រូបភាពថតឆ្លុះដោយប្រព័ន្ធផ្កាយរណបរបស់បារាំង ស្ដីពីវត្ថុជាច្រើនប្រមាណជា១២២ ត្រូវបានរកឃើញបន្ថែមទៀត នៅតំបន់រុករកនៃមហាសមុទ្រឥណ្ឌាខាងត្បូង ទីកន្លែងដែលគេបានជឿថា យន្ដហោះប៊ូអ៊ីញ ៧៧៧ នៃជើងហោះហើរ MH370 ជាមួយនឹងមនុស្ស២៣៩នាក់នៅក្នុងយន្ដហោះ បានធ្លាក់។ នេះបើតាមការប្រកាសរបស់ប្រទេសម៉ាឡេស៊ី នៅថ្ងៃទី២៦ ខែមីនានេះ។

រូបថត ពីលើយន្ដហោះ ដែលត្រូវបានបញ្ជូនឲ្យទៅរុករកយន្ដហោះបាត់ខ្លួន។ (រូបថត Reuters)

បាត់យន្ដហោះ - ប្រព័ន្ធផ្កាយរណបមួយរបស់ក្រុមហ៊ុនអ៊ឺរ៉ុបដែលមានឈ្មោះថា អ៊ែរប៊ូស ដេហ្វង់ (Airbus Défense) និង អេស្បាស (Espace) បានបង្ហាញពីរូបភាពវត្ថុច្រើនសិប បានអណ្ដែតនៅលើផ្ទៃក្រឡា៤០០គីឡូម៉ែត្រការ៉េ នៃមហា​សមុទ្រឥណ្ឌាខាងត្បូង។ នេះជាការប្រកាសឲ្យដឹង របស់រដ្ឋមន្ត្រីក្រសួងដឹកជញ្ជូនម៉ាឡេស៊ី លោកហ៊ីស្សាមូឌីន ហ៊ូសេន (Hishammuddin Hussein)។

ប៉ុន្តែរូបភាពនៃវត្ថុទាំងនេះ នៅមិនអាចបញ្ជាក់បាននៅឡើយ ថាជាបំណែកនៃយន្ដហោះប៊ូអ៊ីង ៧៧៧ ដែលបាន​បាត់​ខ្លួនយ៉ាងអាថ៌កំបាំង តាំងពីជិតបីសប្ដាហ៍មកហើយ បន្ទាប់ពីយន្ដហោះបានបម្រើជើងហោះហើរចុងក្រោយរបស់ខ្លួន លេខ MH370 ភ្ជាប់ពីរដ្ឋធានីកូឡាឡំពួរប្រទេសម៉ាឡេស៊ី ឆ្ពោះទៅកាន់រដ្ឋធានីប៉េកាំង ប្រទេសចិន។

លោករដ្ឋមន្ត្រីម៉ាឡេស៊ី បានបន្ថែមទៀតថា «តែវាជំនួយថ្មីទៀត ដែលជួយយើងឲ្យបាញ់ឆ្ពោះឲ្យចំទិសដៅ នៅក្នុងកិច្ច​ប្រតិបត្តិការរុករក»។

ពីក្នុងចំណោមវត្ថុទាំង១២២នេះ វត្ថុមួយចំនួន មានប្រវែងពី១ម៉ែត្រ ដល់២៣ម៉ែត្រ។

រូបភាពលើកមុនដែលរកឃើញ ដោយប្រព័ន្ធផ្កាយរណបរបស់ប្រទេសអូស្ត្រាលី ចិន និងបារាំង ក៏បានបង្ហាញ​ដែរពី​វត្ថុអណ្ដែតទាំងនេះ ហើយវត្ថុមួយចំនួនពីក្នុងនោះ មានប្រវែងដល់ទៅច្រើនម៉ែត្រ។ វត្ថុទាំងនោះ ត្រូវបានឆ្លុះឃើញ​នៅលើតំបន់ចម្ងាយប្រមាណជា ២៥០០គីឡូម៉ែត្រ ពីឆ្នេរខាងលិចនៃប្រទេសអូស្ត្រាលី។

