បទ​យក​ការណ៍៖ ពលរដ្ឋ​តាម​ព្រំដែន​រង​គ្រោះ ព្រោះ​រដ្ឋប្រហារ​នៅ​ថៃ

ពលរដ្ឋកម្ពុជារស់នៅតាមបណ្ដោយព្រំដែន កម្ពុជា-ថៃ បានត្អូញត្អែរពីបញ្ហាជីវភាពរបស់ពួកគេ ដែលបានរងនូវ​ការ​ប៉ះពាល់យ៉ាងខ្លាំង បន្ទាប់ពីរដ្ឋប្រហារយោធា នៅក្នុងប្រទេសថៃ។ ប៉ះពាល់ខ្លាំង ដោយសារតែភាគីថៃ បានផ្លាស់ប្ដូរ​ទម្លាប់ ក្នុងការអនុញ្ញាតឲ្យពលរដ្ឋឆ្លងកាត់ ចូលទៅក្នុងទឹកដីថៃ ខណៈក្នុងទឹកដីកម្ពុជា មិនសូវមានជនជាតិថៃ​ចូល​មកលេងកាស៊ីណូ។ អ្នកយកព័ត៌មានរបស់ទស្សនាវដ្ដីមនោរម្យ.អាំងហ្វូ បានធ្វើដំណើរទៅកាន់ទីនោះ ហើយ​បាន​ធ្វើ​សេចក្ដីរាយការណ៍មួយ ជូនប្រិយមិត្តអ្នកអាន។
Loading...
  • ដោយ: លោក គិន ដោយ គិន ង៉ុយ (ទាក់ទង៖ [email protected]) - ភ្នំពេញ ថ្ងៃទី២ មិថុនា ២០១៤
  • កែប្រែចុងក្រោយ: June 02, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ពលរដ្ឋកម្ពុជារស់នៅតាមបណ្ដោយព្រំដែន កម្ពុជា-ថៃ បានត្អូញត្អែរពីបញ្ហាជីវភាពរបស់ពួកគេ ដែលបានរងនូវ​ការ​ប៉ះពាល់យ៉ាងខ្លាំង បន្ទាប់ពីរដ្ឋប្រហារយោធា នៅក្នុងប្រទេសថៃ។ ប៉ះពាល់ខ្លាំង ដោយសារតែភាគីថៃ បានផ្លាស់ប្ដូរ​ទម្លាប់ ក្នុងការអនុញ្ញាតឲ្យពលរដ្ឋឆ្លងកាត់ ចូលទៅក្នុងទឹកដីថៃ ខណៈក្នុងទឹកដីកម្ពុជា មិនសូវមានជនជាតិថៃ​ចូល​មកលេងកាស៊ីណូ។ អ្នកយកព័ត៌មានរបស់ទស្សនាវដ្ដីមនោរម្យ.អាំងហ្វូ បានធ្វើដំណើរទៅកាន់ទីនោះ ហើយ​បាន​ធ្វើ​សេចក្ដីរាយការណ៍មួយ ជូនប្រិយមិត្តអ្នកអាន។


ច្រកអូស្មាច់ នៃព្រំដែនកម្ពុជា-ថៃ។ (រូបថត MONOROOM.info/ DaraRith)

