កឹម គុណវឌ្ឍ ស្ម័គ្រ​លា​លែង ឬ​គេ​កំហិត​ឲ្យ​ចេញ?

រហូតមកដល់ពេលនេះ គេនៅមិនទាន់ដឹងច្បាស់នៅឡើយទេ អំពីមូលហេតុពិតប្រាកដ នៅពីក្រោយការលាលែង​ពីតំណែងដ៏កម្ររបស់មន្រ្តីកម្ពុជាថ្នាក់អគ្គនាយកដ្ឋាន គឺលោកកឹម គុណវឌ្ឍ អគ្គនាយកទូរទស្សន៍ជាតិកម្ពុជា។ គេ​មានការសង្ស័យ ទំនងជាជាប់ពាក់ព័ន្ធនឹងសម្ពាធនយោបាយ និងភាពមិនចុះសម្រុងគ្នា ក្នុងប្រព័ន្ធការងារ។
Loading...
  • ដោយ: អ៊ុំ បូរី ដោយ អ៊ំ បូរី (ទាក់ទង៖ [email protected]) - ភ្នំពេញ ថ្ងៃទី២២ ឧសភា ២០១៤
  • កែប្រែចុងក្រោយ: May 22, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

រហូតមកដល់ពេលនេះ គេនៅមិនទាន់ដឹងច្បាស់នៅឡើយទេ អំពីមូលហេតុពិតប្រាកដ នៅពីក្រោយការលាលែង​ពីតំណែងដ៏កម្ររបស់មន្រ្តីកម្ពុជាថ្នាក់អគ្គនាយកដ្ឋាន គឺលោកកឹម គុណវឌ្ឍ អគ្គនាយកទូរទស្សន៍ជាតិកម្ពុជា។ គេ​មានការសង្ស័យ ទំនងជាជាប់ពាក់ព័ន្ធនឹងសម្ពាធនយោបាយ និងភាពមិនចុះសម្រុងគ្នា ក្នុងប្រព័ន្ធការងារ។


លោក កឹម គុណវឌ្ឍ បន្ទាប់ពីលោកបោះឆ្នោតរួច នៅខែកក្កដា ឆ្នាំ២០១៣។ (រូបថត ហ្វេសប៊ុក)

មុខតំណែង- ក្រោយពីចាកចេញពីតំណែងយ៉ាងតក់ក្រហល់ រហូតមកទល់ពេលនេះ សាមីខ្លួនផ្ទាល់លោក កឹម គុណវឌ្ឍ អតីតអគ្គនាយកទូរទស្សន៍ជាតិកម្ពុជា មិនបានបំភ្លឺមូលហេតុពិតប្រាកដ ជុំវិញការចាកចេញ​ពីមុខតំណែង​ដ៏ខ្លឹមនេះ នោះទេ តែលោកបានបង្ហើបតាមរបៀបចុងមាត់ចុងក ដល់ប្រព័ន្ធសារព័ត៌មាន ក្នុងស្រុកថា «សូមទុកឲ្យខ្ញុំ​នៅស្ងៀមស្ងាត់ទៅ» ហើយលោកក៏បានបង្វែរចម្ងល់ ឲ្យទៅសួរលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន។

មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ និងអង្គការអ្នកសារព័ត៌មានគ្មានព្រំដែន តាមរយៈថ្លែងការណ៍​រួមចុះថ្ងៃទី២១ ខែឧសភាបានលើកឡើងថា ការចុះចេញពីតំណែងរបស់លោកកឹម គុណវឌ្ឍ កើតឡើងតែ ប៉ុន្មានថ្ងៃ ក្រោយពីទូរទស្សន៍ជាតិកម្ពុជា បានចាក់ផ្សាយនូវសារនយោបាយរបស់គណបក្សសង្គ្រោះជាតិ អមដោយរូបភាព​ការបង្ក្រាបលើក្រុមអ្នកតវ៉ា ពីសំណាក់រដ្ឋាភិបាល ដែលនាំឲ្យមានការសង្ស័យយ៉ាងខ្លាំង និង ហាក់បង្ហាញពីការជំរុញ​ផ្នែកនយោបាយ នៅពីក្រោយការចាកចេញពីតំណែងនេះ។

