«ភាគីកម្ពុជា ក្នុងនាមខ្មែរតែមួយ គួររួមគ្នាដើម្បីការពារទឹកដី។ ចុះហេតុអ្វីឡើយ ក៏ចេះតែបន្តការទាស់ទែងគ្នា ឈ្លោះ​គ្នា រវាងខ្មែរនិងខ្មែរគ្នាឯង ដែលនាំឲ្យបរទេសយំផង សើចផង ឬសើចរហូត ទាល់តែហៀរទឹកភ្នែក​នោះ។ ចាំបាច់អ្វី ដែលត្រូវតែឈ្លោះគ្នាពេញស្រុក? ម្តេចមិនព្រមរួមគ្នា សាមគ្គីគ្នា ដើម្បីការពារ​បូរណភាព​ទឹកដី​យើង?»

ខាងលើនេះ ជាសំណេររបស់ព្រះអង្គម្ចាស់ ស៊ីសុវត្ថិ ធម្មិកោ មន្ត្រីជាន់ខ្ពស់របស់គណបក្សសង្គ្រោះជាតិ នៅលើ​បណ្ដាញសង្គម ទាក់ទងនឹងបញ្ហាព្រំដែនកម្ពុជា-វៀតណាម ដ៏ចម្រូងចម្រាស នៅក្នុងរយៈពេលចុងក្រោយ​នេះ។ អតីតជំនួយការផ្ទាល់ របស់សម្ដេច នរោត្ដម សីហនុ បានសរសេរទៀតថា បញ្ហាខ្មែរ និងខ្មែរ កំពុងតែ​ឈ្លោះ​គ្នានេះ គ្មានអ្នកណាម្នាក់ (ប្រជាពលរដ្ឋខ្មែរ) សប្បាយចិត្តឡើយ។ ផ្ទុយទៅវិញ មានជាតិសាសដទៃ​«មួយ» កំពុងតែសប្បាយចិត្ត ជាមួយនឹងការ«សើច»របស់គេ សឹងដាច់ដង្ហើមទៅហើយនោះ។ ព្រះអង្គម្ចាស់​បានសរសេរថា ការ«សើច»នេះ អាចជាការអស់សំណើច របស់ពួកគេមួយ ដែលពួកគេ«រំលោភ និងបំពាន» ដីខ្មែរ តែខ្មែរមិនព្រមរួមសាមគ្គីគ្នា ដោះស្រាយទេ បែជាឈ្លោះគ្នាទៅវិញ។

ភាគីខ្មែរទាំងបី...

ព្រះអង្គ ស៊ីសុវត្ថិ ធម្មិកោ មានបន្ទូលបន្តថា៖ «គួរណាតែខ្មែរគ្រប់ភាគី គ្រប់បក្សរួមគ្នា ទៅលើមូលដ្ឋាន​កិច្ចព្រម​ព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ ១៩៩១ ដែលផ្តល់មូលដ្ឋានច្បាប់ ច្បាស់លាស់ ដើម្បីការពារ និង​រក្សា​បូរណភាពទឹក ដី អធិបតេយ្យភាពជាតិយើង។ ក្នុងថា្នក់ដឹកនាំជាតិសព្វថ្ងៃ សម្តេចតេជោ ហ៊ុន សែន ក្នុងនាម គណបក្សប្រជាជនកម្ពុជា, លោក សម រង្ស៊ី អតីតថ្នាក់ដឹកនាំគណបក្សហ៊្វុនស៊ិនប៉ិច និងលោក កឹម សុខា អតីត​ថ្នាក់ដឹកនាំគណបក្សលោកតា សឺន សាន ជាភាគីហត្ថលេខី កិច្ចព្រមព្រាងទីក្រុងប៉ារីស ឆ្នាំ ១៩៩១។»

ព្រះអង្គបានពន្យល់ទៀតថា ការដោះស្រាយបញ្ហាព្រំដែន មិនមានអ្វីជាអី្វ ដែលជាឧបសគ្គឡើយ សម្រាប់អ្នក​ទាំងបីនាក់ ខាងលើនេះ។ លោកថា៖ «ថ្នាក់ដឹកនាំទាំងបីអាចជួបគ្នា ហើយយកកិច្ចព្រមព្រៀងទីក្រុងប៉ារីស​នោះ ជាមូលដ្ឋាន ដើម្បីរកដំណោះស្រាយ ជុំវិញការដែលយួនឈ្លានពាន និង រំលោភបូរណភាពទឹកដីខ្មែរ​យើង»។

«យួនសើច ខ្មែរយំ»

ទស្សនៈរបស់ព្រះអង្គម្ចាស់ ស៊ីសុវត្ថិ ធម្មិកោ បានជំរុញឲ្យអ្នកប្រើប្រាស់បណ្ដាញសង្គមជាច្រើនផ្សេងទៀត ចូលរួមបញ្ចេញយោបល់ដែរ។ អ្នកប្រើប្រាស់ហ្វេសប៊ុកម្នាក់ ដាក់ឈ្មោះ «Suon Sokheng» បានសរសេរថា៖ «យួនសើច ព្រោះ ហ៊ុន សែន និយាយការពារយួន» ខណៈអ្នកប្រើប្រាស់បណ្ដាញសង្គមម្នាក់ទៀត ឈ្មោះ «Srey Ka» បានសរសេរថា៖ «យួនសើច ខ្មែរយំ ព្រោះតែអ្នកដឹងនាំ»។ ម្ចាស់គណនីឈ្មោះ «Sisowath Chakrey Noukpol» បានលើកឡើងដែរថា៖ «យួនសើច ព្រោះមើលឃើញយុទ្ធសាស្ត្រថ្មីមួយ ជោគជ័យក្នុង​ការ​ឈ្លាន​ពាន យកបានព្រំដែនគោកពីរ ឆ្ពោះទៅយកព្រំដែនទឹកបី ដែនអាកាសបួន យកបានប្រទេស​មួយ​ក្រោម​រណប»។

ឯម្ចាស់គណនីយមួយឈ្មោះ «David de Simon» បានសរសេរផ្ដល់ក្ដីសង្ឃឹមថា៖ «បើយើងឈរលើជ្រុងម្ខាង យើងអាចគិតថា យួនវាកំពុងតែសប្បាយចិត្ត ព្រោះឃើញខ្មែរកំពុងតែខាំគ្នា។ តែបើយើងឈរលើជ្រុងម្ខាង​ទៀត អាចសន្លឹងឃើញថា យួនមិនសប្បាយចិត្តទេ។ ទី១ ដោយសារថា កូនខ្មែរសម័យនេះ បានដឹងនិងស្គាល់​ក្រយ៉ៅ​យួន ច្បាស់ណាស់។ ទី២ យួនកំពុងតែភ័យ ខ្លាចខ្មែររួបរួមគ្នា ព្រោះថាថ្ងៃណាមួយ ខ្មែររួបរួមគ្នាហើយ​នោះ នយោបាយឥណ្ឌូចិនតែមួយនឹងបរាជ័យ។»៕