ក្ដីសង្ឃឹមបានកើតមានឡើងខ្លះឡើងវិញ សម្រាប់ក្រុមគ្រួសារនៃអ្នកដំណើររបស់ ជើងហោះហើរលេខ ៣៧០ របស់ ក្រុមហ៊ុនអាកាសចរណ៍ ម៉ាឡេស៊ី អ៊ែរឡាញ បន្ទាប់ពីពួកគេបានសាកល្បងហៅទៅទូរស័ព្ទដៃដែលនៅលើយន្ដហោះ ហើយបានទទួលការហៅចូលនៅឡើយ។ ទូរស័ព្ទនៅទទួលការហៅចូល ដូច្នេះតើម្ចាស់ទូរស័ព្ទអាចមានសង្ឃឹម​ថា​នឹង​នៅរស់រានមានជីវិត? សូមអានការបកស្រាយ របស់អ្នកជំនាញមួយរូប ទាក់ទងនឹងការហៅចូលរបស់ទូរស័ព្ទដៃ។

ការបង្ហាញពីការបាត់យន្ដហោះ និងអ្នកដំណើរចំនួន២៣៩នាក់នៅលើនោះ រីឯក្រុមគ្រួសារសាកល្បងទូរស័ព្ទស្វែង រក។ (រូបថត Reuters)

បាត់យន្ដហោះ - ភាពអាថ៌កំបាំងនៅតែកើតមាននៅឡើយ បួនថ្ងៃបន្ទាប់ពីការបាត់ខ្លួនរបស់យន្ដហោះ ប្រភេទ​ប៊ូអ៊ីញ ៧៧៧ ដែលភ្ជាប់ជើងហោះហើរពីរដ្ឋធានី កូឡាឡំពួរ នៃប្រទេសម៉ាឡេស៊ី ទៅកាន់រដ្ឋធានីប៉េកាំងនៃ​ប្រទេស​ចិន។ ប្រសិនបើការបាត់ខ្លួនដ៏គួរឲ្យសង្ស័យនេះ ត្រូវបានគេគិតថា យន្ដហោះប្រហែលជាអាចជួបគ្រោះថ្នាក់ធ្ងន់ធ្ងរ ហើយ​បានលិចចុះទៅក្រោមសមុទ្រក៏ដោយ តែការសាកល្បងហៅទៅទូរស័ព្ទដៃ របស់អ្នកដំណើរដែលស្ថិត​នៅលើ​យន្ដហោះ នៅតែត្រូវបានធ្វើដោយសមាជិកក្រុមគ្រួសារ ហើយពួកគេបានបញ្ជាក់ថា ទូរស័ព្ទដៃទាំងនោះ នៅ​ទទួល​ការហៅចូលនៅឡើយ។

ជាងនេះទៅទៀត បើតាមការផ្សាយឲ្យដឹង នៅលើទំព័ររបស់សារព័ត៌មានវ៉ាស៊ីតោនប៉ុស្ដ៍ បានបញ្ជាក់ឲ្យដឹងទៀតថា ក្រុមហ៊ុនអាកាសចរណ៍ម៉ាឡេស៊ីអ៊ែឡាញ ខ្លួនឯងក៏បានសាកល្បងទាក់ទងទៅទូរស័ព្ទដៃ របស់សមាជិក​បម្រើការ​របស់ខ្លួន ដែលមានវត្តមានជាក្រុមការងាររបស់ជើងយន្ដហោះនេះដែរ។ ហើយជាលទ្ធផលនោះ គឺមិនខុសគ្នានឹង​ក្រុមគ្រួសាររបស់អ្នកដំណើរផ្សេងទៀតទេ៖ «ទូរស័ព្ទដៃទទួលការហៅចូល តែគ្មានអ្នកលើក រហូតទាល់​តែ​ប្រព័ន្ធ​ទទួល​សារ​ជាសម្លេងបានបន្លឺឡើង»។

ក្រុមគ្រួសារ និងអ្នកវិភាគមួយចំនួនបានគិតថា បើទូរស័ព្ទធ្លាក់ចូលទៅក្នុងទឹក ឬកាតស៊ីម (Sim) របស់វា ត្រូវបាន​កំទេចដោយការផ្ទុះជាយថាហេតុរបស់យន្ដហោះនោះ វានឹងមិនអាចទទួលការហៅចូលដូច្នេះនោះទេ។ ការវិភាគនេះ បានផ្ដល់ក្ដីសង្ឃឹមយ៉ាងច្រើន ទៅដល់ក្រុមគ្រួសារនៃអ្នកដំណើរ ដើម្បីឲ្យពួកគេគិតថា សមាជិកគ្រួសាររបស់ពួកគេ អាចនៅរស់រានមានជីវិតនៅឡើយ ហើយទីកន្លែងរបស់យន្ដហោះដែលបានលាក់ខ្លួននោះ អាចនឹងត្រូវរកឃើញ។ តែខាងក្រោមនេះ ជាការបកស្រាយរបស់អ្នកជំនាញ ខាងបច្ចេកវិទ្យានៃទូរស័ព្ទដៃមួយរូប លោក ប៊្រុយណូ សាលហ្គេ (Bruno Salgues) នាយកវិទ្យាស្ថានស្រាវជ្រាវទូរគមនាគមន៍ របស់ប្រទេសបារាំង។

