ក្រុមអនាមិក វាយ​គេហទំព័រ​សារព័ត៌មាន​ដើម​អំពិល ស្លាប់​បាត់​ហើយ?

នៅថ្ងៃទី២៧ ខែមេសានេះ គេហទំព័រសារព័ត៌មានដើមអំពិល ដែលគេស្គាល់ថាមាននិន្នាការលំអៀង ទៅរក​រដ្ឋាភិបាលក្រុងភ្នំពេញ ត្រូវបានក្រុមហេកឃើ អនាមិកកម្ពុជា វាយប្រហារ បើកលែងចេញតាំងពី​ម៉ោង១០យប់​រៀងមក។
Loading...
  • ដោយ: សេក មនោរកុមារ
  • កែប្រែចុងក្រោយ: April 27, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

នៅថ្ងៃទី២៧ ខែមេសានេះ គេហទំព័រសារព័ត៌មានដើមអំពិល ដែលគេស្គាល់ថាមាននិន្នាការលំអៀង ទៅរក​រដ្ឋាភិបាលក្រុងភ្នំពេញ ត្រូវបានក្រុមហេកឃើ អនាមិកកម្ពុជា វាយប្រហារ បើកលែងចេញតាំងពី​ម៉ោង១០យប់​រៀងមក។


រូបសញ្ញារបស់ក្រុមហេកឃ័រ អនាមិក កម្ពុជា នៅពេលគេហទំព័រណាមួយត្រូវបានវាយប្រហារសម្រេច។

បច្ចេកវិទ្យា - គេហទំព័រដ៏ធំនៃសារព័ត៌មានដើមអំពិល របស់អ្នកសារព័ត៌មាន និងអ្នកវិភាគល្បីឈ្មោះលោក សយ សុភាព ដែលគេស្គាល់ថាមាននិន្នាការលំអៀងទៅគណបក្សកាន់អំណាច និងរដ្ឋាភិបាលនោះ បានរងការវាយ​ប្រហារ​បើកលែងចេញ តាំងពីវេលាម៉ោងប្រមាណជា១០យប់ថ្ងៃទី២៧ ខែមេសា ឆ្នាំ២០១៤នេះមក។

បើគេចុចចូលទៅកាន់គេហទំព័រនេះ គេនឹងឃើញសារជាភាសាអង់គ្លេសមួយឃ្លា សរសេរថា «Sorry, We are updating, We will be back soon» ដែលមានន័យជាខេមរភាសាថា «សុំទោស យើងកំពុងធ្វើការផ្លាស់ប្ដូរទិន្នន័យ, យើងនឹងត្រឡប់មកវិញក្នុងពេលឆាប់ៗខាងមុខ»។ នៅនឹងគេហទំព័រមួយទៀត ដែលមានឈ្មោះថា LOOKING TODAY របស់មជ្ឈមណ្ឌលសារព័ត៌មានដើមអំពិលដដែល ក៏បានសរសេរជាសេចក្ដីជូនដំណឹងដែរថា គេហទំព័រ​ដើមអម្ពិល ត្រូវបានក្រុម Anonymous Cambodia ប្រកាសនៅលើហ្វេសប៊ុក ថាជាអ្នកវាយប្រហារ (Hack)។ សេចក្ដី​ជូន​ដំណឹង​នោះ បានសរសេរទៀតថា «គេហទំព័រដើមអម្ពិល ត្រូវបានគាំងមិនដំណើរ នៅវេលាម៉ោង ១០:០៣​នាទី យប់ថ្ងៃទី ២៧ ខែមេសា ឆ្នាំ២០១៤»។

ប៉ុន្តែរហូតមកដល់ម៉ោង ១០ និង៤៥នាទី ទើបគេឃើញនៅលើទំព័រហ្វេសប៊ុក Anonymous Cambodia មានការ​ប្រកាសនៅលើជញ្ជាំងរបស់ទំព័រនេះ ដាក់ជាភាសាអង់គ្លេសថា «Everything it is Destroy» ដែលមានន័យថា «អ្វីៗទាំងអស់ ត្រូវបានកម្ទេចចោល»។

នៅយប់ថ្ងៃទី២៧ ខែមេសានេះ ទស្សនាវដ្ដីមនោរម្យ.អាំងហ្វូ មិនអាចសុំការបកស្រាយណាមួយ ពីអ្នកទទួលខុសត្រូវ របស់គេហទំព័រសារព័ត៌មានដើមអំពិលនេះ បាននៅឡើយ។

