ដីធ្លី - លោក ម៉ៅ ធឿង អាយុ ៦២ ឆ្នាំជាជនជាតិភ្នង ដែលបានរស់នៅក្នុងតំបន់មានជម្លោះនោះ តាំងពីកំណើតមក បានថ្លែងឲ្យដឹង ថា ក្រុមហ៊ុនបានចាប់ផ្តើមមានវត្តមាននៅក្នុងឆ្នាំ ២០១២ ហើយចាប់ពីពេលនោះមក ក្រុមហ៊ុន​បាន​ហាមឃាត់ពលរដ្ឋ ពុំឲ្យចូលធ្វើចំការ និងរកអនុផលព្រៃឈើនៅក្នុងតំបន់របស់ពួកគាត់បានទេ។ លោកបានថ្លែងថា៖ «ដីនោះជាដីរបស់ពួកយើង ដែលរដ្ឋាភិបាលបានឲ្យមកយើងតាំងពីឆ្នាំ ១៩៩៩ ស្រាប់តែក្រុមហ៊ុនគេមករំលោភ យក​របស់យើង មិនអោយយើងធ្វើអ្វីទាំងអស់ នៅលើដីរបស់យើង»។

លោកបានឲ្យដឹងទៀតថា ក្រុមហ៊ុននេះគេថាមកដាំដើមកៅស៊ូប៉ុន្តែឃើញដាំចំនួនតិចតួចប៉ុណ្ណោះ ប៉ុន្តែអ្វីដែលគេ​ធ្វើ​នោះ គឺកាប់ព្រៃរបស់សហគមន៍ និងមានម៉ាស៊ីនអាឈើ កាប់ឈើគរជាគំនរដើម្បីលក់។ លោកបានរៀបរាប់ទៀតថា៖ «ក្រុមហ៊ុននេះ ខ្ញុំគិតថាគេមិនធ្វើអ្វីនោះទេ គឺគេមកកាប់តែឈើអស់ហើយ គេនឹងទុកដីនោះចោល»។

លោកបានពន្យល់ថា ពលរដ្ឋនៅក្នុងតំបន់នេះមានចំនួន ១៣៧ គ្រួសារ ដែលមានដី ២៥០ ហិកតា​គឺប៉ះពាល់​ចំនួន ១៥០ ហិកតា ដូច្នេះលោកសុំឲ្យអាជ្ញាធរឃ្វៀលដីនោះចេញទុកឲ្យពលរដ្ឋ ហើយអនុញ្ញតិឲ្យពលរដ្ឋ អាចចេញ​ចូល​រក​ស៊ីបានដូចមុនពីព្រោះជនជាតិមិនចេះរកស៊ីអីក្រៅពីដឹងជ័រនោះទេ។ លោកបានថ្លែងឲ្យដឹងថា៖ «ប្រជាជន​ធ្វើអី​មិន​បាន​ទេ ប៉ុន្តែក្រុមហ៊ុនកាប់ឈើជាគំនរ អត់មានអាជ្ញាធរណាធ្វើដឹង»។

លោក សាន ជិន ជំទប់ទី១ ឃុំសុខសាន និងជាជនរងគ្រោះដែរនោះ បានថ្លែងឲ្យដឹងថា ពលរដ្ឋទាំងអស់ពុំមាន​ចង់​បានអ្វី ក្រៅពីទាមទារយកដីវិញ និងឲ្យក្រុមហ៊ុនកំណត់ព្រំដីឲ្យបានច្បាស់ និងនៅឲ្យឆ្ងាយពីដីរបស់​ពលរដ្ឋ​ចំងាយ ១០០ម៉ែត្រទៅ ២០០ម៉ែត្រ។ លោកបានបកស្រាយថា៖ «មុនក្រុមហ៊ុនមកដល់ ខាងបរិស្ថានមិនឲ្យ​ប្រជា​ពលរដ្ឋ​ធ្វើអ្វី​លើដីនោះទេ ហើយយើងស្មានតែគេទុកធ្វើអី គេបែរជាទុកឲ្យក្រុមហ៊ុនទៅវិញ។ គេធ្វើបាបប្រជាពលរដ្ឋខ្លួនឯង ដើម្បី​ផ្គាប់ចិត្តក្រុមហ៊ុន ទោះបី ជាក្រុមហ៊ុនកាប់ឈើយ៉ាងម៉េចក៏គ្មានអាជ្ញាធរណាធ្វើដឹងលឺនោះដែរ។»

លោក មិល សឿង អភិបាលស្រុកកោះញ៉ែក បានថ្លែងឲ្យដឹងថា ពុំមានពលរដ្ឋរឺក៏អាជ្ញាធរភូមិ ឃុំណារាយការណ៍​អំពី​បញ្ហានោះមកលោកនោះទេ ដូច្នេះពលរដ្ឋត្រូវតែរាយការមកអាជ្ញាធរ។ លោកបានថ្លែងឲ្យដឹងទៀតថា៖ «ពុំមានអ្នក​ណា​ហាមឃាត់គាត់មិនឲ្យធ្វើស្រែចំការនោះនោះទេ»។

