បន្ទាប់ពីនាវាចិន Haixun 01 បានទទួលរលកសញ្ញា ប្រហាក់ប្រហែលនឹងរលកសញ្ញា របស់ប្រអប់ខ្មៅនៃយន្ដហោះ​ប៊ូអីង ៧៧៧  រលកសញ្ញានេះ ត្រូវបានស្ដាប់លឺជាថ្មីម្ដងទៀត ដោយនាវារុករករបស់ប្រទេសអូស្ត្រាលីម្ដង។ នៅ​មួយ​ថ្ងៃក្រោយ គឺនៅថ្ងៃអាទិត្យទី៦ ខែមេសានេះ យន្ដហោះរបស់កងទ័ពអាកាសនៃប្រទេសចិន ដែលបានទៅចូលរួម​ស្វែង​រកយន្ដហោះបាត់ខ្លួនដែរនោះ បានរកឃើញវត្ថុថ្មីៗជាច្រើន អណ្ដែតលើផ្ទៃសមុទ្រ។

រូបថត ពីលើយន្ដហោះ ដែលត្រូវបានបញ្ជូនឲ្យទៅរុករកយន្ដហោះបាត់ខ្លួន។ (រូបថត Reuters)

បាត់យន្ដហោះ - នាវា អូសៀន សៀល (Ocean Shield) របស់ប្រទេសអូស្ត្រាលី ដែលបំពាក់ទៅដោយ​ឧបករណ៍​តាមរកប្រអប់ខ្មៅ របស់អាមេរិក បានចាប់បាននូវរលកសញ្ញាមួយ។ នេះបើតាមការអះអាងរបស់ លោក អេនហ្គឺស ហ៊ូស្ដុន (Angus Houston) អតីតនាយទាហាន​អូស្ត្រាលី ដែលដឹកនាំការសម្របសម្រួល (JACC) នៃ​បណ្ដា​ប្រទេស​ចូលរួមនៅក្នុងយុទ្ធនាការស្វែងរក យន្ដហោះនៃជើង​ហោះហើរ MH370 របស់ក្រុមហ៊ុនអាកាសចរណ៍ ម៉ាឡេស៊ី​អ៊ែរឡាញ។

ប៉ុន្តែក្រុមអ្នកស្រាវជ្រាវ នៅមិនទាន់ធ្វើសេចក្ដីសន្និដ្ឋាន ថារលកសញ្ញាទាំងនោះ អាចជារលកសញ្ញាដែលផ្ដល់ដោយ ប្រអប់ខ្មៅនៃយន្ដហោះ ប៊ូអីង ៧៧៧ ដែលបានបាត់ខ្លួនតាំងពីថ្ងៃទី៨ ខែមិនាមកនោះទេ។ ពួកគេបារម្ភថា រលក​សញ្ញា​នេះ អាចជារលកសញ្ញា«បំពុល»មួយ ដែលអាចកើតមានជាធម្មតានៅក្រោមសមុទ្រ។

កាលពីថ្ងៃសៅរ៍ នាវាចិន Haixun 01 ដែលឈរជើងលើចំនុចរុករក បានថតទុកនូវរលកសញ្ញាកម្រិត 37,5 kHz នៅ​ក្នុងមួយវិនាទី ដែលមានលក្ខណៈដូចគ្នា ទៅនឹងរលកសញ្ញាផ្ដល់ដោយប្រអប់ខ្មៅ របស់យន្ដហោះបាត់ខ្លួន។ រលក​សញ្ញានេះ បានកើតឡើងនៅប្រមាណជា២០ឌឺក្រេ នៃខ្សែបន្ទាត់ទទឹងខាងត្បូង និង១០ឌឺក្រេ នៃខ្សែ​បន្ទាត់​បណ្ដោយ​ខាងកើតរបស់ផែនដី ផ្នែកខាងត្បូងនៃមហាសមុទ្រឥណ្ឌា (មើលរូបខាងក្រោម)។

