ប្រទេសវៀតណាម និងហ្វីលីពីន បានបរិហារទីក្រុងប៉េកាំង ទាក់ទងនឹងចរិករំលោភបំពាន នៅក្នុងសមុទ្រចិន​ខាង​ត្បូង កាលពីថ្ងៃអាទិត្យទី១១ ខែឧសភានេះ នៅក្នុងជំនួបកំពូលអាស៊ាន ដែលបានប្រារព្ធធ្វើជាលើកទីមួយ នៅក្នុង​ប្រទេសភូមា។

វានាចិនប្រើប្រដាប់បាញ់ទឹកដាក់នាវាល្បាតរៀតណាម នៅថ្ងៃទី៥ ខែឧសភាឆ្នាំ២០១៤។ (រូបថត Reuters)

ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី១១ ឧសភា ២០១៤
-----------------------------------

ជម្លោះដែនទឹក - ការប្រឈមមុខគ្នា រវាងនាវាចម្បាំងចិន និងវៀតណាមនៅក្បែរនឹងប្រជុំកោះប៉ារ៉ាសែល បានធ្វើ​ឲ្យ​កំហឹងដែលកើតពីជម្លោះដែនទឹកនៃប្រទេសទាំងពីរ​ បានផ្ទុះឡើងសារជាថ្មី។ បញ្ហាដែលសំខាន់ និងមិនពិបាករក​មូលហេតុនោះ គឺក្រុងប៉េកាំង បានកំណត់ថាតំបន់នៅជុំវិញនោះ ស្ថិតក្នុងអធិបតេយ្យនៃដែនទឹករបស់ខ្លួន។

សមាជិកជាច្រើនរបស់សមាគមប្រជាជាតិអាស៊ី-អាគ្នេយ៍ ហៅកាត់ថា អាស៊ាន បានច្រានចោលនូវការ​កំណត់របស់​ប្រទេសចិន ដោយនិយាយតែរៀងៗខ្លួនដែរថា តំបន់នោះក៏មានស្ថិតក្នុងដែនអធិបតេយ្យភាពរបស់ពួកគេដែរ។ ប៉ុន្តែ​ពីក្នុងចំណោមនោះ មានសមាជិកភាគច្រើន មិនចង់មានបញ្ហានយោបាយ និងសេដ្ឋកិច្ចជាមួយមហាយក្សចិន ដោយ​សារតែជម្លោះទឹកដីនេះទេ។

នៅក្នុងសេចក្ដីប្រកាសព័ត៌មានមួយ នៅពេលបញ្ចប់ជំនួបនៅថ្ងៃអាទិត្យតី១១ ខែឧសភា នៃមេដឹកនាំនៃក្រុមប្រទេស​អាស៊ាន បានបង្ហាញពីការព្រួយបារម្ភរបស់ពួកគេ និងបានទាមទារឲ្យភាគីមានជម្លោះ ដោះស្រាយស្រាយបញ្ហាដែន​សមុទ្រនេះ ដោយការអត់ធ្មត់ ប៉ុន្តែមិនបានដាក់បញ្ចូលប្រទេសចិន នៅក្នុងសេចក្ដីប្រកាសព័ត៌មាននោះទេ។

យ៉ាងណាក៏ដោយ ប្រទេសវៀតណាម និងប្រទេសហ្វីលីពីន បានបកស្រាយថា សេចក្ដីប្រកាសព័ត៌មាននេះ មាន​លក្ខណៈ«មិនគ្រប់គ្រាន់»។

នាយករដ្ឋមន្ត្រីវៀតណាម លោក ង្វៀង តាន់ដុង បានថ្លែងប្រកាសថា ក្រុងប៉េកាំងបានបោះទីតាំងនៅលើដែន​សមុទ្រ​របស់ខ្លួន នូវសម្ភារៈរុករកប្រេង ដោយមានអមជាមួយនឹងនាវាចម្បាំង ព្រមទាំងយន្ដហោះប្រដេញជាច្រើនគ្រឿង។ លោកបាននិយាយទៀតថា នាវារបស់ប្រទេសចិន បានប្រើម៉ាស៊ីន​ធំៗ បាញ់ទឹកសំដៅនាវាល្បាត និងកាណូត​របស់​ពលរដ្ឋ​វៀតណាម ដែលធ្វើ​ឲ្យ​មានការខូចខាត និងមានមនុស្សមួយចំនួនរងរបួសនោះផង។

ចំណែកប្រធានាធិបតីនៃប្រទេសហ្វីលីពីន ប៊េនីណូ អាគីណូ បានថ្លែងនៅក្នុងឱកាសនោះ ប្រហាក់ប្រហែលនឹង​បញ្ហា​ដែលប្រទេសវៀតណាមបានលើកឡើងដែរ ហើយលោក បានសុំឲ្យសមាជិកផ្សេងទៀត នៅក្នុងអាស៊ាន ជួយ​ដោះ​ស្រាយបញ្ហានេះ ដោយរំពឹងទៅលើសហគមន៍អន្តរជាតិជាអាជ្ញាកណ្ដាល៕