រហូតមកដល់ម៉ោងនេះ អ្នករុករកនៅមិនទាន់រកឃើញឃើញ វត្ថុទាំងនោះសូម្បីតែមួយនៅឡើយ។ ជាងនេះទៅទៀត ប្រតិបត្តិការរុករកត្រូវបានផ្អាកកាលពីថ្ងៃអង្គារទី២៥ ខែមីនាម្សិលម៉ិញ ដោយមូលហេតុស្ថានភាពឧត្តុនិយម​មិន​អំណោយផល បង្កឲ្យមានព្យុះនិងរលកធំជាង៤ម៉ែត្រ នៅលើតំបន់រុករកស្ថិតនៅយ៉ាងដាក់សង្វែក ពីដីគោក។

នៅថ្ងៃទី២៦ ខែមីនានេះ ប្រតិបត្តិការរុករកបានបន្តធ្វើសារជាថ្មី។ យន្ដហោះមិនតិចជាង ១២គ្រឿង ក្នុងនោះ ៧គ្រឿង ជាយន្ដហោះកងទ័ព បានមកដល់តំបន់រុករក ដើម្បីស្វែងករវត្ថុទាំងនេះ ដែលថតឆ្លុះឃើញដោយប្រព័ន្ធផ្កាយរណប។ អាជ្ញាធរសុវត្ថិភាពផ្លូវទឹករបស់អូស្ត្រាលី បានបញ្ជាក់ថា «ថ្ងៃនេះ ការរុករក គ្របដណ្ដប់ទៅលើតំបន់បី ដែលមាន​ផ្ទៃ​ក្រឡា ៨០ ០០០គីឡូម៉ែត្រការ៉េ»។

បន្ថែមពីលើនាវាអូស្ត្រាលី ឈ្មោះ  HMAS Success ដែលស្ថិតនៅក្បែរតំបន់នោះស្រាប់ នៅថ្ងៃនេះដែរ នាវាចិនចំនួន​បួនគ្រឿងផ្សេងទៀត ក៏បានទៅដល់តំបន់នោះដែរ។

នាយករដ្ឋមន្ត្រីអូស្ត្រាលី លោក តូនី អាប៊ូត (Tony Abbott) បានសន្យាថានឹងបន្តការរុករក រហូតដល់ក្ដីសង្ឃឹម​រលាយ​អស់។ លោកបានថ្លែងនៅក្នុងបណ្ដាញទូរទស្សន៍អូស្ត្រាលីមួយថា «យើងនឹងបន្តការរុករកជាធម្មតារបស់យើង ព្រោះ​យើងគួរតែធ្វើរឿងនេះតាមលទ្ធភាព សម្រាប់ជួយរំលែកទុក្ខរបស់គ្រួសារជនរងគ្រោះ»។

យុទ្ធនាការរុករកមួយ ដែលប្រជែងជាមួយនឹងពេលវេលា ក៏ត្រូវបានគេចាប់ផ្ដើមធ្វើដែរ ដើម្បីស្វែងរកប្រអប់ខ្មៅ ដែល​បើតាមគោលការណ៍ ប្រអប់នេះមានជីវិតតែ៣០ថ្ងៃប៉ុណ្ណោះ បន្ទាប់ពីវាត្រូវបានធ្លាក់ចូលទៅក្នុងទឹក។ រហូតមកទល់​ពេលនេះ គេនៅសល់តែពីរសប្ដាហ៍ទៀតប៉ុណ្ណោះ ដើម្បីរកប្រអប់ខ្មៅនេះឲ្យឃើញ។ កាលពីថ្ងៃចន្ទទី២៤កន្លងទៅ សហរដ្ឋអាមេរិក បានបញ្ជូនទៅកាន់ទីក្រុងឆ្នេរខាងលិច របស់ប្រទេសអូស្ត្រាលី រួចហើយ នូវម៉ាស៊ីរករកប្រអប់ខ្មៅនេះ ដែលនឹងត្រូវគេចងពន្លិចវាទៅក្នុងទឹក ភ្ជាប់ទៅនឹងនាវា អូសដើេរស្វែងរករលកសញ្ញា ផ្ដល់ដោយប្រអប់ខ្មៅ៕

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៦ មីនា ២០១៤