តាមសេចក្តីជូនដំណឹង របស់ខុទ្ធកាល័យ លោកនាយករដ្ឋមន្រ្តីកម្ពុជា បានលើ់កឡើងថា ដោយកន្លងមក មាន​ការបង្ហាញតាមប្រព័ន្ធ Social Media ពិសេសតាមប្រព័ន្ធ Facbook នូវ«ផេក»មួយចំនួន ដែលអះអាងថា ជា​របស់​លោកនាយករដ្ឋមន្រ្តី ហ៊ុន សែន ដែលអាចមានការភ័ន្ធច្រលំnM ខុទ្ធកាល័យនាយករដ្ឋមន្រ្តី សូមប្រកាស​ដាក់​ឲ្យ​ប្រើប្រាស់ ជាផ្លូវការ នូវផេកហ្វេសប៊ូឲុក លោកនាយករដ្ឋមន្រ្តីកម្ពុជា ដែលមានឈ្មោះថា «Samdech Hun Sen, Cambodian Prime Minister»។

ការប្រកាសឲ្យប្រើប្រាស់ នូវទំព័រហ្វេសប៊ុកមួយនេះ បានធ្វើឡើង បន្ទាប់ពីលោក ហ៊ុន សែន ខ្លួនលោកបាន​ចេញ​មុខបដិសេធ ជាច្រើនដង ថាលោកមិនដេលមានគណនេយ្យ ឬទំព័រហ្វេសប៊ុក ប្រើប្រាសនោះទេ។ សម្រាប់​លោក ផៃ ស៊ីផាន អ្នកនាំពាក្យទីស្ដីការ គណៈរដ្ឋមន្ត្រីវិញ បានលើកឡើង ពីហេតុផលមួយចំនួន ដែលទំព័រ «Samdech Hun Sen, Cambodian Prime Minister» ត្រូវបានប្រកាសឲ្យប្រើប្រាស់ជាផ្លូវការ។

នៅលើទំព័រផ្ទាល់របស់លោក អ្នកនាំពាក្យទីស្ដីការ ដែលសម្បូរដោយវោហាស័ព្ទ បានលើកឡើងថា លោក ហ៊ុន ហែន ជាប់ជានាយករដ្ឋមន្រ្តី ពីសម្លេងប្រជាពលរដ្ឋភាគច្រើន ហើយលោកក៏ចង់ដើរតួនាទី ជារាស្រ្តផង និងជា​នាយករដ្ឋមន្រ្តីផង។ លោក ស៊ីផាន បានបន្តថា លោក ហ៊ុន សែន ចង់ទទួលបាន នូវរបាយការណ៍ដោយផ្ទាល់ ពីមន្រ្តីគ្រប់ជាន់ថ្នាក់ ពិសេសពីប្រជាពលរដ្ឋ ដែលគ្មានលទ្ធភាព អាចជួប និងជូនរបាយការណ៍ផ្ទាល់ដៃ មក​ដល់​លោក។

លោកផៃ ស៊ីផាន បានសរសេរទៀតថា៖ «សម្តេចតេជោ នាយករដ្ឋមន្ត្រី (...) មានទស្សនៈទានយល់ឃើញ​វែង​ឆ្ងាយ រាប់ទាំងវិស័យសង្គម ដើម្បីសន្តិភាព ការរីកចំរើន និងឯកភាពជាតិ។ ហ្វេសប៊ុក របស់សម្តេចតេជោ គឺជា​លំហរទស្សនៈសាធារណៈមួយ ដែលលោកទទួលបានដឹង និងយល់ពីសេចក្តីត្រូវការ​ពិតប្រាកដ សេចក្តី​បារម្មណ៍​ពិតប្រាកដ ឬសំណូមពរពិតប្រាកដ របស់ប្រជាពលរដ្ឋ។ (...) របាយការណ៍ជាផ្លូវការរបស់មន្ត្រី និង​របាយការណ៍​របស់ប្រជាពលរដ្ឋ ជូនផ្ទាល់ដល់សម្តេចតេជោ ។ (...) សម្តេចតេជោ មានលទ្ធភាពគ្រប់គ្រាន់ នៅ​ក្នុង​កិច្ច​ប្រាស្រ័យទាក់ទង ផ្ទាល់ជាមួយមហាជនរបស់លោក ដូចជាការបង្ហាញនូវទស្សនៈ ឬសេចក្តីអំពាវនាវ​របស់​លោក ទៅកាន់សាធារណៈជន ក្នុងនាមជារាមច្បង ឬអ្នកទទួលខុសត្រូវជាន់ខ្ពស់ម្នាក់ នាំមុខរបស់រដ្ឋ។»

បន្ទាប់ពីបង្កើតបានជិតប្រាំឆ្នាំមកនេះ ទំព័រហ្វេសប៊ុក ដែលមានឈ្មោះថា «Samdech Hun Sen, Cambodian Prime Minister» មានអ្នកចូលទៅ«Like» រហូតដល់ជាងមួយលាននាក់ កាលពីថ្ងៃទី២០ ខែកញ្ញា ឆ្នាំ២០១៥​នេះ។ ឃ្លាដំបូងគេ របស់ទំព័រហ្វេសប៊ុកនេះ មានសរសេរថា៖ «Become a true supporter of Samdech Hun Sen, Prime Minister of Cambodia today» កាលពីថ្ងៃទី២៩ ខែមិថុនា ឆ្នាំ២០១០។

ប៉ុន្តែចំនួនអ្នក «Like» របស់ទំព័រហ្វេសប៊ុកលោក ហ៊ុន សែន នៅតែមានចំនួន តិចជាងទំព័រហ្វេសប៊ុក «Sam Rainsy» របស់ប្រធានគណបក្សសង្គ្រោះជាតិ លោក សម រង្ស៊ី ដែលគិតមកត្រឹមថ្ងៃទី២៥ ខែកញ្ញា ឆ្នាំ២០១៥​នេះ មានទទួលចំនួនអ្នក«Like» រហូតដល់ជាងមួយលានកន្លះ៕