នាយកការិយាល័យសុវត្ថិភាពគមនាគមន៍ របស់ប្រទេសអូស្ត្រាលី នៅតែបន្តអះអាងកាលពីថ្ងៃសុក្រ ទី៣០ ខែឧសភា ពីទឡ្ហីករណ៍ច្បាស់លាស់របស់ក្រុមអ្នកស៊ើបអង្កេត ដែលបង្ហាញថា តួយន្ដហោះប៊ូអីង ៧៧៧ របស់ក្រុមហ៊ុន​ម៉ាឡេស៊ី​អ៊ែរឡាញ ពិតជាមាននៅលើមហាសមុទ្រឥណ្ឌា។

រូបថត ពីលើយន្ដហោះ ដែលត្រូវបានបញ្ជូនឲ្យទៅរុករកយន្ដហោះបាត់ខ្លួន។ (រូបថត Reuters)

បាត់យន្ដហោះ - បើតាមផ្កាយរណប ដែលបានតាមដានដំណើររបស់យន្ដហោះប៊ូអីង រហូតដល់យន្ដហោះ​បាន​បាត់​ខ្លួនទាំងស្រុងនោះ នៅថ្ងៃទី៨ ខែមីនានោះ បានឲ្យដឹងថា យន្ដហោះប្រាកដជាបានធ្លាក់បោកខ្លួន នៅកន្លែង​ណា​មួយ នៃរង្វង់ដែលគេបានគូស ក្នុងមហាសមុទ្រឥណ្ឌាខាងត្បូង ឬអាចទៅខាងជើងនៃប្រទេសថៃ ឆ្ពោះទៅ​ប្រទេស​កាហ្សាស្ដង់។

អ្នកជំនាញបានគិតថា តួយន្ដហោះនឹងត្រូវបានរកឃើញ បន្ទាប់ពីពួកគេបានទទួលបាន នូវរលកសម្លេង​នៅក្នុង​មហា​សមុទ្រឥណ្ឌាខាងត្បូង នៅមិនឆ្ងាយប៉ុន្មានពីឆ្នេរខាងលិច នៃប្រទេសអូស្ត្រាលី។ការទទួលបាននូវសម្លេងនេះហើយ ដែលធ្វើឲ្យគេបានបោះបង់ចោល នូវការរុករកយន្ដហោះ ឆ្ពោះទៅទិសខាងជើង។ ហើយដោយសារតែការ​ទទួល​បាន នូវរលកសម្លេងទាំងនេះដែរ ទើបធ្វើឲ្យក្រុមអ្នករុករកមកពីប្រទេសជាច្រើន នៅក្នុងតំបន់ បានប្រមូលគ្នាសម្រុក​ទៅ​ស្វែងរកយន្ដហោះ នៅទីនោះ ដោយបានប្រើប្រាស់នូវមធ្យោបាយសំខាន់ៗ និងចាំបាច់នានា សំដៅធ្វើយ៉ាងណា​រុក​រកយន្ដហោះនៅក្រោមសមុទ្រឲ្យបាន។

ការស្វែងរក«ម្ជុលនៅបាតសមុទ្រ» បានបន្តធ្វើរហូមកដល់ថ្ងៃទី២៩ ខែឧសភាមុននេះ ដែលនៅទីបំផុត យុទ្ធនាការ​រុករក ត្រូវបានបោះបង់ចោល ដោយសារតែការវិភាគថ្មីបានឲ្យដឹងថា រលកសម្លេងដែលទទួលបាន ទំនងចេញពីនាវា ឬប្រព័ន្ធអេឡិចត្រូនិករបស់យានជ្រមុជទឹក តែមិនមែនចេញពីប្រអប់ខ្មៅ របស់យន្ដហោះប៊ូអីងនោះឡើយ។ ប៉ុន្តែ​ពួកអ្នកស៊ើបអង្កេត នៅតែបន្តគិតថា យន្ដហោះពិតជាបានធ្លាក់នៅតំបន់នោះ។

លោកនាយកការិយាល័យសុវត្ថិភាពគមនាគមន៍ របស់ប្រទេសអូស្ត្រាលី លោក ម៉ាទីន ដូលេន (Martin Dolan) បាន​និយាយប្រាប់អ្នកការសែតថា៖ «នៅតំបន់នោះ ជាកន្លែងសង្ស័យខ្លាំងជាងគេបំផុត»។ លោកបានបញ្ជាក់ទៀតថា រហូតមកដល់ថ្ងៃនេះ មិនមានអ្វីមកបញ្ជាក់ពីកន្លែង ដែលក្រុមអ្នករុករកបានស្វែងរកយន្ដហោះនោះ ថាជាកន្លែង​មិន​ត្រូវនោះឡើយ។ «ប៉ុន្តែយើងនឹងធ្វើការវិភាគឲ្យលំអិត ដើម្បីកំណត់ពីតំបន់រុករកនោះ ឲ្យច្បាស់ជាងនេះ»។

បើតាមលោក ម៉ាទីន ដូលេន ទិន្និន័យដែលផ្ដល់ដោយប្រព័ន្ធផ្កាយរណប របស់ក្រុមហ៊ុន អ៊ីនម៉ាសាត (Inmarsat) មានលក្ខណៈប្រាកដ និងច្បាស់ ដែលគេនៅតែអាចយកមកធ្វើ ជាហេតុផលក្នុងការវិភាគនេះបាន។

ឆ្លើយតបនឹងសំនួររបស់អ្នកការសែត ដែលបានលើកឡើងពីគ្រួសារជនរងគ្រោះ ដែលបានចោទប្រកាន់អាជ្ញាធរ​ម៉ាឡេស៊ី ថាបានលាក់ព័ត៌មាននោះ លោក ដូលេន បានថ្លែងថា លោកយល់ពីកំហឹងរបស់ពួកគេ ប៉ុន្តែលោកបាន​បដិសេធ ពីការសង្ស័យទាំងនោះ។ លោកបាននិយាយថា «យើងដឹងច្បាស់ណាស់ថា បណ្ដាជនទាំងនោះ មិនជឿ​ជាក់ទៅលើការវិភាគនេះទេ។ ទំនុកចិត្តរបស់យើង មានទំហំធំជាងការវិភាគនោះឆ្ងាយណាស់។ តែយើងនឹងធ្វើការ​ត្រួតពិនិត្យឲ្យបានទ្វេដង ដើម្បីបញ្ជាក់ពីទំនុកចិត្តនេះ។»៕