ព្រំដែន - អង្គុយលើម៉ូតូដែលមានកន្ទុយរឺម៉ក សម្រាប់ដឹកទំនិញក្រោមកំដៅថ្ងៃក្តៅហែង លោក ឌួង សាវ៉ាន់ អាយុ ៤៥ ឆ្នាំ ដែលជាអ្នកឆ្លងចូលទឹកដីថៃ ទឹកទំនិញឲ្យគេតាមច្រកអូស្មាច់នោះ បានឲ្យដឹងថា បច្ចុប្បន្ននេះខាងភាគីថៃ គេរឹតបន្តឹងសន្តិសុខខ្លាំងជាមុន បន្ទាប់ពីរដ្ឋប្រហារយោធា។ ពលរដ្ឋកម្ពុជា ដែលប្រកបរបរនៅតាមជាយដែន​ ដែល​ធ្លាប់តែឆ្លងចូលដោយបង់តែ១០បាតនោះ ឥឡូវត្រូវធ្វើសំបុត្រមួយ ដែលអាចចូលបានគ្នា ១០នាក់ ហើយត្រូវត្រឡប់​ចូលទឹកដីកម្ពុជាវិញមុនម៉ោង៥ល្ងាច។ លោកបានថ្លែងឲ្យដឹងថា៖ «ពួកយើងជាអ្នកដឹកបន្លែយ៉ាប់ណាស់ ចំពោះ​ស្ថានភាពបច្ចុប្បន្ននេះ យើងចូលទៅគេត្រួតពិនិត្យយើង៤កន្លែង ហើយនៅពេលចូលវិញ គេហៅឈ្មោះ បើយើង​អត់មានឈ្មោះគេចាប់ មិនចូលទឹកដីយើងវិញទេ»។

បុរសរូបចំណាស់រូបនោះ បានថ្លែងឲ្យដឹងទៀតថា បច្ចុប្បន្ននេះ គេតម្រូវឲ្យមានលិខិតឆ្លងដែន ហើយពលរដ្ឋដែល​ពុំមានលិខិតឆ្លងដែនដូចពួកលោក គឺតម្រូវឲ្យទិញប័ណ្ណជាក្រុមទើបអាចចូលបាន ហើយក្រុមទាហាន​ឈុតខ្មៅជា​អ្នកឆែកឆេរ ហើយគេក៏ពុំធានាសុវត្ថិភាពដែរ ប្រសិនបើមានរឿងអ្វីកើតឡើង។ លោកបានថ្លែងឲ្យដឹងទៀតថា៖ «ពី​មុនពុំមែនស្ងាត់ជ្រងំដូចពេលនេះទេ មានពលរដ្ឋថៃឆ្លងដែនមកយើងច្រើនណាស់ តែឥឡូវមួយថ្ងៃរកតែម្នាក់មិន​ចង់​បានផង។ ជីវិតអ្នករកស៊ីជាយដែន គឺយ៉ាប់បំផុត ម្តងគេបើកច្រកម្តងគេបិទច្រក ស្រេចតែចិត្តគេ ចំនែកមន្ត្រីខាង​យើងគ្មាន​ប្រតិកម្មអីនោះទេ។»។

ជ្រកក្រោមម្លប់ដើមឈើ រងចាំចាប់ម៉ូយដែលឆ្លងដែនចេញពីប្រទេសថៃនោះ លោក មាស ប្រាថ្នា អាយុ ៤២ ឆ្នាំ ដែល​ជាអ្នករត់ម៉ូតូឌុប នៅច្រកអូស្មាច់នោះ បានថ្លែងឲ្យដឹងថា បច្ចុប្បន្ននេះលោករកក្នុងមួយថ្ងៃ មិនបានមួយម៉ឺន​រៀល​ផង បន្ទាប់ពីប្រទេសថៃមានបញ្ហាមក។ លោកបានថ្លែងថា៖ «ដូចមើលឃើញស្រាប់ហើយ ស្ងាត់ជ្រងំតែម្តង បន្ទាប់ពីថ្ងៃ​ទី២២ ឧសភាមក»។

