បន្ទាប់ពីបានបែកពីតារាចម្រៀងបារាំងដ៏ល្បី នាង វ៉ានេស្សា ប៉ារីឌី (Vanessa Paradis) កាលពីខែមិថុនាឆ្នាំ២០១២​កន្លងទៅ ហើយបានភ្ជាប់ពាក្យជាថ្មី ជាមួយនឹងតារាស្រីស្រស់ស្អាតថ្មី នាងអំប័រ ហៀដ (Amber Heard) កំពូលតារា​ភាពយន្ដហូលីវូដ ចន្នី ដេប (Johnny Depp) បានប្រកាសនៅថ្ងៃទី១៧ ខែមិថុនានេះ ថាសេចក្ដីស្នេហារវាង​តារា​ភាពយន្ដ និងតារាចម្រៀង នៅតែមានជាអមតៈ។

តារាភាពយន្ដ ចន្នី ដេប និងតារាចម្រៀងបារាំង វ៉ានេស្សា ប៉ារ៉ាឌី កាលពីពេលនៅជាមួយគ្នា។ (រូបថត AFP)

តារាហូលីវូដ - ការបែកបាក់រវាង ដៃគូរស្នេហាល្អូកល្អើន នៃកំពូលតារាទាំងពីរ បានបង្កការភ្ជាប់ផ្អើលយ៉ាងខ្លាំង ក្នុង​អំឡុងខែមិថុនាឆ្នាំ២០១២កន្លងទៅ។ ការភ្ញាក់ផ្អើល ដោយសារតែគូរស្នេហាដ៏ល្បីល្បាញ នៅហូលីវូដ បានបង្កើត​ប្រវត្តិស្នេហ៍រួមគ្នា ដ៏កម្ររកបាន អស់រយៈពេលជាង១៤ឆ្នាំ តែនៅតែឈានមកដល់ទីបញ្ចប់ឲ្យទាល់តែបាន។

ប៉ុន្តែនៅក្នុងកិច្ចសម្ភាសមួយ ជាមួយនឹងទស្សនាវដ្ដីបារាំង Télé Câble Sat ចេញផ្សាយប្រចាំសប្ដាហ៍ តារាភាពយន្ដ​ដែលល្បី នៅក្នុងរឿង«មហាចោរនៅ ការ៉ាអ៊ីប» បានថ្លែងនៅក្នុងឱកាសនៃការចេញបញ្ចាំងរឿង Transcendance ទាក់ទងនឹងអាថ៌កំបាំងមួយ ក្នុងបេះដូងរបស់ខ្លួន។

ឆ្លើយតបនឹងសំនួរដែលសួរថា តើ ចន្នី ដេប បានភ្លេចរឿងចាស់ និងរៀបចំខ្សែជីវិតសារជាថ្មី ហើយឬ? តារាប្រុស​របស់​ពិភពភាពយន្ដអាមេរិកាំង បានឆ្លើយថា «មិនអាចឡើយ។ ខ្ញុំបាននិយាយ និងនៅតែនិយាយទៀតថា ខ្ញុំស្រឡាញ​វ៉ានេស្សា ជារៀងរហូត។ យើងបានសារអ្វីៗរួមគ្នា ច្រើនរាប់មិនអស់ ហើយយើងមានកូនពីរនាក់ជាមួយគ្នាទៀត។ វ៉ានេស្សា មាននៅក្នុងជីវិតខ្ញុំជាអមតៈ។ សេចក្ដីស្នេហា ដែលខ្ញុំមានចំពោះនាង មានទំហំធំជាងអ្វីទាំងអស់។»

តើនរណាហើយ ដែលបានស្ដាប់លឺសម្ដីនេះ មិនធ្លាក់បេះដូង? ទម្ងន់ស្នេហា និងប្រវត្តិបេះដូង ដែលទំនងមើលទៅ នៅ​ស្រាលជាងស្នេហា រវាងតារាភាពយន្ដ ជាមួយនឹងនាង អំប័រ ហៀដ អាយុ២៨ឆ្នាំ ដែល ចន្នី ដេប ទើបនឹងជួបនៅក្នុង​ពេលថតភាយន្ដ Rhum Express កាលពីចុងឆ្នាំ២០១១នេះប៉ុណ្ណោះ តែបានភ្ជាប់ពាក្យជាមួយតារាស្រីរូបនេះ តាំងពីខែ​មករាមុនរួចជាស្រេចហើយ។ យ៉ាងណាក៏ដោយ ក៏គេនៅតែមិនដឹងឲ្យពិត ថាតើ ចន្នី ដេប ចង់ត្រឡប់ក្រោយ ឬធ្វើអ្វីឲ្យ​ច្បាស់នោះដែរ៕