ថ្មីៗនេះព័ត៌មានក្នុងស្រុកមួយ បានចុះផ្សាយថា លោក អ៊ូ ចន្ថា ដែលគេស្គាល់ថាជាឪពុករបស់នាងអ៊ីវ៉ា តារាច​ម្រៀង​ល្បីឈ្មោះ របស់ផលិតកម្មសាន់ដេ បានប្រើអំពើហិង្សា ទៅលើជីដូនខាងម្តាយរបស់នាង បានធ្វើតារាចម្រៀង​រាង​តូច​ច្រឡឹងរូបនេះ ផ្ទុះកំហឹងចេញមកតែម្តង រហូតដល់ទម្លាយ ការបដិសេធចំពោះបញ្ហាឪពុករបស់នាង នៅលើ​បណ្តាញ​ហ្វេសប៊ុក​។

អ្នកចម្រៀង អ៊ីវ៉ា របស់ផលិតកម្មសាន់ដេ។ (រូបថតហ្វេសប៊ុក)

តារា - «ខឹងៗៗៗ ខ្លាំងណាស់ ម៉េចចចុះអ្វីដែលមិនពិត» នេះជាប្រតិកម្មភ្លាមៗ របស់តារាចម្រៀងផលិតកម្មសាន់ដេ នាងឃីន ស្រីនាថ ហៅអ៊ីវ៉ា បន្ទាប់ពីសារព័តមានក្នុងស្រុមមួយចំនួន បានចុះផ្សាយថា ឪពុករបស់នាងលោកអ៊ូ ចន្ថា បានប្រើអំពើហឹង្សា លើម្ដាយក្មេកខ្លួនឯង ឈ្មោះ សួង តុំ ដោយសារពុំព្រមស្តីដណ្តឹងប្រពន្ធថ្មីឱ្យ។

ក្នុងពេលថ្មីនេះ មានសារព័ត៌មានក្នុងស្រុកមួយចំនួន បានចុះផ្សាយថា លោក អ៊ូ ចន្ថា អាយុ៤៨ឆ្នាំ ដែលជាឪពុករបស់​អ៊ីវ៉ា បានយកពិលដែលមានប្រដាប់ឆក់ វាយលើម្ដាយក្មេកខ្លួនឯង ឈ្មោះ សួង តុំ វ័យ៧២ឆ្នាំ ម្ដងហើយម្ដងទៀត រហូតក្លាយជាជម្លោះរីកធំផ្អើលភូមិ ព្រោះតែខឹងម្ដាយក្មេក ជំទាស់មិនឱ្យយកប្រពន្ធថ្មី។ ជម្លោះចុងក្រោយរវាង​អ្នក​ទាំង​ពីរ បានក្លាយជាអំពើហិង្សា រហូតមានអន្តរាគមន៍ពីអ្នកជិតខាង និងឈានដល់ការចាប់ខ្លួន ឈ្មោះ អ៊ូ ចន្ថា ជា​ឪពុករបស់នាង ទៅកាន់ប៉ុស្តិ៍ប៉ូលិស ក្នុងភូមិវល្លិ៍ស ឃុំវល្លិ៍ស ស្រុកសំរោងទង ខេត្តកំពង់ស្ពឺ។

តាមរយៈទំព័រហ្វេសប៊ុក ដែលមានឈ្មោះថា Eva Sunday Eva (ឃីន ស្រីនាថ) ដែលគេជឿថា ជាទំព័ររបស់នាងនោះ តារាចម្រៀងរូបនេះ​បាន​សរសេរ​ថា៖ «សូមផ្ដាំទៅបងៗការសែតផង..... សូមចុះអ្វីដែលពិត»។ ព្រមជាមួយពាក្យ​ពេជន៍​ទាំងនេះ ម្ចាស់បទ​«បងពីមុន​បាត់ទៅណា»រូបនេះ បានបង្ហោះរូបភាពដែលបង្ហាញពីការបដិសេធ ទៅលើ​អ្វី​ដែលបានចុះផ្សាយថា៖ «នាងខ្ញុំអ៊ីវ៉ា សូមបដិសេធចំពោះរឿងព័ត៌មាន ដែលបានចុះផ្សាយថា ឪពុករបស់ខ្ញុំ ខឹង​ម្តាយក្មេក មិនដណ្តឹងប្រពន្ធឲ្យ ដេញ​វាយ​ផ្អើលភូមិ មិនមែនជាការពិតនោះទេ សូមបងប្អូនទាំងអស់ កុំមានការភ័ន្ត ច្រឡំឱ្យសោះ»។

បើទោះបីជាមានការបដិសេធពីកញ្ញាអ៊ីវ៉ា យ៉ាងណាក៏ដោយ អ្នកយកព័ត៌មានដែលបានរាយការណ៍នោះ នៅតែ​អះអាង​ដដែលថា បើចង់ដឹងថា នោះជារឿងយល់ច្រឡំឬពិត អាចទៅឆែកកំណត់ហេតុពីមន្ត្រីអាជ្ញាធរ ដែល​រស់នៅ​ទីនោះបាន ត្បិតថាជនបង្កហេតុពិតជាឈ្មោះ អ៊ូ ចន្ថា រីឯអ្នករងគ្រោះពិតជាឈ្មោះ សួង តុំ ដែលអ្នកភូមិ​អ្នកណា​ក៏​ដឹងថាជាឪពុក និងជាយាយខាងម្ដាយរបស់អ៊ីវ៉ាប្រាកដមែន។

កាលពីអំឡុងចុងឆ្នាំ២០១៣ ម្តាយបង្កើតរបស់ កញ្ញា ឃីន ស្រីនាថ  បានទទួលមរណភាព ដោយសារជំងឺ ដែល​ធ្វើ​ឱ្យតារាចម្រៀង ល្បីគួរសមក្នុងពិភពសិល្បៈរូបនេះ ឃ្លាតឆ្ងាយពីសិល្បៈ មួយរយៈ។ ប៉ុន្តែមរណភាពរបស់ម្តាយ មិន​ទាន់បានមួយឆ្នាំស្រួលបួលផង ស្រាប់តែផ្ទុះព័ត៌មានថា ឪពុករបស់នាងមានជម្លោះ មិនចុះសម្រុង ជាមួយម្តាយក្មេក ព្រោះតែម្តាយក្មេកមិនព្រមទៅស្តីដណ្តឹង ប្រពន្ធថ្មីឱ្យ៕