លោកបានថ្លែងបន្តឲ្យដឹងទៀតថា ប្រសិនបើស្ថានភាពនៅតែដូចសព្វថ្ងៃនេះ គ្រួសាររបស់លោកអាចប្រឈម​នឹង​បញ្ហាជីវភាព ដោយសារតែលោករកមួយថ្ងៃដើម្បីមួយថ្ងៃពុំមានលុយសល់នោះទេ ប្រសិនលោកមិនរកគឺអត់ ហើយ​លោកលឺថា ស្ថានភាពបែបនេះនឹងចំណាយពេល៣ខែ។ លោកបានថ្លែងឲ្យដឹងទៀតថា៖ «ប្រសិនបើចំណាយពេល​បីខែមែននោះ ខ្ញុំប្រហែលជាវេចប្រពន្ធកូនទៅនៅស្រុក មួយរយៈសិនហើយ ដោយសារតែគ្មានលុយ​បង់ថ្លៃ​បន្ទប់​ជួល ពេលណាស្ថានភាពវិលរកភាពដើម ទើបត្រឡប់មកវិញ»។

អង្គុយក្នុងទឹកមុខ ស្រពោន ដោយសារពុំមានអតិថិជន លោក ផល្លា ដែលជាអាជីវករលក់ដូរនៅផ្សារអូរស្មាច់ បាន​ថ្លែង​ថា លោកគ្រោងនឹងបិទតូប បីទៅបួនថ្ងៃខាងមុខ ប្រសិនស្ថានភាពនៅតែស្ងាត់ជ្រងំដូច្នេះ ពីព្រោះលោកពុំដឹងថា ត្រូវលក់ឲ្យអ្នកណា។ លោកបានថ្លែងឲ្យដឹងថា៖ «មួយថ្ងៃលក់ស្ទើរមិនបាន២០០បាតផង ដូច្នេះមានតែបិទតូបទេ ពីព្រោះគ្មានលុយបង់ឲ្យគេ។ កាលពីប៉ះទង្គិចគ្នា រឿងប្រាសាទព្រះវិហារនៅមានភ្ញៀវចេញចូលច្រើន តែពេលនេះ​ស្ងាត់ឈឹងតែម្តង។»។

លោកបានថ្លែងឲ្យដឹងទៀតថា មិនថាតែលោកជាអាជីវករនោះទេដែលលំបាក គឺប្រជាពលរដ្ឋដែល​រស់នៅ​អូស្មាច់​នេះ លំបាកស្ទើរតែទាំងអស់គ្នា ដោយសារតែពួកគាត់ពឹងអាស្រ័យ លើការរកស៊ីរវាងប្រទេសទាំងពីរ ប៉ុន្តែពេល​នេះ​ច្រកខាងកម្ពុជាបើកធម្មតា ប៉ុន្តែច្រកខាងថៃគេរឹតបន្តឹង។ លោកបានឲ្យដឹងទៀតថា៖ «ឲ្យតែពេលណាមាន​បញ្ហាអ្វី​មួយ ពួកយើងដែលរកស៊ីនៅជាយដែននេះលំបាកបំផុត»។

លោក អ៊ូ ច័ន្ទសុខា មន្ត្រីអន្តោប្រវេសន៍ច្រកទ្វាព្រំដែនអន្តរជាតិអូស្មាច់ បានថ្លែងឲ្យដឹងថា ចាប់តាំងពីថ្ងៃទី ២៩ ខែ​ឧសភា មកគឺពលរដ្ឋដែលចេញចូលផ្សារព្រំដែន តម្រូវឲ្យសរសេរឈ្មោះ នៅលើលិខិតអន្តោប្រវេសន៍ ដើម្បីអាច​ចេញចូលបាន មិនអាចធ្វើដូចពីពេលមុនគ្រាន់តែបង់១០បាតនោះទេ។ លោកបានថ្លែងថា៖ «បច្ចុប្បន្ននេះ ខាងភាគី​ថៃ​គេរឹតបន្តឹង ចំនែកខាងយើងមិនអីនោះទេ ពលរដ្ឋទម្រាំបានទៅដល់ផ្សារ ខាងទាហានឈុតខ្មៅគេឆែក ៤កន្លែង»។

