ស្របពេលដែលការដឹកនាំកម្មករ ទាមទារប្រាក់ខែ១៦០ដុល្លា កាន់តែមានសន្ទុះខ្លាំងឡើង រឿងអាស្រូវ​របស់មេ​ដឹកនាំ​សហជីពស៊ីខាវឌូ អំពីការប្រព្រិត្តអំពើពុករលួយក៏មានការបែកធ្លាយ ដែលមតិមួយចំនួនយល់ថា មានជាប់​ពាក់ព័ន្ធ​នឹងអ្នកកនយោបាយ។ សំរាប់បញ្ហានេះ លោក អ៊ុំ វិសាល អះអាងថា ការបែកធ្លាយនេះ ដើម្បីរក្សាកេរ្តិ៍របស់​សហជីព ស៊ីខាវដូ។

រូបកណ្ដាល៖ លោក អ៊ុំ វិសាល អតីតស្ថាបនិក មន្រ្តីគោល​នយោបាយ និងច្បាប់របស់សហជីពស៊ីខាវឌូ។ (រូបថត MONOROOM.info/ C.Nita)

រឿងអាស្រូវ - ខណៈពេល ដែលសម្ព័នសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីចាវឌូ ជា​សហជីពដែលល្បី និងឈានមុនគេ ក្នុងការដឹកនាំកម្មករធ្វើកូដកម្ម-បាតុកម្ម ក្តីបារម្ភ ដែលមជ្ឈដ្ឋានទូទៅគិតថា ការបែកធ្លាយរឿងអាស្រូវរបស់សហជីពស៊ីខាវឌូ ដោយសារមានក្រុមអ្នកមានអំណាច ឬអ្នកនយោបាយណាមួយ ជាអ្នករុញច្រាននាំអោយបែកបាក់ផ្ទៃក្នុងនោះ ត្រូវបានលោក អ៊ុំ វិសាលបដិសេធថា មិនមានក្រុមណាមួយ​ឡើយ​ដែលនៅពីក្រោយខ្នងនៃរឿងនេះ។ រឿងហេតុដែលកើតឡើងទាំងអស់ មិនមែនដោយសារគេរុញច្រាននោះទេ។

ថ្លែងនៅក្នុងសន្និសិទសាព័ត៌មាន នៅព្រឹកថ្ងៃទី២៨ ខែមិនា ឆ្នាំ២០១៤នេះ លោក អ៊ុំ វិសាល អតីតមន្រ្តីគោល​នយោបាយ និងច្បាប់ ព្រមទាំងជាស្ថាបនិកសហជីពស៊ីខាវឌូ បានអោយដឹងថា «ខ្ញុំមិនដឹងថា តើវាជាចេតនា​នៅពីក្រោយ​របស់អ្នកណាទេ ប៉ុន្តែចំពោះខ្ញុំបានព្យាយាមទុករឿងហ្នឹង រយៈពេលប៉ុន្មានឆ្នាំហើយ មិនមែន​ទើប​តែឥលូវទេ រហូតមកដល់ឆ្នាំ២០១៣ បែករឿងអ៊ីហ្គាមិននេះ ទោះបែករឿងហើយខ្ញុំមិនមាត់ទៀត ខ្ញុំព្យាយាមជជែក​ជាមួយគាត់រហូត ដល់ខែមករា (ឆ្នាំ) ២០១៤ គាត់មិនបើកប្រាក់ខែ ក៏ខ្ញុំមិនមាត់និងគាត់ដែរ ខ្ញុំព្យាមអោយ​គាត់កែ​វិញ។»

លោកបានបញ្ជាក់អោយដឹងទៀតថា ចំពោះការដឹកនាំកម្មករ ធ្វើបាតុកម្មប្រឆាំងរដ្ឋាភិបាល លោកនឹងចូលរួមធ្វើ ព្រោះ​ថា​ការធ្វើបាតុកម្មទាមទារប្រាក់ខែ១៦០ដុល្លាកន្លងមក វត្តមានរបស់លោកតែងនៅជាមួយកម្មកររហូត។

