សមាគមអាដហុកបានចេញសេចក្តីថ្លែងការណ៍ ថ្កោលទោសទៅលើសាលាដំបូងរាជធានីភ្នំពេញ ខណៈពេលដែល​អង្គការសង្គមស៊ីវិលមួយនេះ បានរស៊ើបអង្កេត ទៅលើករណីរបស់លោកវន់ ពៅ និងកម្មករ២០ទៀត ឃើញថាគ្មាន​ទោសកំហុសអ្វីនោះទេ។

នៅខាងស្ដាំរូបថតនេះ ៖ កូនប្រុស និងភរិយារបស់លោក វន់ ពៅ នៅមុខសាលាឧទ្ទរណ៍ថ្ងៃទី១២ ខែកុម្ភះ ឆ្នាំ២០១៤។ (រូបថត MONOROOM.info/ O.Vary)

ប្រព័ន្ធយុត្តិធម៌ - នៅថ្ងៃទី០៤ ខែមេសា ឆ្នាំ២០១៤ នេះ សមាគមការពារសិទ្ធិមនុស្សអាដហុក បានចេញសេចក្តី​ថ្លែងការណ៍មួយ ធ្វើការថ្កោលទោសចំពោះ សាលាដំបូងរាធានីភ្នំពេញ មិនអនុញ្ញាត អោយ លោក វន់ ពៅ និង​តំណាងកម្មករចំនួន ២០នាក់ផ្សេងទៀត រាជធានីភ្នំពេញ អោយនៅក្រៅឃុំជាបណ្ដោះអាសន្ន។ ការចេញសេចក្តី​ថ្លែងការណ៍របស់សមាគមអាដហុកនេះ បានធ្វើឡើងបន្ទាប់ពីសាលាដំបូង​នៅព្រឹកថ្ងៃសុក្រនេះ បានបដិសេធ​សំណើសុំនៅក្រៅឃុំរបស់លោក វន់ ពៅ និងជនត្រូវចោទម្នាក់ទៀត ជាលើកទីបី។

ក្នុងសេចក្តីថ្លែងការណ៍របស់សមគមអាដហុកនេះ បានសរសេរឲ្យដឹងថា តាមការសង្កេតតាមដាន ទៅលើដំណើរ​ការ​នៃ​សវនាការ នៅថ្ងៃទី៤ ខែមេសា ឆ្នាំ២០១៤ទៅលើសំណើសុំរបស់មេធាវី ដែលស្នើសុំអោយ លោក វន់ ពៅ និង តំណាងកម្មករ ២០នាក់ផ្សេងទៀតនេះ ជាការបង្ហាញឲ្យឃើញថា តុលាការកម្ពុជា មិនបានអនុវត្តតាមស្មារតី​ច្បាប់​ដែលមានជាធរមាននោះទេ។ សមាគអាដហុក កត់សំគាល់ឃើញថា តុលាការសាលាដំបូងរាជធានីភ្នំពេញ កំពុង​អនុវត្តខុសច្បាប់ និងជាការបង្កើតអោយ អំពើនិទណ្ឌភាព នៅកម្ពុជា ព្រមទាំងធ្វើអោយ មានភាពមិនស្មើគ្នា​ចំពោះ មុខច្បាប់។ សេចក្ដីថ្លែងការណ៍បានលើកយកចំណុចបីមកពន្យល់ថា៖

ទី១៖ បើកសវនាការរំលោភច្បាប់ដោយសារអវត្តមានជនជាប់ចោទ ដែលជាការរំលោភទៅលើ មាត្រា៣០០ នៃក្រម​នីតិវិធីព្រហ្មទណ្ឌ ដែលតំរូវអោយ ជនជាប់ចោទត្រូវបង្ហាញខ្លួននៅពេលសវនាការ របស់តុលាការដោយ​ផ្ទាល់។

