ទាហានជើងចាស់ មេដឹកនាំបក្សកុំម្មុយនីសវៀតណាម និងក្រុមអ្នកមុខអ្នកមាត់ជាច្រើនសិបនាក់ បានជួបជុំគ្នានៅ​ថ្ងៃពុធនេះ នៅក្នុងទីក្រុងដៀនបៀនភូ ដើម្បីប្រារព្ធពិធីរំលឹកខួបទី៦០ នៃជ័យជំនះជា«ប្រវត្តិសាស្ត្រ» របស់ប្រជាជន​វៀតណាម ទៅលើកងទ័ពអាណានិគមបារាំង។

ព្យុះហយាត្រា របស់កងទ័ពប្រជាជនបដិវត្តន៍វៀតណាម ក្នុងថ្ងៃរំលឹកខួបទី៦០ នៅដៀនបៀនភូ។ (រូបថត Reuters)

ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី០៧ ឧសភា ២០១៤
---------------------

ដៀនបៀនភូ - រដ្ឋមន្ត្រីក្រសួងការពារជាតិរបស់វៀតណាម លោក ភុង ក្វនថាញ់ (Phung Quang Thanh) ដែលមាន​វត្តមាន​នៅក្នុងពិធីនោះដែរ បានថ្លែងថា៖ «ជ័យជំនះនៅដៀនបៀនភូ នេះ បានជួយដាក់បញ្ចប់នូវសម័យកាល​អាណានិគមនិយម​ និងបាននាំប្រទេសវៀតណាម ឲ្យឈានឆ្ពោះទៅកាន់ឯករាជ្យភាព»។

ប្រធានសារមន្ទីរដែលតាំងបង្ហាញ ទាក់ទងនឹងសង្គ្រាមរវាងបារាំង និងវៀតណាមក្នុងសម័យនោះ លោក វូ ណាមហៃ (Vu Nam Hai) បានសង្កត់ធ្ងន់ដែរថា បើគ្មានដៀនបៀនភូ ការបង្រួបបង្រួមជាតិ (រវាងវៀតណាមខាងជើង និង​វៀតណាម​ខាងត្បូង) នឹងមិនអាចកើតមានបានទេ។

បន្ទាប់បានប្រឈមមុខតទល់គ្នាយ៉ាងស៊ីសាច់ហុតឈាម អស់រយៈពេល៥៦ថ្ងៃ រវាងកងទ័ពបារាំង និងវៀតណាម សង្គ្រាមនេះបានបញ្ចប់ទៅនៅថ្ងៃទី៧ ខែឧសភា ឆ្នាំ១៩៥៤ ដោយកងទ័ពវៀតណាម បានចូលទៅវាយកបាន នូវ​លេណដ្ឋានចុងក្រោយរបស់កងទ័ពបារាំង ដែលជានិមិត្តរូបបង្ហាញពីការដួលរលំ នៃរបបអាណានិគម​របស់ប្រទេស​អ៊ឺរ៉ុបមួយនេះ នៅលើទឹកដីឥណ្ឌូចិន។

ចម្បាំងនេះ បានធ្វើឲ្យមានមនុស្សស្លាប់ ខាងវៀតណាម ប្រមាណជា១សែន​នាក់ និងខាងបារាំង ប្រមាណជា​៣ពាន់​នាក់ (ឬបាត់ខ្លួន)។ ប៉ុន្តែខាងបារាំង មេបញ្ជាការកងទ័ព និងទាហានប្រមាណ​ជា ១សែននាក់ផ្សេងទៀត ត្រូវបានចាប់​ជាឈ្លើយសង្គ្រាម តែភាគច្រើនពីក្នុងចំណោមនោះ ត្រូវបានដោះលែង នៅប៉ុន្មានខែក្រោយមក៕