ក្រៅពីអាជីពជាអ្នកកំប្លែង ដ៏មានប្រជាប្រិយភាព នាយ ក្រូច កំពុងប្រឡូកខ្លួន ទៅជាអ្នកចម្រៀងមួយរូបទៀត។ ថ្មីៗនេះ នាយ ក្រូច បានសម្ដែងសមត្ថភាពដ៏ពិសេសនេះ តាមរយៈចម្រៀងមនោសញ្ចេតនា អន្លង់អន្លោច ស្នេហា​ព្រាត់ប្រាស មួយបទ ដែលមានចំណងជើងថា «គេឱបអូន បងឱបថ្នាំពេទ្យ»។

«គេឱបអូន បងឱបថ្នាំពេទ្យ» ជាបទថ្មី របស់ផលិតកម្ម សាន់ដេ ដែលបកស្រាយដោយនាយ ក្រូច ដែលត្រូវ​បាន​ផ្សាព្វផ្សាយ តាមបណ្តាញយូធូប (youtube) នៅពេលថ្មីៗនេះ និងបានទទួលការគាំទ្រពី សំណាក់​ទស្សនិកជន​យ៉ាងច្រើន ព្រោះតែទឹកដមសម្លេងដ៏ពិរោះ របស់តារាកំប្លែង និងអត្ថន័យរបស់ចម្រៀង ដែលមានន័យចាក់​ដល់​បេះដូង។

ដូចបានឃើញ នៅក្នុងចំណងជើងស្រាប់ អត្ថន័យក្នុងបទចម្រៀង បានបង្ហាញពីគូរស្នេហ៍មួយគូ ដែល​ស្រលាញ់​គ្នា តែដុល្លារបានបំបែកពួកគេចេញពីគ្នា ព្រោះតែគ្រួសារខាងប្រុសក្រីក្រ មិនអាចបំពេញតាមតម្រូវការ របស់​ខាង​ស្រីបាន។ ចំណែកអ្នកថ្មីអាចផ្តល់អ្វីៗគ្រប់យ៉ាង តាមការចង់បាន ដូច្នោះហើយទើបអតីតស្រីស្នេហ៍ បាន​ជ្រើស​យកអ្នកមានដុល្លារូបនោះ ធ្វើជាគូអនាគតតទៅហោង៕