អតីតអតីតមន្រ្តីសហជីពរូបនេះ បានអះអាងយ៉ាងដូច្នេះ​ទៀតថា «រឿងនេះគោលបំណង របស់យើង​គឺចង់ការពារ​កិត្តិយសរបស់ស៊ីខាវឌូ។ ខ្ញុំត្រូវតែការពារស៊ីខាវដូអោយដល់ទីបញ្ចប់ ទិសដៅរបស់យើង គឺសូមអោយគាត់​ចាក​ចេញពីស៊ីខាវឌូ។ សូមជៀសវាងការយល់ច្រលំ ពីសាធារណៈជនថា វាជារឿងស្ថាប័ន សូមអោយគិតថា រឿងនេះ​ជារឿងការប្រព្រឹត្តដោយបុគ្គល ដែលឆ្លៀតឱកាសយកស្ថាប័នប្រើប្រាស់ដើម្បីផលប្រយោជផ្ទាល់ខ្លួន។ ស៊ីខាវឌូ​នៅតែជាស្ថាប័នល្អ មានច្បាប់ត្រឹមត្រូវ។»

យុទ្ធវិធី«ពិសបង្ក្រាបពិស» ...

លោក អាត់ ធន់ មិនអាចទាក់ទងធ្វើ​អត្ថាធិប្បាយ​ លើការលើកឡើងរបស់អតីតមន្ត្រីក្រោមឱវាទ របស់ខ្លួនបានទេ។ ប៉ុន្តែក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ នៅថ្ងៃទី២០ ខែកុម្ភៈ ឆ្នាំ២០១៤នេះ​កន្លងទៅ លោកអាត់ ធន់ បានថ្លែងបដិសេធចំពោះរឿងនេះថា មិនបានប្រព្រឹត្តិដូចការចោទប្រកាន់នេះទេ។ លោក​បានថ្លែងថា «ពួក​យើង​ស្អាតស្អំណាស់ ពួកយើងដាច់ខាតហើយ មិនប្រព្រឹត្តិអំពើពុករលួយនោះទេ»។

យ៉ាងណាក៏ដោយ យុទ្ធវិធី«ពិសបង្ក្រាបពិស» តែងត្រូវបានឃើញកើតមានឡើងជារឿយៗ នៅក្នុងគណបក្ស​ប្រឆាំង ឬក្រុមអ្នកតវ៉ាប្រឆាំងណាផ្សេងទៀត សំដៅធ្វើយ៉ាងណាឲ្យក្រុមនោះ ចុះទន់ខ្សោយឈានទៅរកការបែកបាក់។ កាលពីអំឡុងខែមិថុន ឆ្នាំ២០១៣ កន្លងទៅ យុទ្ធវិធី«ពិសបង្ក្រាបពិស»នេះក៏ត្រូវបានគេឃើញកើតមាន នៅក្នុង​សហគមន៍អ្នកតវ់ា នៅបឹងកក់ដែរ។ កាលនោះ ក្រុមអ្នកប្រឆាំងនឹងក្រុមអ្នកស្រី ទេព វន្នី បានធ្វើសន្និសីទ​ការសែត​បរិហា ពីការមិនពេញចិត្តរបស់ខ្លួន ចំពោះអ្នកស្រី ទេព វន្នី ដោយចោទថាអ្នកស្រី ទេព វន្នី ធ្វើការតវ៉ា ដើម្បីតែស្វែង​រកផលប្រយោជផ្ទាល់ខ្លួន។ សន្និសីទការសែតនោះ ត្រូវបានទូរទស្សន៍ក្នុងស្រុកសឹងតែទាំងអស់ យកទៅចាក់ផ្សាយ​ ខណៈពេលដែលពីមុនមក​ ទូរទស្សន៍ទាំងនេះ មិនដែលលើកយកការរំលោភសិទ្ធិមនុស្ស ឬសិទ្ធិលំនៅដ្ឋាន ទៅលើ​អ្នកភូមិបឹងកក់ មកផ្សាយឡើយ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២៨ កុម្ភៈ ២០១៤