នគរបាលរបស់ប្រទេសកូរ៉េខាងត្បូង បានប្រកាសនៅថ្ងៃអង្គារទី១៥ ខែមេសានេះ ពីការឃាត់ខ្លួនបុរសម្នាក់ បន្ទាប់ពី​អាជ្ញាធរបានសង្ស័យថា បុរសនេះបានទុកឲ្យកូនរបស់ខ្លួនស្លាប់ នឹងអត់បាយ ខណៈខ្លួនឯងបាន​ឈ្លក់វង្វេងជារៀង​រាល់ថ្ងៃ ជាមួយនឹងល្បែងវីដេអូ (ហ្គេម - Video game)។

នៅកូរ៉េខាងត្បូង ការឈ្លក់លេងល្បែងវីដេអូ បានក្លាយជាវប្បធម៌មួយ។ (រូបថតឯកសារ)

ឆ្កួតនឹងល្បែង - សំនុំរឿងនេះ បានបង្កឲ្យមានការជជែកវែកញែកយ៉ាងផុលផុលមួយ នៅប្រទេសកូរ៉េខាងត្បូង ហើយនឹងជំរុញឲ្យរដ្ឋសភារបស់ប្រទេសនេះ អាចនឹងចេញច្បាប់មួយ ចាត់ទុកល្បែងតាមវីដេអូ ទៅក្នុងប្រភេទ​ល្បែង​ដែលធ្វើឲ្យមានភាពឆ្កួតវង្វេង ដូចទៅនឹងគ្រឿងញៀន សុរា និងការភ្នាល់គ្នាយ៉ាងដូច្នេះដែរ។

បុរសឆ្កួតនឹងល្បែងតាមវីដេអូ ដែលបើតាមនគរបាលបានឲ្យដឹងថា មានឈ្មោះ ជុន អាយុ២២ឆ្នាំនោះ ត្រូវបានឃាត់​ខ្លួនកាលពីថ្ងៃចន្ទទី១៤ ខែមេសា បន្ទាប់ពីអាជ្ញាធរបានរកឃើញសាកសពហើមរលួយ នៃកូនប្រុសអាយុ២ឆ្នាំ របស់​បុរសនេះ នៅក្នុងស្បោងសម្រាមមួយ ក្នុងទីក្រុង ដេហ្គូ (Daegu - ផ្នែកអាគ្នេយ៍នៃប្រទេស)។

កាលពីឆ្នាំ២០០៩ ប្រទេសកូរ៉េខាងត្បូង បានធ្លាប់ជួបប្រទះម្ដងហើយ នឹងសំនុំរឿងប្រហាកប្រហែលគ្នានេះ៖ ប្ដី​ប្រពន្ធ​វ័យក្មេងមួយគូ បានទុកឲ្យទារករបស់ខ្លួនអាយុ៣ខែ ស្លាប់នឹងអត់ឃ្លាន ខណៈពេលដែលប្ដីប្រពន្ធទាំងពីរនាក់ បាន​សំកុកនៅពីមុខអេក្រង់កំព្យូទ័រ ដើម្បីលេងល្បែងតាមអាំងធើណែត ជាពិសេសល្បែងដែលធ្វើការប្រកួតប្រជែង ពីការ​ចិញ្ចឹមបីបាច់កុមារដោយប្រយោល។

គ្រវែងសាកសព ទៅក្នុងសួនច្បារ

នៅចុងខែកុម្ភះ ប្រពន្ធរបស់បុរសត្រកូល ជុន បានរកបាននូវការងារមួយ នៅក្នុងរោងចក្រឆ្ងាយពីលំនៅដ្ឋាន​របស់​ប្ដី​ប្រពន្ធរស់នៅ ដែលធ្វើឲ្យនាងជាប្រពន្ធចាំបាច់ត្រូវចាកចេញពីផ្ទះ និងទុកប្ដីដែលគ្មានការងារធ្វើ​ ឲ្យនៅផ្ទះ ដើម្បី​មើលថែរក្សាកូនប្រុសតែមួយរបស់ពួកគេ។ ប៉ុន្តែបុរសត្រកូល ជុន បានចេញទៅសំកុកលេងល្បែងវីដេអូ នៅតាមតែ ស៊ីមប៊ែរកាហ្វេ (Cyber café - ហាងបម្រើសេវាកម្មអាំងធើណែត) ហើយបានត្រឡប់មកផ្ទះវិញ តែរវាងពី២ទៅ៣​ថ្ងៃ​ម្ដងប៉ុណ្ណោះ ដើម្បីធ្វើបាយចិញ្ចឹមកូនប្រុសដ៏តូចរបស់ខ្លួន។

នគរបាលបាននិយាយថា នៅថ្ងៃទី៣ ខែមីនាកន្លងទៅនេះ បុរស ជុន បានត្រឡប់ចូលផ្ទះវិញ ហើយបានដឹង​ថាកូន​របស់ខ្លួន ស្លាប់នៅក្នុងផ្ទះទៅហើយ។ ត្រកូល ជុន បានទុកសាកសពកូនចោល ក្នុងអំឡុងពេលជាងមួយខែ មុននឹង​ច្រករូបរាងកាយដែលហើមស្អុយរលួយនេះ ទៅក្នុងស្បោងផ្លាស្ទីក ហើយបោះចោលទៅក្នុងសួនច្បារមួយ ចម្ងាយ​ប្រមាណជា១០០ម៉ែត្រពីផ្ទះ។ មិនត្រឹមតែប៉ុណ្ណោះ បុរសជាឪពុកចិត្តអាក្រក់នេះ បានរាយការណ៍កុហកពីការបាត់ខ្លួន របស់​កូនប្រុសខ្លួនទៅនគរបាល មុននឹងទទួលស្គាល់ថា គឺខ្លួននេះហើយ ជាអ្នករៀបចំហេតុការណ៍ទាំងនេះឡើង ដើម្បីគេចចេញពីការ​ទទួលខុសត្រូវ។

ភាពឆ្កួតវង្វេង ដែលមានលក្ខណៈរីករាលដាល

ការសិក្សាជាលក្ខណៈជាតិមួយបានបង្ហាញថា ពលរដ្ឋកូរ៉េខាងត្បូង៧% ពីចំណោមពលរដ្ឋទាំងជាង៥០លាននាក់ ត្រូវបានចាត់ទុកនៅក្នុង«ហនីភ័យខ្ពស់» ពីភាពឆ្កួតវង្វេងនៃល្បែងវីដេអូតាមអាំងធើណែត ក្នុងនោះពលរដ្ឋដែល​មាន​វ័យជំទង់ មានកម្រិតតួលេខ«ឆ្កួតវង្វេង»នេះ រហូតដល់ទៅ១១,៧%។ ប្រទេសកូរ៉េខាងត្បូង ជាប្រទេសដែល​មាន​កម្រិតបច្ចេកវិទ្យាខ្ពស់ ហើយការភ្ជាប់លេងល្បែងវីដេអូ តាមអាំងធើណែតក៏មានកម្រិតខ្ពស់ជាងគេដែរ៕

----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី១៦ មេសា ២០១៤