លោក ថាច់ សេដ្ឋា ប្រធាននៃគណៈកម្មការសមាគមខ្មែរកម្ពុជាក្រោម បានថ្លែងថា លោក និងក្រុមការងារលោក នឹង​ស្នើ​ទៅរដ្ឋាភិបាល និងរដ្ឋមន្រ្តីក្រសួងអប់រំ ដើម្បីរៀបចំបញ្ចូលឯកសារ ដែលបានថតចម្លង ពីប្រទេសបារាំងមកនោះ ចូល​ទៅ​ក្នុងកម្មវិធីសិក្សា ដើម្បីឲ្យកូនខ្មែរជំនាន់ក្រោយបានដឹង ពីការបាត់បង់ទឹកដីខ្មែរកម្ពុជាក្រោម ដោយរបៀបណា និងនៅ​ពេល​ណា។

ថ្លែងក្នុងបទសម្ភាស ជាមួយទស្សនាវដ្តីមនោរម្យ.អាំងហ្វូ លោក ថាច់ សេដ្ឋា បានលើកឡើងថា ឯកសារថតចម្លង ពី​ប្រទេស​បារាំងមកនោះ មានចំនួនសរុបប្រមាណ ជាងប្រាំពាន់ទំព័រ ហើយនឹងត្រូវចងក្រង រៀបចំឲ្យមានសណ្តាប់ធ្នាប់ ដោយ​ឡែក​ពីគ្នា ដូចជា សន្ធិសញ្ញា ច្បាប់ កិច្ចព្រមព្រៀងនានា រវាងប្រទេសបារាំង និងប្រទេសវៀតណាម។ លោកថា បន្ទាប់​មក នឹងធ្វើការបកប្រែ ចេញជាភាសាខ្មែរ និងភាសាអង់គ្លេស ដើម្បីឲ្យសិក្សាស្រាវជ្រាវ របស់ក្រុមសិស្សនិស្សិត កាន់​តែ​មាន​ភាព​ងាយស្រួលថែមទៀត។

គោលបំណង ដែលក្រុមការងារលោក បានខិតខំស្វែងរក ការថតចម្លងឯកសារប្រវត្តិសាស្រ្ត ដ៏សំខាន់នេះ ពីបារាំង គឺ​ចង់​ដឹងពីនីតិវិធី នៃដំណាក់កាលនីមួយៗ ដែលទឹកដីខ្មែរកម្ពុជាក្រោម ត្រូវបានបាត់បង់ ទៅក្រោមការគ្រប់គ្រង របស់​ប្រទេស​វៀតណាម បន្ទាប់ពីបារាំង បានដកអាណានិគមចេញពីកម្ពុជា។

កាលពីថ្ងៃទី២៧-២៨ ខែមេសានេះ អនុគណៈកម្មការ នៃសមាគមខ្មែរកម្ពុជាក្រោម ប្រចាំនៅប្រទេសបារាំង បានចុះ​ហត្ថលេខា ទទួលយកលិខិតឯកសារថតចម្លង ពាក់ព័ន្ធនឹងទឹកដីកម្ពុជាក្រោម បានចំនួនពាក់កណ្ដាលហើយ។ លោក សេដ្ឋា បានពន្យល់ថា ថតចម្លងបានត្រឹមពាក់កណ្តាលនេះ ព្រោះកង្វះខាត ផ្នែកថវិការ។ ឯក្រុមការងាររបស់លោក កំពុង​បន្តស្វែងរកជំនួយបន្ថែមទៀត ដើម្បីបញ្ចប់ ការថតចម្លងនេះ ក្នុងពេលឆាប់ៗខាងមុខ។

ចំពោះចម្លើយរបស់រដ្ឋាភិបាល ឬរដ្ឋមន្រ្តីក្រសួងអប់រំ ទាក់ទងនឹងសំណើរ សុំបញ្ចូលឯកសារប្រវត្តិសាស្រ្ត ទឹកដីខ្មែរ​កម្ពុជា​ក្រោម ដែលបានថតចម្លង ពីប្រទេសបារាំង ចូលទៅក្នុងកម្មវិធីសិក្សានោះ ត្រូវបានលោក ថាច់ សេដ្ឋា មិនផ្ដល់ក្ដីសង្ឃឹមអ្វី ឲ្យច្រើនឡើយ។ នោះវាអាស្រ័យ ទៅលើរដ្ឋាភិបាល ឬក្រសួងអប់រំ ថាទទួល ឬមិនទទួល។

លោកបញ្ជាក់ថា «អាហ្នឹងបង្ហាញថា យើង(រដ្ឋាភិបាល) មិនមានការទទួលខុសត្រូវ ចំពោះវាសនាប្រទេសជាតិ ឲ្យប្រជា​ពលរដ្ឋបានដឹង ពីសាវតា ប្រវត្តិសាស្រ្តរបស់ជាតិឯង។ (...) បើរដ្ឋាភិបាលខ្មែរ គេចង់ឲ្យកូនខ្មែរចេះដឹង ពីប្រវត្តិសាស្រ្ត​ហើយ។ (...) បើរដ្ឋាភិបាលរបស់ខ្មែរ រឿងរបស់ខ្មែរ យើងមិនគិតគូដល់សិស្ស និស្សិត យល់ដឹងពីរឿងស្រុកទេសរបស់​យើង ហ្នឹងប្រជាពលរដ្ឋគាត់នឹងឃើញ។ (...) តែមកដល់ការលៈទេសៈនេះ ប្រហែលរដ្ឋាភិបាលចេះគិត ពីរឿងអស់នេះ​ហើយ។»

មិនអាចសុំការបកស្រាយ ពីអ្នកនាំពាក្យនៃក្រសួងអប់រំ ឬពីរដ្ឋាភិបាល បាននៅឡើយ នៅពេលភ្លាមៗនេះ។ យ៉ាងណា​ក៏​ដោយ លោក ថាច់ សេដ្ឋា បានបង្ហាញ នូវមោទនៈភាពមួយ ដែលក្រុមការងាររបស់លោក បានពើបប្រទះ និងមាន​លទ្ធភាព ក្នុងការស្នើសុំថតចម្លង នូវឯកសារដ៏កម្រ នៃប្រវត្តិសាស្រ្តខ្មែរកម្ពុជាក្រោមនេះ ពីប្រទេសបារាំង។ ឯកសារទាំង​នេះ នឹងក្លាយជាតឹកតាង មិនអាចប្រកែកបាន នៃប្រវត្តិសាស្ត្រ ដើម្បីផ្សព្វផ្សាយ ឲ្យបានទូលំទូលាយ ដល់ប្រជា​ពលរដ្ឋ​កម្ពុជា​ទាំងមូល និងដើម្បីជៀសវាង នូវការបំភ្លៃប្រវត្តិសាស្រ្ត ឬការពិត របស់ទឹកដីកម្ពុជាក្រោម ដែលបានបាត់បង់ទៅ ដ៏គួរ​ឲ្យ​ស្ដាយ​ស្រណោះ​នោះ៕