ជម្រៅសមុទ្របង្កការពិបាក ឲ្យប្រអប់យន្ដចុះទៅរកយន្ដហោះបាត់ខ្លួន
ទឹកសមុទ្រនៅក្នុងតំបន់រុករកយន្ដហោះ នៃមហាសមុទ្រឥណ្ឌាខាងត្បូង មានជម្រៅយ៉ាងជ្រៅហួសពីការគណនាទុក និងហួសពីអ្វី ដែលប្រអប់យន្ដ ប៊្លូហ្វីន ២១ (Bluefin-21) អាចជ្រមុជចុះទៅរកយន្ដហោះប៊ូអីង៧៧៧ ដែលគេជឿថា បានហោះទៅធ្លាក់នៅក្នុងតំបន់នោះ។ អាជ្ញាធរអូស្ត្រាលី ដែលដឹកនាំការសម្របសម្រួល នៃការរុករកជាអន្តរជាតិនេះ បានថ្លែងបញ្ជាក់ថា នោះជាមូលហេតុដែលធ្វើឲ្យ ប្រអប់យន្ដប៊្លូហ្វីន២១ ធ្វើការបានតែ៦ម៉ោង ក៏ឡើងមកលើផ្ទៃសមុទ្រវិញ ខុសពីការគណនាទុកធម្មតា ដែលតម្រូវឲ្យប្រអប់យន្ដនេះធ្វើការរហូតដល់ទៅ១៦ម៉ោង។
ប្រអប់យន្ដ ប៊្លូហ្វីន ២១ ពេលត្រៀមដាក់ចុះទៅក្នុងសមុទ្រ។ (រូបថត Reuters)
បាត់យន្ដហោះ - យានយន្ដជ្រមុជទឹក ប៊្លូហ្វីន ២១ ដែលបំពាក់ដោយឧបករណ៍បាញ់រលកសម្លេង ត្រូវបានដាក់ឲ្យដំណើរការនៅយប់ថ្ងៃចន្ទ ទី១៤ ខែមេសា ដោយនាវាអូស្ត្រាលីឈ្មោះ Ocean Shield ដែលបានដឹកនាំការុករកយន្ដហោះ ដែលបានបាត់ខ្លួនយ៉ាងអាថ៌កំបាំង តាំងពីថ្ងៃទី៨ ខែមីនា មកនោះ។ ការិយាល័យរបស់ប្រទេសអូស្ត្រាលី ដែលដឹកនាំការសម្របសម្រួលនៃការរុករុក (JACC) នេះ បានថ្លែងបញ្ជាក់ថា «ប្រអប់យន្ដប៊្លូហ្វីន ២១ ធ្វើការងាររបស់វាលើកទីមួយ បានតែប្រាំមួយម៉ោងប៉ុណ្ណោះ តែវាបានជ្រមុជទៅដល់ជម្រៅកំណត់របស់វា ដែលមានត្រឹមតែ៤៥០០ម៉ែត្រ ជាហេតុនាំឲ្យម៉ាស៊ីនរុករកនេះ បានងើបឡើងមកលើផ្ទៃទឹកវិញ»។
ការិយាល័យនោះបានបញ្ជាក់ទៀតថា «ទិន្នន័យដែលប្រអប់យន្ដ បានប្រមូលបាននៅក្នុងរយៈពេល៦ម៉ោង ត្រូវបានឆ្លងកាត់ការវិភាគ តែមិនមានរកឃើញអ្វីគួរឲ្យកត់សម្គាល់នោះទេ»។
ផែនទីសមុទ្របានគូសវាសជាមុនថា តំបន់ដែលរុករកនេះ មានជម្រៅរវាងពី៤២០០ ទៅ៤៤០០ ម៉ែត្រ។ ប៉ុន្តែនោះមិនមែនជាជម្រៅ ដែលប្រអប់យន្ដប៊្លូហ្វីន ២១ បានជួបផ្ទាល់នោះទេ។ មេបញ្ជាការនាវារុករកអាមេរិកាំង លោក ម៉ាក ម៉ាទីជើ (Mark Matthews) បាននិយាយថា «នៅពេលដែលប្រអប់ ប៊្លូហ្វីន ចុះទៅដល់ជម្រៅ ៤៥០០ម៉ែត្រ ដែលជាជម្រៅទ្រាំទ្រជ្រៅបំផុត របស់ម៉ាស៊ីននេះមក វានឹងងើបឡើងមកលើវិញ ដោយស្វ័យប្រវត្តិ»។
ជាធម្មតា ម៉ាស៊ីនយន្ដ ប៊្លូហ្វីន ២១ ដែលមានបណ្ដោយ ៤,៩៣ម៉ែត្រ មានសមត្ថភាពចុះទៅក្រោមទឹកដើម្បីធ្វើការងាររបស់វា ក្នុងរយៈពេល១៦ម៉ោង។ តែបើទោះជាបេសកកម្មលើកទីមួយរបស់ ប៊្លូហ្វីន ២១ មិនបានសម្រេចរហូតចប់ចុងចប់ដើមនេះក៏ដោយ ក្រុមអ្នកស្រាវជ្រាវបានដាក់ឲ្យវា ចុះទៅក្នុងសមុទ្រជាលើកទីពីរ នៅថ្ងៃពុធទី១៦ ខែមេសានេះ ដើម្បីបន្តរុករកយន្ដហោះដែលគេជឿថា បានសម្ងំស្ងៀមនៅក្នុងបាតសមុទ្រដ៏ជ្រៅ។
អ្នកស្វែងរកយន្ដហោះ បានកំណត់តំបន់រុករក ទៅតាមរលកសម្លេងដែលពួកគេទទួលបាន កាលពីជាង១០ថ្ងៃមុន ដែលពួកគេគិតថា ជារលកសម្លេងដូចគ្នាទៅទៅរលកសម្លេង ផ្ដល់ដោយប្រអប់ខ្មៅនៃយន្ដហោះប៊ូអីង ៧៧៧ របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ។ តំបន់នេះមានប្រមាណជា៤០គីឡូម៉ែត្រការ៉េ ហើយស្ថិតនៅចម្ងាយ២.១៧០គីឡូម៉ែត្រ ពីទីក្រុងផើដ ទីក្រុងឆ្នេរខាងលិច របស់កោះអូស្ត្រាលី។
ក្រុមអ្នករុករកអាមេរិកាំង បានរំពឹងគិតថា «ការងារស្វែងរកនេះ នឹងមានរយៈពេលរវាងពី៦សប្ដាហ៍ ទៅ២ខែ»តទៅមុខទៀត៕
-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី១៦ មេសា ២០១៤