«វាអាចជារឿងត្រឹមត្រូវហើយ ដែលគេស្ដាប់លឺទូរស័ព្ទរោទ៍ នៅពេលដែលគេហៅទៅ។ តែសួរថាតើ ទូរស័ព្ទដៃ​មែន​ទែន ពិតជាបានរោទ៍ពិតប្រាកដឬទេ? រឿងនេះមិនអញ្ចឹងទាំងស្រុងទេ។» នេះជាការពន្យល់របស់អ្នកជំនាញ ទៅ​កាន់​សារព័ត៌មានចម្រុះភាសាមួយឈ្មោះ ឌី ហ័ហ្វីនតោន ប៉ុស្ដ៍ (The Huffington Post) ដែលផ្សាយជាភាសាបារាំង។ លោកបានបន្តទៀតថា «ទូរស័ព្ទណាក៏ដោយ ដែលប្រើប្រាស់ប្រព័ន្ធ ជីអេសអ៊ឹម ( GSM 2G ឬ 3G) ហើយដែលត្រូវ​បាន​ទុក​ឲ្យ​ដំណើរការ​ធម្មតានោះ ការផ្លាស់ប្ដូរទីកន្លែងរបស់វា ត្រូវបានថតទុកដោយប្រព័ន្ធទិន្នន័យមួយ ដែលមាន​ឈ្មោះថា HLR។ ដូច្នេះ នៅពេលគេហៅទៅលេខទូរស័ព្ទនោះ ការហៅនេះបានបាញ់បង្ហោះ ទៅគ្រប់ទីកន្លែងដែល HLR បានថតទុក ដើម្បីស្វែងរកម្ចាស់លេខ។»

ដោយសារតែទូរស័ព្ទដៃ មិនបានបិទនៅក្នុងការបម្លាស់ទីរបស់អ្នកប្រើប្រាស់ និងនៅពេលយន្ដហោះបានហោះ ចេញ​ក្រៅតំបន់សេរវាទូរស័ព្ទ ដូចជានៅកណ្ដាលសមុទ្រជាដើមនោះ សម្លេងរោទ៍ ទំនងជាអាចត្រូវឲ្យអ្នកហៅ ស្ដាប់លឺសូរ តែមិនមែនជាទូរស័ព្ទផ្ទាល់ជាអ្នករោទ៍ ឬបានទទួលការហៅចូលនោះទេ។ អ្នកជំនាញបញ្ជាក់ថា «វាជាទីកន្លែង​ចុង​ក្រោយ ដែល HLR បានថតទុក ជាអ្នករោទ៍ជំនួសទូរស័ព្ទមែនទែន»។ ការហៅដែលលឺសូរសម្លេងរោទ៍នេះ សុទ្ធ​សឹង​ជាការ​ហៅទៅរកភាព«ទទេ»មួយ ហើយគេក៏មិនអាចដឹងពីទីន្លែងដែល យន្ដហោះ ប៊ូអីញ លាក់ខ្លួននោះដែរ។

ការពន្យល់បកស្រាយនេះ ជាការថ្លែងតាមបែបវិទ្យាសាស្ត្រ ដែលមានលក្ខណៈសមសួនមួយ។ បើសិនជា​យ៉ាង​នេះ ក្ដីសង្ឃឹមរបស់ក្រុមគ្រួសារជនរងគ្រោះ ប្រាកដជាត្រូវបានកាត់បន្ថយ ហើយការរុករកយន្ដហោះបាត់ខ្លួន អាចនឹងត្រូវ​ប្រើពេលកាន់តែច្រើនឡើង។ ក្នុងពេលនេះ មានតែទេវតាប៉ុណ្ណោះ ដែលអាចដឹង និងផ្ដល់ក្ដីសង្ឃឹមជាថ្មីថា ទូរស័ព្ទ​ទាំងនោះនៅជិតបង្គោលអង់តែនណាមួយ និងជាពិសេសថ្មរបស់ទូរស័ព្ទ អាចមានជីវិតបានយូរ រហូត​ដល់អ្នកជួយ​សង្គ្រោះអាចរកឃើញយន្ដហោះ៕

------------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី១១ មីនា ២០១៤