ក្រុមដែលប្រកាសថា ជាជនហេកឃើអានាមិកនេះ បានគម្រាមតាំងពីច្រើនថ្ងៃមកហើយ ពីការវាយលុកខាង​ព័ត៌មាន​វិទ្យារបស់ពួកគេ ទៅលើបណ្ដាគេហទំព័រទាំងឡាយណា ដែលមាននិន្នាការស្និតនឹងរដ្ឋាភិបាល ឬជារបស់​រដ្ឋាភិបាល​តែម្ដង។ គ្រាន់តែប៉ុន្មានថ្ងៃចុងក្រោយនេះ គេហទំព័ររបស់រដ្ឋាភិបាលជាច្រើន ត្រូវបានក្រុមនេះប្រកាសថាបាន​វាយ​ប្រហារ ហើយក៏កំពុងមានគម្រោងនឹងធ្វើការវាយ​ប្រហារ ទៅលើគេហទំព័រផ្សេងៗទៀត ជាបន្តបន្ទាប់ដែរ។

ក្រុមនេះ បានប្រកាសថា បុព្វហេតុរបស់ពួកគេ គឺប្រឆាំងនឹងរដ្ឋាភិបាលពុករលួយ បំបិទសិទ្ធិពលរដ្ឋ និងដើម្បីលទ្ធិ​ប្រជាធិបតេយ្យ​ជួន​ប្រជាជនខ្មែរ​គ្រប់រូប។ នៅក្នុងសេចក្ដីប្រកាសព័ត៌មានមួយ ដែលចេញផ្សាយនៅលើទំព័រ Anonymous Cambodia នេះ បានសរសេរថា «ពួកយើងមិនមែនជាក្រុមមនុស្ស ដែលមានសមាជិកតិចនៅកម្ពុជា ដែលអ្នក (រដ្ឋាភិបាល) អាច​ព្រងើយកន្តើយបានទេ។ ពួកយើង គឺជាក្រុមដែលពោរពេញទៅដោយមនុស្សចិត្តដូចគ្នា ហើយសមាជិក​ពួក​យើង ត្រូវបានរៀបចំយ៉ាងមានសណ្តាប់ធ្នាប់ ទូទាំងពិភពលោក។ យើងសូមប្រាប់ដល់អ្នក អោយ​បានច្បាស់ថា យើងកំពុង​ប្រកាសសង្គ្រាមទៅលើប្រព័ន្ធ ដែលអ្នកបានដាក់មកលើយើង។ ឥឡូវសត្រូវដ៏ធំបំផុត​របស់អ្នក គឺជាពលរដ្ធ​របស់​អ្នក។»

មន្ត្រីនាំពាក្យរបស់រដ្ឋាភិបាលកម្ពុជា លោក ផៃ ស៊ីផាន ធ្លាប់បានថ្លែងតាមវិទ្យុអាស៊ីសេរី ​ចាត់​ទុក​ការ​គំរាម​វាយ​លុក​ទៅ​លើ​ប្រព័ន្ធ​ព័ត៌មានវិទ្យារបស់​រដ្ឋាភិបាល ពី​សំណាក់​ក្រុម​ហេកឃ័រ​អនាមិក​នេះ ថា​ជា​«អំពើ​ភេរវកម្ម» ព្រោះ​វាជា​ការ​ប្រឆាំង​ទៅ​នឹង​ ដំណើរ​ការ​«ប្រក្រតី​»នៃការងារ​រដ្ឋបាល​របស់​រដ្ឋ។

អ្វីដែលជាការកត់សម្គាល់នោះ គេបានមើលឃើញថា ប្រជាប្រិយភាពរបស់ក្រុមជនអនាមិកម្ពុជានេះ បានកើនឡើង​យ៉ាងខ្លាំង បន្ទាប់ពីយុវនិស្សិតខាងព័ត៌មានវិទ្យាពីររូប ត្រូវបានអាជ្ញាធរកម្ពុជាចាប់ខ្លួន កាលពីដើមខែមេសានោះមក។ ទំព័រហ្វេសប៊ុក Anonymous Cambodia នេះទើបនឹងបង្កើតនៅថ្ងៃទី២២ ខែមេសា ឆ្នាំ២០១៤ប៉ុណ្ណោះ តែមកទល់​នឹង​ថ្ងៃទី២៧ ខែមេសា (ប្រាំថ្ងៃក្រោយមក) មានមនុស្សចូលទៅចុចចូលចិត្តតាមដាន (Like) ដល់ទៅ ជាង១ម៉ឺន​៦ពាន់​នាក់ ដែលជាចំនួនដ៏ច្រើនមួយ សម្រាប់រយៈពេលដ៏ខ្លីបែបនេះ។ ជាពិសេស នៅរាល់ការចុះផ្សាយរបស់ទំព័រ​នេះ​ម្ដងៗ គេ​តែងសង្កេតឃើញមានការចែកផ្សាយជាបន្តបន្ទាប់យ៉ាងច្រើន ហើយអ្នកសរសេរដាក់យោបល់វាចា«គាំទ្រ» សកម្មភាព​វាយ​ប្រហារ​របស់ក្រុមនេះ ក៏មានចំនួនច្រើនដែរ៕

----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៧ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...