តែសម្រាប់លោកខៀវ កាញារីទ្ធ រដ្ឋមន្រ្តីក្រសួងព័ត៌មាន នៅថ្ងៃទី២២ ខែឧសភានេះ បានអត្ថាធិប្បាយ លើទំព័រហ្វេស​ប៊ុកផ្លូវការរបស់ខ្លួនថា៖ «នៅសុខៗឃើញអង្គការមួយចេញ (ផ្សាយ) ថា គុណវឌ្ឍ ត្រូវដកពីតំណែងព្រោះផ្សាយពី បក្សប្រឆាំង ។ ចុះយ៉ាប់អី យ៉ាប់យ៉ាងហ្នឹង ? បើគុណវឌ្ឍ មិនផ្សាយបានត្រូវដក នេះបើកុំតែព័ទ្ធវ៉ៃអ្នកថតទូរទស្សន៍ ទទក បែបផ្សាយច្រើនជាងហ្នឹងផង។ គុណវឌ្ឍ សូមលាលែងពីអគ្គនាយកទូរទស្សន៍ តែគាត់នៅ​ជាប្រតិភូរាជ​រដ្ឋាភិបាល (ថានៈស្មើរដ្ឋលេខាធិការ) ទទួល (បន្ទុក) ទទក ទេតើ។»

គួរកត់សម្គាល់ថា កាលពីថ្ងៃសៅរ៍ ទី១៧ ខែឧសភា កន្លងមក លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បាន​អះអាងពីការ លាលែងចេញពីដំណែងជាអគ្គនាយក ទទក របស់លោក កឹម គុណវឌ្ឍ ខណៈលោកប៉ាង ណាត ត្រូវ​បានតែងតាំងជាអគ្គនាយកស្តីទី ប៉ុន្តែលោកខៀវ កាញារីទ្ធ មិនបានបញ្ជាក់អំពីមូលហេតុ នៃការលាលែងដ៏គួរឲ្យ​ភ្ញាក់ផ្អើលនេះទេ។

ការលាលែងពីតំណែងរបស់លោក កឹម គុណវឌ្ឍ ត្រូវបានគេកត់សម្គាល់ឃើញថា កើតឡើងភ្លាមៗក្រោយ​ពី​ទូរទស្សន៍​ជាតិកម្ពុជា អាក់ខានការផ្សាយផ្ទាល់ ការប្រារព្ធព្រះរាជពិធីច្រត់ព្រះនង្គ័ល។ ទន្ទឹមនឹងការខក​ខានការ​ផ្សាយផ្ទាល់ ក្រសួងព័ត៌មានភ្លាមៗ ក៏បានចេញផ្សាយសេចក្តីប្រកាសព័ត៌មាន ដោយពន្យល់ថា បណ្តាលមកពីការ​ខ្វះទំនាក់ទំនងព័ត៌មាន និងខ្សែសង្វាក់ការងារបានល្អ។

បើទោះជាមូលហេតុពិតប្រាកដ នៅពីក្រោយការលាលែងរបស់លោក កឹម គុណវឌ្ឍ មិនទាន់ត្រូវបានទម្លាយ​ជា​សាធារណៈក៏ដោយ ក៏មជ្ឈដ្ឋានមួយចំនួនក្នុងសង្គម បានឲ្យតម្លៃរួចជាស្រេច ដល់លោកកឹម គុណវឌ្ឍ ដែលមាន​ការទទួលខុសត្រូវ ហ៊ានចាកចេញពីមុខតំណែង ត្រឹមកាលៈទេសៈ ភាពមិនប្រក្រតីការងារ។

តែគេនៅតែមានមន្ទិលសង្ស័យនៅឡើយ ព្រោះមន្រ្តីកម្ពុជាកម្រចាកចេញពីមុខតំណែងគ្រាក់ៗ ដោយស្ម័គ្រចិត្ត ជា​ទីបំផុត បើទោះជាពួកគេជាប់ជំពាក់នឹងរឿងអាស្រូវ ពុករលួយ រំលោភអំណាច វិសមិតភាពការងារ អសមត្ថភាព ឬ​ធ្វេសប្រហែលក្នុងការងារ បង្កឲ្យមានគ្រោះមហន្តរាយធ្ងន់ធ្ងរ មានករណីរត់ជាន់គ្នានៅកោះពេជ្រ ជាដើមនោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...