លិខិតរបស់ទីស្តីការគណៈរដ្ឋមន្ត្រី នៅថ្ងៃទី ៣ ខែមករា ឆ្នាំ ២០១២ ដែលចុះហត្ថលេខាដោយលោក ម្សាស់ លាស់ ជូន​ទេសរដ្ឋមន្ត្រីរដ្ឋមន្ត្រីក្រសួងបរិស្ថាន បានឲ្យដឹងថា រាជរដ្ឋាភិបាលបានយល់ព្រមតាមសំណើរ របស់ក្រសួង​បរិស្ថាន​ដោយអនុញ្ញាតិឲ្យក្រុមហ៊ុន ម៉ាស្ទ័រ ខេសាន់ ខូអិលធីឌី ធ្វើការវិនិយោគអភិវឌ្ឍន៍លើវិស័យដំណាំកសិឧស្សាហកម្ម ដំណាំកៅស៊ូ និងសម្រាប់គ្រប់គ្រងអភិរក្សសត្វព្រៃ និងអភិវឌ្ឍន៍ការប្រមាញ់សត្វព្រៃ កំសាន្តប្រកបដោយនិរន្តភាព បម្រើផលប្រយោជន៍សេដ្ឋកិច្ច សង្គមកិច្ច សហគមន៍មូលដ្ឋាន និងការអភិវឌ្ឍន៍តំបន់ទេសចរណ៍ អេកូឡូស៊ីបែប​អន្តរជាតិ លើផ្ទៃដីសរុបចំនួន ៦៨៩២ ហិកតា រយៈពេល៧០ ឆ្នាំ ក្នុតតំបន់ដែនជម្រកសត្វព្រៃភ្នំពេ្រច។

មិនអាចធ្វើការទំនាក់ទំនងក្រុមហ៊ុន ក្រុមហ៊ុន ម៉ាស្ទ័រ ខេសាន់ ខូអិលធីឌី ដើម្បីធ្វើការអត្ថាធិប្បាយបានទេ។

លោកយី សុខ សាន្ត មន្ត្រីស៊ើបអង្កេតជាន់ខ្ពស់ សមាគមការពារសិទ្ធិមនុស្សអាដហុក ដែលបានចុះទៅអង្កេតផ្ទាល់​ជាមួយគណកម្មាធិការប្រព្រឹតិ្តកម្មបានថ្លែងឲ្យដឹងថា ការផ្តល់ដីសម្បទានទៅឲ្យក្រុមហ៊ុននេះដូចជាមានអាថកំបាំង ពីព្រោះក្រុមហ៊ុនទទួលបានតែលិខិតអនុញ្ញាតិពីទីស្តីការគណៈរដ្ឋមន្ត្រីប៉ុណ្ណោះ ក៏ចាប់ផ្តើមទៅបោះបង្គោលនៅ ក្នុង​តំបន់នោះ តាមពិលិខិតគ្រាន់តែអនុញ្ញតិពុំមែនជាអនុក្រិតនោះទេ។ លោកបានថ្លែងឲ្យដឹងថា៖ «អាជ្ញាធរគិតគូរ​ក្រុមហ៊ុនជាងប្រជាជន ដោយយកដីស្របច្បាប់របស់ពលរដ្ឋ ទៅប្រគល់ឲ្យក្រុមហ៊ុនដែលធ្វើឲ្យ​ពួកគាត់ប៉ះពាល់​យ៉ាង​ធ្ងន់ធ្ងរ ហើយក្រុមនេះមិនទាន់ឃើញធ្វើអ្វីនោះទេក្រៅអំពីកាប់ដើមឈើ»។

បើយោងទៅតាមរបាយការណ៍ បូកសរុបការងារកសិកម្ម រុក្ខាប្រមាញ់ និងនេសាទ ប្រចាំឆ្នាំ ២០១២-២០១៣ និង​ទិស​ដៅឆ្នាំ២០១៣-២០១៤ បង្ហាញឲ្យដឹងថា មកទល់ពេលនេះរដ្ឋាភិបាលកម្ពុជា បានផ្តល់គោលការណ៍វិនិយោគ ជូន​ក្រុមហ៊ុនសម្បទានសេដ្ឋកិច្ចនិងបានចុះកិច្ចសន្យាជាមួយ ក្រសួងកសិកម្ម រុក្ខាប្រមាញ់ និងនេសាទ សរុបចំនួន ១២១ ក្រុមហ៊ុន លើផ្ទៃដីកិច្ចសន្យាសរុបចំនួន ១.២៣០.៣៦៤ ហិកតា ស្ថិតនៅក្នុងខេត្តចំនួន១៧ ដែលនៅក្នុងនោះ​ក្រុម​ហ៊ុន​មកពីបរទេសសរុបចំនួន ៨២ ក្រុមហ៊ុន លើផ្ទៃដីសរុបចំនួន ៦២០.៩៨៧ ហិកតា។ តែតួលេខទាំងនេះ មាន​ចំនួន​តិច​ជាងអ្វី ដែល​ខាងអង្គការក្រៅរដ្ឋាភិបាលរកឃើញ៕

រូបភាពលំនៅដ្ឋានរបស់ជនជាតិដើម នៅខេត្តមណ្ឌលគីរី៖