ភាពយន្ដឥណ្ឌាមួយ ដែលនឹងនិយាយពីការបាត់ខ្លួន យ៉ាងអាថ៌កំបាំងកាលពីដើមខែមីនាកន្លងទៅ របស់យន្ដហោះ​ប៊ូអីង ៧៧៧ នៃក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ បានផ្សាយជាលើកដំបូង នូវស្ពតផ្សាយ​ពាណិជ្ជកម្ម​របស់ខ្លួន នៅក្នុងឱកាសមហោស្រពភាពយន្ដ នៅទីក្រុងកានប្រទេសបារាំង។ ការចេញផ្សាយត្រឹមតែជាស្ពត​ពាណិជ្ជកម្ម មិនទាន់គ្រោងនឹងចេញបញ្ចាំងនៅរោងផង តែសង្គ្រាមពាក្យសម្ដីបានផ្ទុះឡើងជាហូរហែររួចជាស្រេច។

ឈុតមួយនៅក្នុងភាពយន្ដ ដែលផ្តិតចេញពីស្ពតពាណិជ្ជកម្ម។

បាត់យន្ដហោះ - ៦សប្ដាហ៍កន្លងទៅ បន្ទាប់ពីការធ្លាក់យន្ដហោះ ដែលភ្ជាប់ជើងហោះហើរ MH 370 ពីរដ្ឋធានី​កូឡាឡំពួរ ឆ្ពោះទៅរដ្ឋធានីប៉េកាំង ប៉ុន្តែសោកនាដកម្មដ៏ជូរចត់នេះ នៅតែត្រូវបានគេយកចិត្តទុកដាក់ យ៉ាង​សន្ធោ​សន្ធៅនៅឡើយ។ ជាពិសេសនៅបន្ទាប់ពីខ្សែភាពយន្ដ របស់សមិទ្ធិការជាតិឥណ្ឌាមួយរូប លោក រូប៉េស ផូល (Rupesh Paul) ត្រូវបានផលិតឡើង ហើយកំពុងត្រៀមនឹងចេញបញ្ចាំងនៅតាមរោង។

ខ្សែភាពយន្ដបានចេញផ្សាយដំបូង នូវស្ពតផ្សាយពាណិជ្ជកម្មមួយ និងត្រូវបានសមិទ្ធិករភាពយន្ដខ្លួនឯង យកមក​បង្ហាញនៅមហោស្រពភាពយន្ដ នាទីក្រុងកាន ប្រទេសបារាំងនោះផង។ លោក រូប៉េស ផូល ដែលកន្លងត្រូវ​បាន​ស្គាល់ នៅក្នុងភាពយន្ដវិធីសាស្ត្ររួមភេទឥណ្ឌា Kamasutra ប្រភេទ 3D ឬនៅក្នុងភាពយន្ដបីសាចជញ្ជាក់ឈាម​នោះ បាននិយាយថា លោកចង់បង្ហាញពីនាទីចុងក្រោយ របស់អ្នកដំណើរទាំង២៣៩នាក់ ដែលនៅលើយន្ដហោះ​បាត់​ខ្លួន។

ផលិតចេញជាភាពយន្ដ ខណៈការស៊ើបអង្កេតនៅមិនទាន់ដឹងពីអ្វីនៅឡើយ....

នៅក្នុងស្ពតពាណិជ្ជកម្មផ្សាយភាពយន្ដ ក៏ដូចជាសមិទ្ធិករភាពយន្ដខ្លួនលោកផ្ទាល់ បាននិយាយថា ស្នេហាត្រីកោន ទំនងជាមូលហេតុដែលឈានទៅដល់ ហេតុការណ៍ដ៏រន្ធត់នេះ។ ប៉ុន្តែការលើកឡើងពីសាច់រឿងបែបនេះ មិនបាន​ទុកឲ្យបណ្ដាជនទូទៅ ដែលតាមដានការបាត់ខ្លួនរបស់យន្ដហោះប៉ូអីង បាត់មាត់ស្ថាត់សម្លេងមិនធ្វើប្រតិកម្ម​នោះ​ឡើយ ព្រោះថា ការស៊ើបអង្កេត ទាក់ទងនឹងមូលហេតុនៃការបាត់យន្ដហោះ មិនទាន់បានឈានទៅដល់ ការធ្វើ​សេចក្ដីសន្និដ្ឋានណាមួយទេ។

យ៉ាងណាក៏ដោយ លោក រូប៉េស ផូល នៅតែចេញមកការពារខ្លួនថា៖ «ទស្សនិកជនមិនទិញសំបុត្រ ចូលទស្សនា​ភាពយន្ដ​ឯកសារនោះទេ តែគេចង់មើលពីសាច់រឿង ដ៏រំជើបរំជួលណាមួយ។ ហេតុអ្វីបានជាខ្ញុំត្រូវធ្វើភាពយន្ដមួយ ដែលគ្មាននរណាចូលចិត្ត?»

លោកនិយាយទៀតថា៖ «នេះជាការសង្ស័យមួយ ដែលអាចនឹងជួយយើងបាន នៅក្នុងការស៊ើបអង្កេត។ ប៉ុន្តែយើង​មិនធ្វើអាជីវកម្ម ទៅលើការបាត់ខ្លួនរបស់យន្ដហោះនេះទេ។» ភាពយន្ដនេះនឹងគ្រោងដាក់បញ្ចាំងនៅតាមរោង នៅ​រដូវស្លឹកឈើជ្រុះខាងមុខ (រវាងខែសីហា ទៅខែវិច្ឆិការ)។ ហើយបើតាមការស្ទង់មតិ នៅទ្វីបអាស៊ីជាពិសេសនៅ​ប្រទេស​ម៉ាឡេស៊ី ទំនងជាចាប់អារម្មណ៍ខ្លាំងនឹងសាច់រឿងនេះ៕

សូមទស្សនាស្ពតភាពយន្ដ៖