លោកបានថ្លែងឲ្យដឹងទៀតថា ស្ថានភាពនៅពេលនេះ គឺស្ងប់ស្ងាត់ ហើយក៏ពុំសូវមានពលរដ្ឋថៃឆ្លង​ដែន​ចូល​ប្រទេសយើង ដើម្បីមកលេងកាស៊ីណូដូចកាលពីពេលមុននោះទេ ប៉ុន្តែមានបរទេសគេឆ្លងដែនចេញ​មកប្រទេស​យើង​ច្រើន។ លោកបានឲ្យដឹងថា៖ «គេបង្ខំឲ្យពលរដ្ឋយើង ត្រឡប់មកវិញនៅម៉ោង៥ល្ងាច ហើយក្នុងករណី​មាន​បញ្ហានៅប្រទេសគេពេលណា គេមិនប្រាប់យើងទេ ដូច្នេះយើងតែងតែអប់រំពលរដ្ឋយើង ដែលឆ្លងដែនទៅផ្សារនោះ ឲ្យមានការប្រុងប្រយ័ត្នគ្រប់ពេល»។

ពលរដ្ឋជាច្រើនអ្នកបានឈរជាជួរ បន្ទាប់ពីទិញសំបុត្រដើម្បីឆ្លងដែនចូលផ្សារព្រំដែន តាមច្រកជាំស្រងាំ នោះ លោក សួស សំអុល ដែលរស់នៅផ្សារជាំស្រងាំលើភ្នំដងរែក បានថ្លែងឲ្យដឹងថា នៅក្នុងតំបន់នេះ គឺពុំអនុញ្ញាតិឲ្យពលរដ្ឋ​ដែល​គ្មានលិខិតឆ្លងដែន ចេញចូលដូចកាលពីពេលមុនោះទេ ពួកគាត់អាចចេញចូលបានតែដងប៉ុណ្ណោះ ក្នុងមួយ​សប្តាហ៍ គឺនៅថ្ងៃព្រហស្បត្តិ៍និងថ្ងៃអាទិត្យ ពេលដែលផ្សារព្រំដែនថៃគេបើកលក់ទំទិញ។ លោកបានថ្លែងឲ្យដឹងថា៖ «ក្រៅពីថ្ងៃដែលថៃបើកផ្សារ គឺស្ងាត់ជ្រងំតែម្តង ពីព្រោះអីអាជីវករយើង មិនអាចឆ្លងដែនបាន ហើយខាងថៃមិន​មាន​អ្នកមក។ ខ្ញុំមិនដឹងថា តើនៅច្រកព្រំដែនផ្សេងទៀត គេដូចយើងដែររឺអត់ទេ យើងបន់ឲ្យតែប្រទេសគេ​ស្រួលបួល​ឡើងវិញ ដើម្បីឲ្យពួកយើងងាយស្រួលរកស៊ី។»។

អាជីវករលក់នៅលើភ្នំដងរែក ច្រកជាំស្រងាំ ចែ យ៉ា បានត្អួញត្អែថា ភាគីខ្មែរចាញ់ប្រៀបខាងភាគីថៃ ដោយសារតែ​ខាង​ភាគីថៃគេបើកទ្វារច្រកព្រំដែន ១សប្តាហ៍ពីរថ្ងៃ តែគេបិទមិនឲ្យពលរដ្ឋគេឆ្លងដែន ចូលមកទិញទំនិញ​ពីខាង​យើង ដើម្បីឲ្យមានតម្លាភាព គួរតែបិទច្រកទាំងអស់តែម្តង ទាំងខាងថៃនិងខាងកម្ពុជា។ អ្នកស្រីបានថ្លែងឲ្យ​ដឹង​ទៀត​ថា៖ «បើនៅតែស្ងាត់បែបនេះទៀត ខ្ញុំនឹងបិតតូបមួយរយៈ ពីព្រោះអីខ្ញុំមិនដឹងលក់ឲ្យអ្នកណាទិញ។ រឿងតែ​ប្រទេស​គេសោះ វាយ៉ាប់ឯងនេះវិញ វាគួរតែប្រទេសគេទេ ដែលយ៉ាប់។»។

