសេសកីឡាករខ្សែប្រយុទ្ធ ដូចជា រ៉ូណាល់ដូ (Ronaldo) រីវ៉ាដូ (Rivaldo) កាកា (Kaka) និងរ៉ូណាល់ឌីញ៉ូ (Ronaldinho)។ នៅពេលនោះ យុទ្ធសាស្ត្របាល់របស់គ្រូបង្វឹកប្រេស៊ីល លោក ហ្វីលីព ស្កូឡារី (Felipe Scolari) បានរៀបពង្រឹកយកតែមែនទែន ខាងខ្សែការពារ។ តែនៅឆ្នាំនេះ គ្រូបង្វឹក​រូបនេះ នៅតែប្រកាន់យកយុទ្ធសាស្ត្របាល់ របៀបនេះដដែលទៀត ដោយមានកីឡាករដ៏រឹងមាំនៅខ្សែការពារមាន ទីចាហ្គូ ស៊ីលវ៉ា (Thiago Silva) និងដាវិដ ល្វី (David Luiz) ហើយទុកឲ្យខ្សែប្រយុទ្ធ ទៅឲ្យតែកីឡាករស្រួច ណីម៉ា តែម្នាក់ប៉ុណ្ណោះ។

ដោយអស់កីឡាករសំខាន់ៗ (ទីចាហ្គូ ស៊ីលវ៉ា និង ណីម៉ា) បានធ្វើឲ្យក្រុមប្រេស៊ីល ហាក់បីដូចគ្មានអ្វីសោះ ទាំងខែល ទាំងលំពែង​ ហើយចូលទៅប្រកួត ទល់នឹងក្រុមអាល្លឺម៉ង់ ដែលពោរពេញដោយថាមពល។

៣- ខ្វះទាំងកីឡាករជំនួស

មិនត្រឹមតែអស់ពី ណីម៉ា ឬពីទីចាហ្គូ ស៊ីលវ៉ា ប៉ុណ្ណោះទេ ក្រុមប្រេស៊ីលថែមទាំងគ្មានកីឡាករជំនួស ដើម្បីផ្លាស់​ប្ដូរ​ខ្យល់បាល់នោះថែមទៀត។ កីឡាករប្រេស៊ីល មានប៉ុន្មាននៅលើទីលាន បានប្រកួតរហូតទាល់តែដាច់ខ្យល់ និង​រហូតដល់អាជ្ញាកណ្ដាល ផ្លុំកញ្ចែបញ្ចប់ការប្រកួត បើទោះជាដឹងថា កីឡាករទាំងប៉ុន្មាននេះធ្វើក្រុម​អាល្លឺម៉ង់មិនរង្គើ​ហើយនោះក៏ដោយ។

៤- សម្ពាធ

បើទោះជាបានឡើងមកដល់វគ្គ១ភាគ២ផ្ដាច់ព្រ័ត្រក៏ពិតមែន ប៉ុន្តែគេក៏ត្រូវគិតថា ក្រុមបាល់ទាត់​របស់​ប្រទេស​ម្ចាស់​ផ្ទះមួយនេះ រងនូវសម្ពាធមិនតិចទេ ពីសំណាក់មជ្ឈដ្ឋាននានា ជាពិសេសពីសំណាក់​ប្រព័ន្ធផ្សព្វផ្សាយ​ប្រេស៊ីល។ ការឡើងមកធ្វើជាប្រធានក្រុម របស់កីឡាករ ដាវីដ ល្វី ជាហេតុការណ៍មួយ ដែលកីឡាកររូបនេះ មិនសូវចង់​បាន​ប៉ុន្មានទេ។

តើគេត្រូវឲ្យកីឡាករ មានក្បាលគិតពីការប្រកួតយ៉ាងដូចម្ដេចកើត បើខ្លួនកីឡាកររួមរឹតទៅដោយចំណង ចងជាប់​ជុំជិតនោះ? ករណីនេះ បានបញ្ជាក់យ៉ាងច្បាស់ នៅបន្ទាប់ពីក្រុមអាល្លឺម៉ង់ បានព្រលែងគ្រាប់បាល់ទី២របស់ខ្លួន ចូលទីរបស់ក្រុមប្រេស៊ីល ធ្វើឲ្យកីឡាកររបស់ក្រុមម្ចាស់ផ្ទះ ហាក់ដូចជាវង្វេងវង្វាន់ លែងដឹងក្រឡាបាល់ លែងដឹង​ត្រូវឈរទប់បាល់ កន្លែងណាទៀត ក្រៅតែពីទុកឲ្យក្រុមអាល្លឺម៉ង់ ព្រលះរហូតដល់៥គ្រាប់ផ្ទួនៗ។

បន្ទាប់ពីត្រូវបានអាល្លឺម៉ង់ លុត ក្នុងពិន្ទុចុងក្រោយ ៧-១ នោះមក ទឹកភ្នែកហូររបស់កីឡាករ ដាវីដ ល្វី នឹង​បង្ហាញ​កាន់តែច្បាស់ឡើង ពីអ្វីដែលកីឡាករខ្លួនឯងទទួលរងទំនប់ថ្មបាក់ និងពីអារម្មណ៍​ដែលមាននៅក្នុងខ្លួនកីឡាករ។ ប៉ុន្តែសម្រាប់​ប្រវត្តិ​បាល់ទាត់​ របស់ប្រទេសប្រេស៊ីល ​ទាំងរូបភាពយំស្រែក ទាំងលទ្ធផលដ៏អាម៉ាសនេះ នឹងត្រូវ​ចារជាប់ជារៀងតទៅ នៅគ្រប់ជំនាន់ក្រោយៗទៀត៕