រដ្ឋាភិបាល​ទាំង​បី ប្រកាស​ផ្អាក​ការ​រុករក​យន្ដហោះ​បាត់​ខ្លួន «MH370»

អាថ៌កំបាំង នៅតែបន្តមាន និងអាចបន្តមាន ជារៀងរហូតទៅ សម្រាប់យន្ដហោះប៊ូអីង ដែលភ្ជាប់ជើង​ហោះ​ហើរ លេខ «MH370» និង​ដែល​បាន​បាត់ខ្លួន កាលពីជិត៣ឆ្នាំមុន។ កាលពីថ្ងៃអង្គារនេះ រដ្ឋាភិបាលនៃ​ប្រទេស​ទាំង​បី ដែលរួមគ្នា​ធ្វើការ​រុករក យ៉ាងសកម្ម នៅក្នុងសមុទ្រឥណ្ឌាខាងត្បូង បានប្រកាសព្រមគ្នា ថាការ​រុករក​យន្ដហោះ​នេះ ត្រូវបានផ្អាកហើយ។
រដ្ឋាភិបាល​ទាំង​បី ប្រកាស​ផ្អាក​ការ​រុករក​យន្ដហោះ​បាត់​ខ្លួន «MH370»
យន្ដហោះប៊ូអីង (Boeing 777) នៃក្រុមហ៊ុនអាកាសចរណ៍ «Malaysia Airlines»។ (រូបថតឯកសារ)
Loading...
  • ដោយ: កេសរ កូល ([email protected]) - ភ្នំពេញ ថ្ងៃទី១៨ មករា ២០១៧
  • កែប្រែចុងក្រោយ: January 19, 2017
  • ប្រធានបទ: គ្រោះអាកាស
  • អត្ថបទ: មានបញ្ហា?
  • មតិ-យោបល់

ក្ដីសង្ឃឹម ដែលអាចរកឃើញយន្ដហោះ «MH370» មានកាន់តែស្ដួចស្ដើងទៅៗ បន្ទាប់ពីការរុករក ត្រូវបាន​ធ្វើ​យ៉ាងសកម្ម អស់ជាច្រើនខែឆ្នាំ នៅក្នុង​មហាសាគរ​ឥណ្ឌា​ខាងត្បូង ដោយរដ្ឋាភិបាល នៃប្រទេស​ចំនួនបី​ក៏​ដោយ។ ទីបំផុតរដ្ឋាភិបាលទាំងបី មានម៉ាឡេស៊ី អូស្ត្រាលី និងចិន បានប្រកាសរួមគ្នា ក្នុងសេចក្ដី​ប្រកាស​ព័ត៌មាន​​មួយ កាលពីថ្ងៃអង្គារ ថាពួកខ្លួនបានសម្រេច ផ្អាកការរុករកតួយន្ដហោះ បាត់ខ្លួននេះ នៅក្រោម​សមុទ្រ​ត​ទៅ​ទៀត។

យន្ដហោះ MH370 បានហោះភ្ជាប់រដ្ឋធានីកូឡាឡំពួរ របស់ប្រទេសម៉ាឡេស៊ី ឆ្ពោះទៅកាន់រដ្ឋធានីប៉េកាំង របស់​​ប្រទេស​ចិន ប៉ុន្តែបានបាត់ខ្លួន នៅមួយ​ម៉ោង ក្រោយ​ពីហោះងើបខ្លួន ពីព្រលានយន្ដហោះអន្តរជាតិ កូឡាឡំពួរ នៅ​ថ្ងៃ​ទី៨ ខែមិនា ឆ្នាំ២០១៤ ដោយបាននាំទៅជាមួយ នូវបុគ្គលិកអ្នក​បម្រើការ​១២នាក់ និង​អ្នក​ដំណើរ ២២៧នាក់ ដែលក្នុងនោះ ២ភាគ៣ ជាជនជាតិចិន។