កាលពីថ្ងៃទី២០ ខែឧសភា ឆ្នាំ២០១៤ អាជ្ញាធរថៃ បានបង្កើនកម្លាំងត្រួតពិនិត្យ ក្នុងទឹកដីរបស់ខ្លួនជាប់​ច្រកទ្វារ​អន្តរជាតិ ហើយពួកគេបានប្រកាសបិទច្រករបៀងទាំងអស់ ដែលមាននៅតាមបណ្ដោយ ខ្សែក្រវាត់ព្រំដែនខ្មែរថៃ ក្នុងខេត្តបន្ទាយមានជ័យ ជាប់នឹងខេត្តស្រះកែវ ប្រទេសថៃ។ ការប្រែប្រួលស្ថានការណ៍ នៅតាមខ្សែក្រវាត់​ព្រំដែន​ខ្មែរថៃនេះ កើតមានឡើងក្រោយពីទាហានថៃ បានប្រកាសដាក់ប្រទេសរបស់ខ្លួនឲ្យឋិតនៅក្រោមច្បាប់អាជ្ញាសឹក គ្រប់គ្រងដោយកងយោធា។

ចំនែកភាគីកម្ពុជា កាលពីថ្ងៃទី ២៣ ខែឧសភា លោក ស ខេង រដ្ឋមន្រ្តីក្រសួងមហាផ្ទៃ បានចេញបទបញ្ជា៣​ចំណុច​ទៅដល់ អគ្គមេបញ្ជាការកងយោធពលខេមរភូមិន្ទ និងអគ្គស្នងការនគរបាលជាតិ ត្រូវណែនាំដល់កងកម្លាំង ដែល​ឈរជើងការពារតាម បណ្តោយព្រំដែនកម្ពុជា ត្រូវបន្តលើកកម្ពស់កិច្ចសហការ និងទំនាក់ទំនងឲ្យបានល្អ​ជាមួយ​ភាគីថៃ និងមិនត្រូវធ្វើការចល័តកម្លាំងទ័ពឡើយ។ អភិបាលខេត្ត និងជាប្រធានគណៈបញ្ជការឯកភាពខេត្ត ត្រូវបន្ត​ទំនាក់ទំនងសហការជាមួយថៃដើម្បីរក្សាសន្តិភាព និង ត្រូវបន្តតាមដានការវិវឌ្ឍសភាពការណ៍នៅថៃ ពិសេស​ស្ថានការណ៍តាមព្រំដែនរវាងប្រទេសទាំងពីរ។

ប្រធានទំនាក់ទំនងព្រំដែនកម្ពុជាថៃ លោក ពេជ្រ វណ្ណា ថ្លែងថា ស្ថានភាពនៅតាមច្រកព្រំដែនកម្ពុជាថៃ គឺស្ថិត​នៅ​ក្នុងសភាពស្ងប់ស្ងាត់ដដែលហើយ ពលរដ្ឋកម្ពុជា ក៏ពុំអាចចេញចូលដូចមុនដែរ គឺត្រូវអាជ្ញាធរថៃធ្វើការរឹតបន្តឹង​ក្នុងការត្រួតពិនិត្យ ហើយពលរដ្ឋខ្មែរអាចឆ្លងដែនបានទៅ តែក្នុងផ្សារជាប់ព្រំដែនប៉ុណ្ណោះ ចំណែកការធ្វើដំណើរ​ទៅជ្រៅៗមិនទាន់បានទេ។ លោកបានថ្លែងឲ្យដឹងថា៖ «ច្រកព្រំដែននៅតែបន្តបិទដដែល ហើយខាងភាគីថៃពុំ​បាន​កំណត់ជាក់លាក់ អំពីពេលវេលាបើកវិញនោះទេ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...