រីឯទីភ្នាក់ងារសារព័ត៌មានផ្លូវការរបស់ចិន ស៊ីនហួរ វិញ ក៏បានធ្វើសេចក្ដីរាយការណ៍ចុងក្រោយដែរ ថាយន្ដហោះ​កងទ័ព​អាកាសរបស់ចិន បានរកឃើញសារជាថ្មីទៀត នូវ​វត្ថុពណ៌សរជាច្រើន អណ្ដែតរាយប៉ាយនៅលើផ្ទៃសមុទ្រ ក្នុង​តំបន់រុករក ចម្ងាយប្រមាណជាជាង១០គីឡូម៉ែត្រប៉ុណ្ណោះ ពីចំណុចដែលសម្លេងរលកសញ្ញាត្រូវបានស្ដាប់លឺ។ យន្ដហោះ​បានថត​រូបពីវត្ថុទាំងនោះ ប្រមាណ​ជា២០នាទី បន្ទាប់ពីបានរកឃើញ នៅវេលាម៉ោង ១១ និង ៥នាទី ម៉ោង​នៅនឹងកន្លែង។ អ្នកបើកបរយន្ដហោះ បាន​រាយការណ៍ការរកឃើញរបស់ក្រុមខ្លួននេះរួចហើយ ទៅ​កាន់​ការិយាល័យ​សម្របសម្រួល​នៃបេសកកម្មរុករកនេះ ដែលមានទីតាំង​ក្នុងទីក្រុងផើត (Perth) ភាគខាងលិច​នៃ​កោះ​អូស្ត្រាលី។

សូមបញ្ជាក់ដែរថា យន្ដហោះរុករក បានចេញពីព្រលានយន្ដហោះអន្តរជាតិ ទីក្រុងផើត នៅម៉ោង៦និង៤នាទីព្រឹក ហើយបានទៅដល់តំបន់រុករក នៅម៉ោង៩ និង៥៥នាទី ដែលមានចម្ងាយប្រមាណជា២៧០០គីឡូម៉ែត្រ ពីឆ្នេរខាង​លិចរបស់ប្រទេសអូស្ត្រាលី។ យន្ដហោះនេះបានវិលត្រឡប់មកវិញ នៅម៉ោង២ និង២០នាទីរសៀល ដែលទំនង​ជា​មកពីលក្ខខ័ណ្ឌនៃការរុករក មានភាពពិបាកខ្លាំង ព្រោះមានខ្យល់បក់ រលកធំៗ និងពពកក្រាស់នៅទាបៗ។

យន្ដហោះប៊ូអីង ៧៧៧ ភ្ជាប់ជើងហោះហើរ MH370 បានបាត់ខ្លួននៅព្រឹកព្រហាមថ្ងៃទី៨ ខែមីនា នៅក្រោយ​ពេល​ដែលយន្ដហោះ បានបង្ហើបខ្លួនពីដី បានប្រមាណជិត១ម៉ោង។ យន្ដហោះ របស់ក្រុមហ៊ុន ម៉ាឡេស៊ីអែរឡាញ បាន​ហោះចេញពីរដ្ឋធានី កូឡាឡំពួរ ឆ្ពោះទៅកាន់រដ្ឋធានីប៉េកាំង ដោយមានអ្នកដំណើរ ២២៧នាក់ និង​អ្នកបម្រើការ​រួម​នឹងអ្នកបើកបរយន្ដហោះ ១២នាក់ ជិះនៅលើយន្ដហោះនោះផង។

ប្រទេសម៉ាឡេស៊ី ដែលជាម្ចាស់យន្ដហោះ បានបញ្ជាក់ជាផ្លូវការ តាមរយៈនាយករដ្ឋមន្ត្រីរបស់ខ្លួន កាលពីថ្ងៃ២៥ ខែមីនា ថាយន្ដហោះបានបញ្ចប់ជីវិតរបស់ខ្លួន នៅលំហ​ខាងត្បូងនៃមហាសមុទ្រឥណ្ឌា ប៉ុន្តែមិនបានលើក​យក​ភស្តុតាងពិតប្រាកដ មកអះអាងនោះទេ៕

----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី០៦ មេសា ២០១៤