ទី២៖ តុលាការក្រុងភ្នំពេញ មិនបានធ្វើការចោទប្រកាន់ ទៅលើអ្នកដែលបានប្រព្រឹត្តបទឧក្រិដ្ឋ ដែលបានបាញ់​សម្លាប់ កម្មករចំនួន ៥នាក់ និងរងរបួស ចំនួនប្រមាណជា ៤០នាក់ផ្សេងទៀតនោះទេ ហូតមកដល់ពេលនេះ។ ការធ្វើមិនដឹងមិនលឺ របស់ស្ថាប័នអយ្យការ នៅគ្រប់លំដាប់ថ្នាក់នៃតុលាការ គឺជាការរំលោភ ទៅនឹងក្រមនីតិវិធី​ព្រហ្មទណ្ឌយ៉ាងធ្ងន់ធ្ងរ យោងតាម មាត្រា ៣៧, មាត្រា ៤៤ ជាពិសេសទៅទៀតនោះ អគ្គព្រះរាជអាជ្ញា​អមសាលា​ឧទ្ធរណ៍ ក៏មិនបានអនុវត្តតាម តួនាទីរបស់ខ្លួន តាមមាត្រា ៣៤ និង មាត្រា ៣៥នៃក្រមនីតិវិធីព្រហ្មទណ្ឌ។

ក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ លោក ណៃ វង់ដា អនុប្រធានផ្នែក និងមេធាវីតំបន់នៃសមាគម​​អាដហុក បានអះអាងថា បើតាមការស៊ើបអង្កេត​របស់សង្គមសង្គមស៊ីវិលឃើញថា អ្នកទាំងអស់មានទោស​កំហុស​អ្វីនោះទេ។ លោកបានដឹងទៀតថា «ខ្ញុំមិនដឹងថាតុលាការមានអ្វីនៅពីក្រោយ ដែលធ្វើអោយការសម្រេចហ្នឹង មិន​មានភាព​យុត្តិធម៌ទទួលយកបានសំរាប់ជនរងគ្រោះទាំងអស់»។

នៅថ្ងៃទី០៤ ខែមេសា នេះទស្សនាវដ្ដីមនោរម្យ.អាំងហ្វូ មិនសុំការអត្ថធិប្បាយពីលោក កែវ មុនី ចៅក្រមទទួលបន្ទុក​ជំនុំ​ជម្រះ​លើករណីនេះបានទេ។

លោក គីម សុជាតិ មេធាវីមកពីសហភាពការងារ និងជាមេធាវីការពារក្តីអោយលោក វន់ ពៅបានបញ្ជាក់ថា «វាជា​ឆន្ទានុសិទ្ធិរបស់តុលាការ ព្រោះនៅពេលដែលយើងដាក់ពាក្យសុំ តុលាការមានឆន្ទាសិទ្ធក្នុងការអោយ ឬមិនអោយ នៅក្រៅឃុំ ហើយបើអោយមានមូលហេតុអី មិនអោយមានមូលហេតុអី»។ សម្រាប់ករណីនេះ មេធាវីរូបនេះយល់ថា តុលាការមិនគួរសម្រេចបដិសេធបែបនេះទេ។

សមាគមការពារសិទ្ធិមនុស្ស អាដហុក នៅតែ អំពាវនាវ អោយមានការដោះលែង កម្មករ និង តំណាង កម្មករ ទាំង​អស់​អោយមានសេរីភាព ហើយរដ្ឋាភិបាលកម្ពុជា ចាត់វិធានការផ្លូវច្បាប់ ជាបន្ទាន់ដល់ សមត្ថកិច្ចណា ដែលបាន​ប្រព្រឹត្ត ខុសច្បាប់ ដើម្បីផ្ដន្ទាទោស តាមច្បាប់ អោយខានតែបាន និងត្រូវតែ ធ្វើការដោះស្រាយ បញ្ហាប្រាក់ខែគោល ជូនកម្មករ អោយបាន សមស្រប ទៅតាម តម្លៃទំនិញនៅលើទីផ្សារជាក់ស្ដែង ដើម្បីអោយពួកគេអាចរស់ បាន​សមរម្យ​ជាមនុស្ស៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ០៤ មេសា ២០១៤