អត្ថបទ​នៃសេចក្ដីប្រកាសព័ត៌មាន បានសរសេរថា តួយន្ដហោះ មិនស្ថិតនៅក្នុងតំបន់រុករក ដែលមាន​ផ្ទៃ​ក្រឡា ប្រមាណ​ជា ១២០ ០០០គីឡូម៉ែត្រក្រឡា​នោះ​ទេ។ អត្ថបទបានបន្តរៀបរាប់ថា៖ «ទោះ​ជា​មាន​ការ​ខិតខំ ដោយ​មាន​ជំនួយពីវិទ្យាសាស្ត្រគ្រប់បែបយ៉ាង ដោយមានប្រើ នូវបច្ចេកវិទ្យាដ៏ទំនើបៗ បូក​បញ្ចូល​​​ទាំង​​មតិ​យោបល់ ពី​សំណាក់​អ្នក​ជំនាញ ដែលពោរពេញ​ដោយសមត្ថភាព យ៉ាងណាក៏ដោយ ក៏ការរុករកនេះ មិន​បាន​អនុញ្ញាត (ឲ្យ​យើង) រក​ឃើញ​​តួ​​យន្ដហោះ​ឡើយ»។

រកឃើញបំណែកតូចៗ...

សេចក្ដីប្រកាសព័ត៌មាន បានបញ្ជាក់ដូច្នេះថា៖ «ដូច្នេះ ការរុករកក្រោមសមុទ្រ នៃយន្ដហោះ "MH370" ត្រូវ​បាន​ផ្អាក»។ ដោយឡែក​ ប្រទេស​ម៉ាឡេស៊ី​តែ​ឯង បានប្រកាសផ្អាកការរុករកនេះ តាំងពី២សប្ដាហ៍មុនម្លេះ។

មកដល់ថ្ងៃនេះ គេមិនដឹងថា តើតួយន្ដហោះ ដែលបាត់ខ្លួន យ៉ាងអាថ៌កំបាំងនេះ ស្ថិតនៅទីណាឡើយ។ គេ​គ្រាន​តែបានរកឃើញ បំណែកជាច្រើន ប្រមាណ​ជា​២០បំណែក នៅក្នុងតំបន់ឆ្នេរខាងកើត នៃទ្វីបអាហ្វ្រិក (មហា​សមុទ្រឥណ្ឌាខាងលិច) ដែលមានចំងាយមហាឆ្ងាយ ពីតំបន់​ដែល​ត្រូវបាន​រុករក​កន្លង​មក​នេះ។ បំណែក​​ទាំង​នោះ ត្រូវបានគេ​កំណត់​​អត្តសញ្ញាណ ថាទំនងជាបំណែក របស់យន្ដហោះប៊ូអីង (Boeing 777) នៃ​ក្រុមហ៊ុន​អាកាសចរណ៍ «Malaysia Airlines»។

អត់លេងសើច...

ក្រុមអ្នកជំនាញ បានសិក្សាឃើញមានតំបន់មួយទៀត ដែលតួយន្ដហោះ អាចមានវត្តមាននៅទីនោះ តែ​អាជ្ញាធរ​នៃប្រទេសអូស្ត្រាលី ក៏ដូចជាប្រទេស​ម៉ាឡេស៊ី បានវាយតម្លៃថា ការអះអាងពីតំបន់នោះ មិនមាន​អំណះ​​អំណាង​គ្រប់​គ្រាន់ ដើម្បីអាចឲ្យគេបើកការរុករក បន្ថែមទៀតនោះទេ។

សេចក្ដីប្រកាស​ព័ត៌មាន កាលពីថ្ងៃអង្គារ បានឲ្យដឹងថា ការសម្រេចចិត្តបញ្ឈប់ការរុករកនេះ មិនត្រូវបាន​ធ្វើ​ឡើង ជាការលេងសើច ដោយគ្មានទុក្ខកង្វល់​នោះ​​ឡើយ។ អត្ថបទបានបញ្ជាក់ថា៖ «យើងរក្សាក្ដីសង្ឃឹម ថា​ព័ត៌មាន​ថ្មីទៀត នឹងពន្លេចខ្លួនឡើង ហើយថា​នៅ​ថ្ងៃណា​មួយ តួយន្ដហោះ​​នឹង​ត្រូវ​​រក​​ឃើញ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...